ຕໍາຫຼວດທະເລຫວຽດນາມ ແລະຈີນ ສົມທົບກັນກວດກາອາຊີບຫາປາປະສົມຢູ່ອ່າວພາກເໜືອ
ກປ.ອອນໄລ - ວັນທີ 24 ເມສາ, ຢູ່ເຂດທະເລອ່າວພາກເໜືອ, ຕໍາຫຼວດທະເລຫວຽດນາມ ແລະຕໍາຫຼວດທະເລຈີນ ໄດ້ເລີ່ມຕົ້ນການກວດກາອາຊີບຫາປາປະສົມຢູ່ອ່າວພາກເໜືອ ປີ 2019 ຢ່າງເປັນທາງການ.
ກໍາລັງຕໍາຫຼວດທະເລສອງປະເທດຫວຽດນາມ ແລະຈີນ ໄດ້ດໍາເນີນການເຈລະຈາຢູ່ກໍາປັ່ນຕໍາຫຼວດທະເລໝາຍເລກ 8004 ເພື່ອເຫັນດີເປັນເອກະພາບວິທີການ, ແຜນການກວດກາອາຊີບຫາປາປະສົມຢູ່ອ່າວພາກເໜືອ.
|
|
ຕໍາຫຼວດທະເລຫວຽດນາມ ແລະຈີນ ພົບປະສັງສັນກັນກ່ອນການກວດກາອາຊີບຫາປາປະສົມປີ 2019. ພາບ: ສໍານັກຂ່າວສານຫວຽດນາມ. |
ການກວດກາຄັ້ງນີ້, ກໍາລັງຕໍາຫຼວດທະເລສອງປະເທດຈະດໍາເນີນການກວດກາ, ຕິດຕາມກວດກາສັນຍາຮ່ວມມືອາຊີບຫາປາຢູ່ 9 ຈຸດໃນເຂດຫາປາລວມຢູ່ອ່າວພາກເໜືອ. ທ່ານພັນເອກ ເລືອງກາວຂາຍ ຮອງຜູ້ບັນຊາການຕໍາຫຼວດທະເລເຂດ 1 ໃຫ້ຂໍ້ສັງເກດວ່າ, ໃນໄລຍະຜ່ານມາ, ການພົວພັນຮ່ວມມືລະຫວ່າງຕໍາຫຼວດທະເລຫວຽດນາມ ແລະຕໍາຫຼວດທະເລຈີນ ພັດທະນາຢ່າງວ່ອງໄວ, ຖືກຕາມທິດ ແລະມີລັກສະນະແທດຈິງ. ບັນດາການເຄື່ອນໄຫວໃນການກວດກາຄັ້ງນີ້ໄດ້ປະກອບສ່ວນເພີ່ມທະວີຄວາມຮູ້, ການຮ່ວມມື, ຄວາມໄວ້ເນື້ອເຊື່ອໃຈລະຫວ່າງລັດຖະບານ ແລະປະຊາຊົນສອງປະເທດເວົ້າລວມ, ກໍາລັງຕໍາຫຼວດທະເລສອງປະເທດ ຫວຽດນາມ-ຈີນ ເວົ້າສະເພາະ.
ການກວດກາອາຊີບຫາປາປະສົມຢູ່ອ່າວພາກເໜືອຫວຽດນາມ-ຈີນ ປີ 2019 ໄດ້ດໍາເນີນແຕ່ວັນທີ 24-26 ເມສາ.
ໂດຍ: ທະນາພອນ