ເພີ່ມທະວີການຮ່ວມມືຫຼາຍດ້ານລະຫວ່າງ ຫວຽດນາມ ແລະແຟງລັງ

ທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ ແລະທ່ານປະທານາທິບໍດີແຟງລັງ Alexander Stubb ກ່ອນການພົບປະ. ພາບ: VGP.

ແຕ່ວັນທີ 27 ຫາວັນທີ 28 ພະຈິກ, ທ່ານ ເຈິ່ນຮົ່ງຮ່າ ຮອງນາຍົກລັດຖະມົນຕີຫວຽດນາມ ໄດ້ໄປຢ້ຽມຢາມ ແລະເຮັດວຽກຢູ່ແຟງລັງ. ຢູ່ທີ່ນີ້, ທ່ານຮອງນາຍົກລັດຖະມົນຕີ ໄດ້ພົບປະກັບທ່ານ Alexander Stubb ປະທານາທິບໍດີ ແຟງລັງ, ດຳເນີນການພົບປະສອງຝ່າຍກັບທ່ານນາງ Rikka Purra ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຟງລັງ.

ເມື່ອແລກປ່ຽນກັບທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ, ທ່ານປະທານາທິບໍດີ Alexander Stubb, ສະເໜີໃຫ້ລັດຖະບານສອງປະເທດ ມີມາດຕະການຊຸກຍູ້ການຮ່ວມມືຢ່າງແຮງກວ່າ ເພື່ອໃຫ້ສອດຄ່ອງກັບຄວາມສາມາດບົ່ມຊ້ອນ ແລະຄວາມຕ້ອງການຂອງສອງຝ່າຍ; ໃນນັ້ນ, ຕ້ອງສືບຕໍ່ເປີດກວ້າງການຮ່ວມມືໃນທຸກຂົງເຂດ, ໃນນັ້ນ, ໃຫ້ບຸລິມະສິດໃນບັນດາຂົງເຂດ ເຊິ່ງ ແຟງລັງ ມີທ່າແຮງ ແລະຫວຽດນາມ ມີຄວາມຕ້ອງການ.

ສ່ວນທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ ປາດຖະໜາວ່າ, ສອງປະເທດ ຈະເພີ່ມທະວີການຮ່ວມມືໃນຂົງເຂດພັດທະນາແບບຍືນຍົງ, ຫັນເປັນສີຂຽວ, ເສດຖະກິດໝູນວຽນ. ທ່ານ ຢືນຢັນວ່າ, ຫວຽດນາມ ສະໜັບສະໜູນແຟງລັງ ເພີ່ມທະວີການຮ່ວມມືກັບອາຊຽນ.

ໃນການພົບປະສອງຝ່າຍກັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນແຟງລັງ ນາງ Rikka Purra, ທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ ສະເໜີໃຫ້ລັດຖະບານແຟງລັງ ເອົາໃຈໃສ່, ສົ່ງເສີມບັນດາວິສາຫະກິດຂອງແຟງລັງ ລົງທຶນເຂົ້າຫວຽດນາມ ໃນບັນດາຂົງເຂດ, ຄື: ສິ່ງແວດລ້ອມ, ພະລັງງານທົດແທນ, ຕົວເມືອງອັດສະລິຍະ, ແກ້ໄຂສິ່ງເສດເຫຼືອອຸດສາຫະກຳ, ຂໍ້ມູນຂ່າວສານ… ທ່ານ ກໍ່ສະເໜີໃຫ້ແຟງລັງ ສືບຕໍ່ມີສຽງເວົ້າເພື່ອໃຫ້ບັນດາປະເທດທີ່ຍັງເຫຼືອໃນອີຢູ ໃຫ້ສັດຕະຍາບັນສັນຍາອາລັກຂາການລົງທຶນ ຫວຽດນາມ - ອີຢູ (EVIPA) ໂດຍໄວ.

ໂດຍ: ວິທະຍຸກະຈາຍສຽງຫວຽດນາມ