ບັນດາການນຳຂອງມາເລເຊຍ ຕ້ອນຮັບ ແລະພົບປະສອງຝ່າຍກັບທ່ານເລຂາທິການໃຫຍ່ ໂຕເລິມ

ທ່ານ Anwar Ibrahim ນາຍົກລັດຖະມົນຕີມາເລເຊຍ ພ້ອມດ້ວຍພັນລະຍາ ເປັນປະທານພິທີຕ້ອນຮັບທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ພ້ອມດ້ວຍພັນລະຍາ. ພາບ: qdnd.vn

ພາຍຫຼັງພິທີຕ້ອນຮັບຢ່າງເປັນທາງການຢູ່ສຳນັກງານນາຍົກລັດຖະມົນຕີ ໃນສູນບໍລິຫານ Putrajaya, ທ່ານ ໂຕເລິມ ເລຂາທິການໃຫຍ່ ໄດ້ມີການພົບປະສອງຝ່າຍກັບທ່ານ Anwar Ibrahim ນາຍົກລັດຖະມົນຕີມາເລເຊຍ.

ການພົວພັນ ຫວຽດນາມ - ມາເລເຊຍ ພັດທະນາຢ່າງແຂງແຮງ, ເລິກເຊິ່ງ ແລະຮອບດ້ານ

ທີ່ການພົບປະສອງຝ່າຍ, ທ່ານເລຂາທິການໃຫຍ່  ຕີລາຄາສູງການພັດທະນາຢ່າງຕັ້ງໜ້າຂອງມາເລເຊຍ; ເຊື່ອໝັ້ນວ່າ ພາຍໃຕ້ການນຳພາຂອງທ່ານ Anwar Ibrahim, ມາເລເຊຍ ຈະປະຕິບັດຍຸດທະສາດພັດທະນາຮອບດ້ານໃນໄລຍະໃໝ່ປະສົບຜົນສຳເລັດ, ພິເສດແມ່ນ “ແຜນການເສດຖະກິດ Madani -ມອບສິດໃຫ້ແກ່ປະຊາຊົນ” ແລະ “ແຜນສັງລວມໃໝ່ກ່ຽວກັບອຸດສາຫະກຳ 2030”. ທ່ານເລຂາທິການໃຫຍ່  ຢືນຢັນວ່າ ຫວຽດນາມ ຖືເປັນສຳຄັນ ແລະ ໃຫ້ບຸລິມະສິດສູງໃນການຊຸກຍູ້ການພົວພັນກັບມາເລເຊຍ.

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກ ກອມມູນິດຫວຽດນາມ ແລະທ່ານ Anwar Ibrahim ນາຍົກລັດຖະ ມົນຕີມາເລເຊຍ. ພາບ: ສໍານັກຂ່າວສານຫວຽດນາມ

ສ່ວນທ່ານ Anwar Ibrahim ກໍສະແດງຄວາມປະທັບໃຈຕໍ່ການປ່ຽນແປງຢ່າງຕັ້ງໜ້າ ແລະ ຮອບດ້ານຂອງຫວຽດນາມ, ເປັນຕົ້ນແມ່ນການພັດທະນາເສດຖະກິດ ແລະບັນດາຂະແໜງອຸດສາຫະກຳສຳຄັນ; ເຊື່ອໝັ້ນວ່າ ພາຍໃຕ້ການນຳພາຂອງພັກ, ລັດ ຫວຽດນາມ ແລະ ທ່ານເລຂາທິການໃຫຍ່, ຫວຽດນາມ ຈະປະຕິບັດບັນດາເປົ້າໝາຍພັດທະນາສຳເລັດ.

ທີ່ການພົບປະສອງຝ່າຍ, ການນໍາສອງທ່ານໄດ້ເຫັນດີເປັນເອກະສັນຍົກລະດັບການພົວພັນຫວຽດນາມ-ມາເລເຊຍ ຂຶ້ນເປັນຄູ່ຮ່ວມມືຍຸດທະສາດຮອບດ້ານ. ການນຳສອງທ່ານໄດ້ແລກປ່ຽນຢ່າງເລິກເຊິ່ງ ແລະບັນລຸໄດ້ຄວາມຮັບຮູ້ລວມທີ່ສຳຄັນ ກ່ຽວກັບທິດທາງໃຫຍ່ເພື່ອຍູ້ແຮງການຮ່ວມມືໃນຂົງເຂດຫຼັກຂອງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ.

ບັນຍາກາດທີ່ການພົບປະສອງຝ່າຍ. ພາບ: qdnd.vn

ທ່ານ ໂຕເລິມ ເລຂາທິການໃຫຍ່ ແລະທ່ານ Anwar Ibrahim ນາຍົກລັດຖະມົນຕີມາເລເຊຍ ກໍເຫັນດີປັບປຸງຄວາມໄວ້ເນື້ອເຊື່ອໃຈດ້ານການເມືອງ; ເປີດກວ້າງ, ເຮັດໃຫ້ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບເລິກເຊິ່ງຂຶ້ນກວ່າເກົ່າ; ຍົກສູງປະສິດທິຜົນການພົວພັນລະຫວ່າງພັກ, ລັດ, ລັດຖະບານ, ສະພາແຫ່ງຊາດ; ເພີ່ມທະວີການແລກປ່ຽນລະຫວ່າງການນຳຂັ້ນສູງຂອງສອງປະເທດ.

ທ່ານ ໂຕເລິມ ແລະ ທ່ານ Anwar Ibrahim ນາຍົກລັດຖະມົນຕີ ໄດ້ແບ່ງປັນທັດສະນະຮ່ວມ ກ່ຽວກັບການເພີ່ມທະວີການເຊື່ອມຕໍ່ດ້ານເສດຖະກິດມຸ່ງໄປເຖິງການພັດທະນາແບບຍືນຍົງ, ສ້າງແຫຼ່ງກຳລັງຕື່ມອີກໃຫ້ແກ່ໄລຍະພັດທະນາໃໝ່ຂອງສອງປະເທດ. ການນຳສອງປະເທດຍັງຕີລາຄາສູງການສົມທົບກັນຢ່າງແໜ້ນແຟ້ນ ແລະສະໜັບສະໜູນເຊິ່ງກັນ ແລະກັນທີ່ບັນດາກົນໄກຫຼາຍຝ່າຍ, ເປັນຕົ້ນແມ່ນຢູ່ອາຊຽນ, ສະຫະປະຊາຊາດ, ເຫັນດີເປັນເອກະພາບເປີດກວ້າງ ແລະເຮັດໃຫ້ການສົມທົບກັນໃນບັນຫາສາກົນ ເລິກເຊິ່ງຂຶ້ນກ່ວາອີກ.

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກ ກອມມູນິດຫວຽດນາມ ແລະທ່ານ Anwar Ibrahim ນາຍົກລັດຖະມົນຕີມາເລເຊຍ ເປັນສັກຂີພິຍານພິທີແລກປ່ຽນເອກະສານຮ່ວມມື. ພາບ: ສໍານັກຂ່າວສານຫວຽດນາມ

ສິ້ນສຸດການພົບປະສອງຝ່າຍ, ທ່ານ ໂຕເລິມ ແລະ ທ່ານ Anwar Ibrahim ໄດ້ເປັນສັກຂີພິຍານພິທີແລກປ່ຽນເອກະສານຮ່ວມມືສະບັບຕ່າງໆລະຫວ່າງບັນດາກະຊວງ ແລະຂະແໜງການຂອງສອງປະເທດ, ໃນນັ້ນມີ: ບົດບັນທຶກຊ່ວຍຈຳລະຫວ່າງກົມສົ່ງເສີມການຄ້າຫວຽດນາມ ກັບ ອົງການ ພັດທະນາການຄ້າຕ່າງປະເທດມາເລເຊຍ ກ່ຽວກັບການເພີ່ມທະວີການຮ່ວມມືສົ່ງເສີມການຄ້າ; ບົດບັນທຶກຊ່ວຍຈໍາ ກ່ຽວກັບການຮ່ວມມືດ້ານພະລັງງານທົດແທນ ລະຫວ່າງກຸ່ມບໍລິສັດນ້ຳມັນອາຍແກັສແຫ່ງຊາດຫວຽດນາມ ກັບກຸ່ມບໍລິສັດນ້ຳມັນອາຍແກັສແຫ່ງຊາດມາເລເຊຍ (Petronas).

ມາເລເຊຍ ຍາມໃດກໍຕີລາຄາສູງການພົວພັນກັບຫວຽດນາມ

ຕອນບ່າຍວັນທີ 21 ພະຈິກ, ຢູ່ສຳນັກງານລັດຖະສະພາມາເລເຊຍ, ທ່ານ ໂຕລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ມີການພົບປະກັບທ່ານ Tan Sri Dato' Johari Bin Abdul ປະທານສະພາຕ່ຳມາເລເຊຍ. ນະທີ່ນີ້, ທ່ານ ໂຕເລິມ ແລະທ່ານ Dato’ Johari Bin Abdul ຢືນຢັນວ່າ ຫວຽດນາມ ແລະມາເລເຊຍ ເປັນຄູ່ຮ່ວມມືດ້ານເສດຖະກິດທີ່ສຳຄັນຂອງກັນ, ແບ່ງປັນຜົນປະໂຫຍດຫຼາຍຢ່າງ ແລະ ມີທັດສະນະທີ່ຄ້າຍຄືກັນຕໍ່ບັນດາບັນຫາພາກພື້ນ ແລະ ສາກົນ.

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະທ່ານ Tan Sri Dato’ Johari Bin Abdul ປະທານສະພາຕໍ່າມາເລເຊຍ. ພາບ: qdnd.vn

ທ່ານ  ໂຕເລິມ ໄດ້ແຈ້ງໃຫ້ທ່ານປະທານສະພາຕໍ່າມາເລເຊຍ ຮັບຊາບກ່ຽວກັບຜົນການພົບປະກັບທ່ານນາຍົກລັດຖະມົນຕີ  Anwar Ibrahim ແລະ ສອງຝ່າຍເຫັນດີຍົກລະດັບການພົວພັນລະຫວ່າງສອງປະເທດ ຂຶ້ນເປັນຄູ່ຮ່ວມມືຍຸດທະສາດຮອບດ້ານ; ເນັ້ນໜັກວ່າ, ມາເລເຊຍ ແມ່ນປະເທດທຳອິດຢູ່ອາຊີຕາເວັນອອກສ່ຽງໃຕ້ ທີ່ມີຂອບເຂດການພົວພັນໃນລະດັບສູງສຸດກັບຫວຽດນາມ. ທ່ານ ໂຕເລິມ ສະເໜີວ່າ ໃນຂອບເຂດການພົວພັນໃໝ່, ລັດຖະສະພາມາເລເຊຍ, ໃນນັ້ນມີສະພາຕໍ່າ ຈະເພີ່ມທະວີການຮ່ວມມືຢ່າງແໜ້ນແຟ້ນກັບສະພາແຫ່ງຊາດຫວຽດນາມ, ເປັນຕົ້ນແມ່ນໃນການຕິດຕາມກວດກາການປະຕິບັດເອກະສານຮ່ວມມືສະບັບຕ່າງໆລະຫວ່າງສອງປະເທດໃຫ້ມີປະສິດທິຜົນ; ຊຸກຍູ້ການລົງນາມໃນຂໍ້ຕົກລົງການຮ່ວມມືລະຫວ່າງສະພາແຫ່ງຊາດຫວຽດນາມ ກັບ ລັດຖະສະພາມາເລເຊຍ ໃນໄລຍະຈະມາເຖິງ; ສືບຕໍ່ສົມທົບກັນຢ່າງແໜ້ນແຟ້ນ ຢູ່ບັນດາເວທີປາໄສລັດຖະສະພາຫຼາຍຝ່າຍ, ປະກອບສ່ວນພັດທະນາການພົວພັນລະຫວ່າງສອງປະເທດ.

ສ່ວນທ່ານ Dato’ Johari Bin Abdul ຢືນຢັນວ່າ ມາເລເຊຍ ຍາມໃດກໍ່ຖືເປັນສຳຄັນການພົວພັນກັບ ຫວຽດນາມ, ປາດຖະໜາຢາກຮ່ວມມືຢ່າງແໜ້ນແຟ້ນກັບຫວຽດນາມ, ປະກອບສ່ວນເຂົ້າໃນການເພີ່ມທະວີສັນຕິພາບ, ມິດຕະພາບ ແລະ ສະຖຽນລະພາບ ຢູ່ພາກພື້ນອາຊີຕາເວັນອອກສ່ຽງໃຕ້, ຍົກສູງທີ່ຕັ້ງ ແລະ ບົດບາດຂອງອາຊຽນໃນພາກພື້ນ.

* ຕອນບ່າຍວັນດຽວກັນ, ຢູ່ສຳນັກງານລັດຖະສະພາມາເລເຊຍ, ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ມີການພົບປະກັບທ່ານ Dato' Awang Bemee Awang Ali Basah ປະທານສະພາສູງມາເລເຊຍ.

ທີ່ການພົບປະ, ທ່ານ Dato' Awang Bemee Awang Ali Basah ສະແດງຄວາມຊົມເຊີຍ ແລະ ຕີລາຄາສູງຕໍ່ເລື່ອງ 2 ປະເທດຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ; ເນັ້ນໜັກເຖິງຂະໜາດຂອງການພົວພັນໃໝ່ ສ່ອງແສງເຖິງການພັດທະນາຢ່າງແຂງແຮງ ແລະຕິດພັນຍຸດທະສາດລະຫວ່າງ 2 ປະເທດ, ມີຄວາມໝາຍສຳຄັນໃນໄລຍະທີ່ທັງ 2 ປະເທດ ກ້າວເຂົ້າສູ່ໄລຍະພັດທະນາໃໝ່.

ທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະທ່ານ  Dato’ Awang Bemee Awang Ali Basah ປະທານສະພາສູງມາເລເຊຍ. ພາບ: qdnd.vn

ທ່ານ ໂຕເລິມ ຮຽກຮ້ອງໃຫ້ລັດຖະສະພາມາເລເຊຍ ຕັ້ງໜ້າສະໜັບສະໜູນ ແລະ ຊຸກຍູ້ປະຕິບັດບັນດາທິດທາງການຮ່ວມມື ເຊິ່ງການນໍາສອງຝ່າຍ ໄດ້ເຫັນດີເປັນເອກະສັນ. ທ່ານ ໂຕເລິມ ສະເໜີໃຫ້ສອງຝ່າຍກວດກາຄືນ ແລະ ເຈລະຈາບັນດາຂໍ້ຕົກລົງການຮ່ວມມືໃໝ່ ເພື່ອແນໃສ່ສ້າງກຳລັງໜູນຢ່າງແຂງແຮງ ແລະ ສ້າງພື້ນຖານອັນໜັ້ກແໜ້ນໃຫ້ແກ່ການພົວພັນລະຫວ່າງສອງປະເທດໃນອະນາຄົດ. ທ່ານເລຂາທິການໃຫຍ່ ກໍ່ສະເໜີໃຫ້ລັດຖະສະພາມາເລເຊຍ ເອົາໃຈໃສ່, ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມ ທີ່ດຳລົງຊີວິດ ແລະ ເຮັດວຽກຢູ່ ມາເລເຊຍ; ຢືນຢັນວ່າ ຫວຽດນາມ ຈະຕັ້ງໜ້າສະໜັບສະໜູນ ມາເລເຊຍ ດໍາລົງບົດບາດປະທານອາຊຽນ 2025 ສໍາເລັດ. ທ່ານ Dato’ Awang Bemee Awang Ali Basah ເນັ້ນໜັກວ່າ ຈະພ້ອມກັບຫວຽດນາມ ແລະບັນດາປະເທດອາຊຽນອື່ນອີກ ສືບຕໍ່ປະກອບສ່ວນເຂົ້າໃນການຍົກສູງປະສິດທິຜົນການເຄື່ອນໄຫວ, ເສີມຂະຫຍາຍ ບົດບາດໃຈກາງຂອງອາຊຽນໃນສະພາບການໃໝ່.

ໂດຍ: ທູຈາງ