ລັດຖະມົນຕີກະຊວງຕໍາຫຼວດຫວຽດນາມ ຕ້ອນຮັບເອກອັກຄະລັດຖະທູດຍີ່ປຸ່ນ
ກປ.ອອນໄລ - ວັນທີ 20 ພຶດສະພາ, ຢູ່ຮ່າໂນ້ຍ, ທ່ານພົນເອກ ໂຕເລິມ, ລັດຖະມົນຕີກະຊວງຕໍາຫຼວດຫວຽດນາມ ໄດ້ໃຫ້ການຕ້ອນຮັບທ່ານ Yamada Takio ເອກອັກຄະລັດຖະທູດຍີ່ປຸ່ນ ປະຈໍາ ຫວຽດນາມ ເນື່ອງໃນໂອກາດທ່ານເລີ່ມປະຕິບັດໜ້າທີ່ການທູດຢູ່ ຫວຽດນາມ.
|
|
ທ່ານພົນເອກ ໂຕເລິມ ແລະທ່ານ Yamada Takio ເອກອັກຄະລັດຖະທູດຍີ່ປຸ່ນ. ພາບ: Bocongan.gov.vn. |
ທີ່ການຕ້ອນຮັບ, ທ່ານພົນເອກ ໂຕເລິມ ຊີ້ແຈ້ງວ່າໃນຊຸມປີຜ່ານມາ, ການພົວພັນ “ຄູ່ຮ່ວມມືຍຸດທະສາດທີ່ເລິກເຊິ່ງ, ກວ້າງຂວາງລະຫວ່າງຫວຽດນາມ-ຍີ່ປຸ່ນ ເພື່ອສັນຕິພາບ, ຄວາມຈະເລີນຮຸ່ງເຮືອງຢູ່ອາຊີ” ສືບຕໍ່ພັດທະນາ ແລະເຂົ້າສູ່ລວງເລິກໃນຂົງເຂດຕ່າງໆ. ຕໍ່ໜ້າສະພາບການພະຍາດໂຄວິດ-19 ສືບຕໍ່ຜັນແປຢ່າງສັບສົນ, ທ່ານພົນເອກ ໂຕເລິມ ຢັ້ງຢືນວ່າ ລັດຖະບານຫວຽດນາມ ເວົ້າລວມ, ກະຊວງຕໍາຫຼວດຫວຽດນາມ ເວົ້າສະເພາະ ພ້ອມແລ້ວທີ່ຈະແບ່ງປັນບົດຮຽນ, ຊ່ວຍເຫຼືອ ຍີ່ປຸ່ນ ໃນວຽກງານປ້ອງກັນ, ຕ້ານພະຍາດ; ໜູນຊ່ວຍບັນດາວິສາຫະກິດ, ນັກຊ່ຽວຊານຍີ່ປຸ່ນ ກັບຄືນເຮັດວຽກຢູ່ຫວຽດນາມ.
ສ່ວນທ່ານ Yamada Takio ຢັ້ງຢືນວ່າ ໃນຖານະຕໍາແໜ່ງຂອງຕົນທ່ານຈະຊຸກຍູ້ສາຍພົວພັນຮ່ວມມືລະຫວ່າງສອງປະເທດໃຫ້ນັບມື້ນັບພັດທະນາ, ເຂົ້າສູ່ລວງເລິກ.
ເນື່ອງໃນໂອກາດນີ້, ຕາງໜ້າກະຊວງຕໍາຫຼວດຫວຽດນາມ, ທ່ານພົນເອກ ໂຕເລິມ ໄດ້ມອບຜ້າອັດປາກ-ອັດດັງ 10.000 ອັນໃຫ້ອົງການຕໍາຫຼວດ ແຫ່ງຊາດຍີ່ປຸ່ນ.
ໂດຍ: ທູຈາງ