ຮອງປະທານປະເທດຫວຽດນາມ ພົບປະກັບປະຊາຄົມຊາວຫວຽດນາມ ອາໄສຢູ່ແຂວງ ອຸດອນທານີ, ໄທ
ກປ.ອອນໄລ - ໃນຂອບເຂດການປະຕິບັດງານເຂົ້າຮ່ວມກອງປະຊຸມສຸດຍອດແມ່ຍິງທົ່ວໂລກປີ 2022 (GSW 2022) ຢູ່ໄທ, ວັນທີ 21 ມິຖຸນາ, ທ່ານນາງ ຫວໍທິແອັງຊວນ ຮອງປະທານປະເທດຫວຽດນາມ ໄດ້ໄປຢ້ຽມຢາມ ແລະເຮັດວຽກຢູ່ແຂວງ ອຸດອນທານີ (Udon Thani), ໄທ ພົບປະໂອ້ລົມກັບຊາວຫວຽດນາມ ອາໄສຢູ່ໄທ ແລະຢ້ຽມຢາມໂຮງຮຽນ ແຄ໊ງອານ.
ທີ່ການພົບປະໂອ້ລົມ, ພາຍຫຼັງຮັບຟັງປະທານສະມາຄົມຊາວຫວຽດນາມ ທົ່ວໄທ, ປະທານສະມາຄົມນັກທຸລະກິດໄທ-ຫວຽດນາມ ລາຍງານສະພາບການຂອງພໍ່ແມ່ປະຊາຊົນຊາວຫວຽດນາມ ອາໄສຢູ່ໄທ, ທ່ານນາງຮອງປະທານປະເທດຫວຽດນາມ ຕີລາຄາສູງຈິດໃຈສາມັກຄີ, ຊ່ວຍເຫຼືອເຊິ່ງກັນ ແລະກັນຂອງປະຊາຊົນ, ອາລົມຈິດສະໜິດຕິດພັນ, ອ່ວາຍໜ້າເມືອຫາບ້ານເກີດເມືອງນອນ, ປະເທດຊາດ ແລະການປະກອບສ່ວນອັນລໍ້າຄ່າຂອງຊາວຫວຽດນາມ ອາໄສຢູ່ໄທລຸ້ນຕ່າງໆໃຫ້ແກ່ການປະຕິວັດຫວຽດນາມ ໃນສະໄໝຕໍ່ຕ້ານກ່ອນໜ້ານີ້, ກໍ່ຄືໃຫ້ພາລະກິດສ້າງສາ ແລະພັດທະນາປະເທດຊາດໃນປະຈຸບັນ.
|
|
ທ່ານນາງ ຫວໍທິແອັງຊວນ ຮອງປະທານປະເທດຫວຽດນາມ ໂອ້ລົມກັບປະຊາຄົມຊາວຫວຽດນາມ ອາໄສຢູ່ໄທ. ພາບ: ສໍານັກຂ່າວສານຫວຽດນາມ. |
ທ່ານນາງ ປາດຖະໜາຢາກໃຫ້ຄະນະບໍລິຫານງານສະມາຄົມຊາວຫວຽດນາມ ທົ່ວໄທ ແລະຄະນະບໍລິຫານບັນດາສະມາຄົມຊາວໄທເຊື້ອຊາດຫວຽດນາມ ນັບມື້ນັບເສີມຂະຫຍາຍບົດບາດແກ່ນສານຂອງປະຊາຄົມ, ຕອບສະໜອງຄວາມຕ້ອງການຂອງພໍ່ແມ່ປະຊາຊົນໃຫ້ເປັນຢ່າງດີໃນການເຄື່ອນໄຫວສາມັກຄີ, ເຕົ້າໂຮມພໍ່ແມ່ປະຊາຊົນ, ສອນ ແລະຮຽນພາສາຫວຽດ, ອ່ວາຍໜ້າເມືອຫາບ້ານເກີດເມືອງນອນ, ພ້ອມທັງປະກອບສ່ວນເພີ່ມທະວີການຮ່ວມມືມິດຕະພາບລະຫວ່າງລັດ, ທ້ອງຖິ່ນ ແລະປະຊາຊົນສອງປະເທດ, ໃນນັ້ນເອົາໃຈໃສ່ຕໍ່ການຮັກສາ ແລະປັບປຸງກຸ່ມກ້ອນມະຫາສາມັກຄີ, ສົ່ງເສີມບັນດາສະມາຄົມນຳເອົາທ່າແຮງສະເພາະຂອງຕົນປະກອບສ່ວນໃຫ້ປະຊາຄົມ, ສືບຕໍ່ຮັກສາ ແລະເສີມຂະຫຍາຍສີສັນຊາດ, ໃນນັ້ນມີພຸດທະສາສະໜາຫວຽດນາມ ແລະພາສາຫວຽດ.
ໂດຍ: ໄຊນີດາ