ຂໍຮຽນທ່ານ Abdul Rahman Taib Pehin Orang Kaya Seri Lela, ປະທານສະພານິຕິບັນຍັດ ບຣູໄນ ດາຣູຊາລາມ, ປະທານສະມັດຊາໃຫຍ່ AIPA ຄັ້ງທີ 42,
ຕາງໜ້າລັດ ແລະປະຊາຊົນຫວຽດນາມ, ຂ້າພະເຈົ້າ ຂໍຖືເປັນກຽດສົ່ງຄຳຊົມເຊີຍມາຍັງທ່ານປະທານ, ປະທານສະພາແຫ່ງຊາດປະເທດຕ່າງໆ, ຫົວໜ້າສະມາຊິກລັດຖະສະພາ, ຜູ້ແທນທີ່ເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 42 ໂດຍສະພານິຕິບັນຍັດ ບຣູໄນ ດາຣູຊາລາມ ຈັດຕັ້ງຜ່ານລະບົບທາງໄກ.
ກອງປະຊຸມ AIPA-42 ໄດ້ຈັດຕັ້ງໃນສະພາບການທີ່ໂລກ ແລະພາກພື້ນພວມຖືກຜົນສະທ້ອນຢ່າງໜັກໜ່ວງຂອງພະຍາດໂຄວິດ-19, ສົ່ງຜົນກະທົບຢ່າງຮ້າຍແຮງເຖິງການພັດທະນາເສດຖະກິດ-ສັງຄົມ ແລະຊີວິດຂອງປະຊາຊົນຢູ່ປະເທດຕ່າງໆ, ພ້ອມກັນນັ້ນແມ່ນສິ່ງທ້າທາຍຕ່າງໆ, ທັງແງ່ມູມຄວາມໝັ້ນຄົງແບບເກົ່າ ແລະແບບໃໝ່, ນາບຂູ່ເຖິງສະພາບແວດລ້ອມສະຖຽນລະພາບ ແລະຄວາມໝັ້ນຄົງຢູ່ພາກພື້ນຂອງພວກເຮົາ. ອາຊຽນ, ຍິ່ງກວ່າເວລາໃດໝົດ, ຄວນສະແດງໃຫ້ເຫັນວິໄສທັດທີ່ຖືກຕ້ອງ, ສີສັນສາມັກຄີ, ສະໜິດຕິດພັນ ແລະຄວາມສາມາດກຸ້ມຕົນເອງຂອງປະຊາຄົມໜ່ຶງເພື່ອຜ່ານຜ່າທຸກຄວາມຫຍຸ້ງຍາກ, ກ້າວໄປຂ້າງໜ້າ. ທຸກບາດກ້າວພັດທະນາຂອງປະຊາຄົມອາຊຽນ ບໍ່ສາມາດຂາດບົດບາດສຳຄັນຂອງຊ່ອງທາງນິຕິບັນຍັດໄດ້, ເຊິ່ງຕາງໜ້າແມ່ນ AIPA ແລະບັນດາສະມາຊິກລັດຖະສະພາ. ຂ້າພະເຈົ້າ ຂໍຊົມເຊີຍວິວັດການຮ່ວມມື ແລະພັດທະນາຢ່າງເຂັ້ມແຂງຂອງ AIPA ໃນຊຸມທົດສະວັດຜ່ານມາ ກໍ່ຄືການປະກອບສ່ວນ, ສະໜັບສະໜູນຢ່າງຕັ້ງໜ້າຂອງບັນດາສະມາຊິກລັດຖະສະພາ AIPA ຕໍ່ກັບລັດຖະບານບັນດາປະເທດສະມາຊິກອາຊຽນ ເພື່ອແນໃສ່ຮັກສາສະພາບແວດລ້ອມສັນຕິພາບ, ສະຖຽນລະພາບ, ຄວາມໝັ້ນຄົງຢູ່ພາກພື້ນ, ຊຸກຍູ້ການຮ່ວມມື, ພັດທະນາແບບຍືນຍົງ, ມຸ່ງໄປເຖິງປະຊາຊົນ ແລະຖືປະຊາຊົນເປັນໃຈກາງ.
    |
 |
|
ທ່ານ ຫງວຽນຊວນຟຸກ ປະທານປະເທດຫວຽດນາມ. ພາບ: vtv.vn. |
ດ້ວຍຈິດໃຈດັ່ງກ່າວ, ຂ້າພະເຈົ້າຕີລາຄາສູງຕໍ່ຫົວຂໍ້ຂອງກອງປະຊຸມ AIPA ປີນີ້ແມ່ນ “ພັດທະນາການພົວພັນຮ່ວມມືລັດຖະສະພາໃນຂົງເຂດເຕັກນິກດີຈີຕອນກວມລວມມຸ່ງໄປເຖິງປະຊາຄົມອາຊຽນ ປີ 2025”. ຫົວຂໍ້ມີລັກສະນະສະຖານະການສູງ, ວາງອອກຄວາມຮຽກຮ້ອງຕ້ອງການທີ່ແທດຈິງຂອງການຮ່ວມມືໃນລັດຖະສະພາອາຊຽນ, ເສີມຂະຫຍາຍບົດບາດຂອງຊ່ອງທາງນິຕິບັນຍັດ ຮ່ວມເດີນທາງພ້ອມກັບຊ່ອງທາງບໍລິຫານໃນການຍູ້ແຮງກິດຈະການຫັນປ່ຽນດີຈີຕອນ, ກໍ່ສ້າງພື້ນຖານເສດຖະກິດດີຈີຕອນ, ຮັດແຄບໄລຍະຫ່າງດີຈີຕອນ ແລະຂາດຄວາມສະເໝີພາບດີຈີຕອນ, ມຸ່ງໄປສູ່ເຕັກນິກດີຈີຕອນກວມລວມໃນປະຊາຄົມອາຊຽນ. ໃນໄລຍະທີ່ຫຍຸ້ງຍາກ, ເກີດສິ່ງທ້າທາຍຄືໃນປະຈຸບັນ, ຂ້າພະເຈົ້າຂໍເນັ້ນໜັກເປັນພິເສດເຖິງຄວາມສຳຄັນຂອງຊ່ອງທາງນິຕິບັນຍັດບັນດາປະເທດອາຊຽນ, ຜ່ານ AIPA ແລະບັນດາສະມາຊິກລັດຖະສະພາ ກໍ່ຄືເປັນເສົາຄ້ຳສົມທົບ ແລະຊ່ວຍຊູກັນຢ່າງມີປະສິດທິຜົນໃຫ້ແກ່ຄວາມມານະພະຍາຍາມຂອງບັນດາລັດຖະບານປັບປຸງກຳລັງແຮງສັງລວມຂອງອາຊຽນ ຜ່ານຜ່າພາຍຸລົມແດງ, ສືບຕໍ່ປະຕິບັດເປົ້າໝາຍກໍ່ສ້າງປະຊາຄົມໃຫ້ປະສົບຜົນສຳເລັດ.
ດ້ວຍຄວາມໄວ້ເນື້ອເຊື່ອໃຈດັ່ງກ່າວ, ຂ້າພະເຈົ້າຢືນຢັນວ່າ ຫວຽດນາມ ໃຫ້ຄຳໝັ້ນສັນຍາສືບຕໍ່ເຂົ້າຮ່ວມຢ່າງເປັນເຈົ້າການ, ຕັ້ງໜ້າ, ມີຄວາມຮັບຜິດຊອບໃນຂອບເຂດຮ່ວມມືຫຼາຍຝ່າຍ, ທັງແງ່ມູມບໍລິຫານ ແລະນິຕິບັນຍັດ. ຂ້າພະເຈົ້າເຊື່ອໝັ້ນວ່າ ສະພາແຫ່ງຊາດຫວຽດນາມ ຈະສືບຕໍ່ປະກອບສ່ວນຈົນສຸດຄວາມສາມາດຂອງຕົນໃຫ້ແກ່ວິວັດການຮ່ວມມື ແລະພັດທະນາຂອງ AIPA, ສ້າງຄວາມເຕີບໃຫຍ່ເຂັ້ມແຂງ ແລະຍືນຍົງຄົງຕົວຂອງປະຊາຄົມອາຊຽນ, ຊາຍຄາລວມຂອງປະຊາຊົນບັນດາເຜົ່າອ້າຍນ້ອງ 650 ລ້ານຄົນ ໃນພາກພື້ນຂອງພວກເຮົາ.
ຂ້າພະເຈົ້າ ເຊື່ອໝັ້ນຢ່າງແນວແນ່ວ່າ ພາຍໃຕ້ການເປັນປະທານຂອງທ່ານປະທານ, ການກະກຽມຢ່າງຮອບຄອບຖີ່ຖ້ວນຂອງສະພານິຕິບັນຍັດ ບຣູໄນ ດາຣູຊາລາມ, ພ້ອມກັບການສົມທົບກັນຢ່າງແໜ້ນແຟ້ນຂອງບັນດາສະມາຊິກລັດຖະສະພາ AIPA, ຄະນະເລຂາ AIPA, ສະມັດຊາໃຫຍ່ AIPA ຄັ້ງທີ 42 ຈະປະສົບຜົນສໍາເລັດຢ່າງຈົບງາມ.
ອີກເທື່ອໜຶ່ງ, ຂ້າພະເຈົ້າຂໍຖືເປັນກຽດສົ່ງຄຳຊົມເຊີຍ ແລະພອນໄຊອັນປະເສີດມາຍັງທ່ານປະທານ ແລະຜູ້ແທນທຸກຄົນ.
ແປໂດຍ: ສົມເພັດ