ປະທານປະເທດພົບປະນັກຮົບເກົ່າເສັ້ນທາງໂຮ່ຈີມິນ ເທິງທະເລ
ກປ.ອອນໄລ - ເນື່ອງໃນໂອກາດສະເຫຼີມສະຫຼອງ 60 ປີແຫ່ງວັນເປີດເສັ້ນທາງໂຮ່ຈີມິນ ເທິງທະເລ (23-10-1961 / 23-10-2021), ຕອນບ່າຍວັນທີ 19 ຕຸລາ, ທີ່ສໍານັກງານປະທານປະເທດ, ທ່ານປະທານປະເທດ ຫງວຽນຊວນຟຸກ ໄດ້ພົບປະຄະນະຜູ້ແທນນັກຮົບເກົ່າເສັ້ນທາງໂຮ່ຈີມິນ ເທິງທະເລ ແລະຜູ້ຕາງໜ້າພະນັກງານ, ນັກຮົບເຫຼົ່າທັບເຮືອ ທີ່ມີຜົນງານ, ວິລະກຳດີເດັ່ນ.
ກ່າວຄຳເຫັນທີ່ການພົບປະສັງສັນ, ທ່ານປະທານປະເທດ ຢັ້ງຢືນວ່າ ການເປີດເສັ້ນທາງໂຮ່ຈີມິນ ເທິງທະເລສະແດງໃຫ້ເຫັນວິໄສທັດຍຸດທະສາດ, ຫົວຄິດປະດິດສ້າງ, ຄວາມປີຊາສາມາດ, ສະຫຼາດສ່ອງໃສຂອງພັກ ແລະລຸງໂຮ່ ທີ່ແສນເຄົາລົບຮັກ. ນັ້ນແມ່ນສິ່ງມະຫັດສະຈັນໃນການຕໍ່ສູ້ຕ້ານສັດຕູຜູ້ຮຸກຮານຂອງຊາດຫວຽດນາມ. ເສັ້ນທາງໂຮ່ຈີມິນ ເທິງທະເລ ຊ່ວຍເຊື່ອມຕໍ່ແນວຫຼັງໃຫຍ່ຂອງພາກເໜືອກັບສະໜາມຮົບພາກໃຕ້ ແລະບໍລິເວນຫ່າງໄກສອກຫຼີກ, ຫຍຸ້ງຍາກ, ລຳບາກກາກກຳ ແລະດຸເດືອດທີ່ສຸດ. ສິ່ງນັ້ນປະກອບສ່ວນສຳຄັນເຂົ້າໃນການຍົກສູງຄວາມສາມາດສູ້ຮົບ, ພັດທະນາກຳລັງ, ສ້າງບາດກ້າວພັດທະນາໃໝ່ໃຫ້ແກ່ການປະຕິວັດພາກໃຕ້.
|
|
ທ່ານປະທານປະເທດ ຫງວຽນຊວນຟຸກ ກັບຜູ້ແທນທີ່ການພົບປະສັງສັນ. ພາບ: ຫາຍຮ່າ. |
ທີ່ການພົບປະສັງສັນ, ປະທານປະເທດ ປາດຖະໜາວ່າ ນັກຮົບເກົ່າແຕ່ລະສະຫາຍ ສືບຕໍ່ເສີມຂະຫຍາຍມູນເຊື້ອອົງອາດກ້າຫານ, ສະຫງ່າລາສີຂອງກອງກຳປັ່ນບໍ່ມີໝາຍເລກ ເພື່ອເປັນແບບຢ່າງທີ່ໃສແຈ້ງກ່ຽວກັບລັດທິວິລະຊົນປະຕິວັດ, ຂອງນ້ຳໃຈພິລະອາດຫານ, ເຈດຈຳນົງອັນແຮງກ້າ, ມານະພະຍາຍາມເຂົ້າຮ່ວມການກໍ່ສ້າງຄອບຄົວ, ບ້ານເກີດເມືອງນອນ, ປະເທດຊາດໃຫ້ນັບມື້ນັບຮັ່ງມີສວຍງາມກວ່າ.
ໂດຍ: ແສງເດືອນ