ກູບາ ຕີລາຄາສູງການສະໜັບສະໜູນອັນລໍ້າຄ່າຂອງຫວຽດນາມ
ກປ.ອອນໄລ - ວັນທີ 21 ກໍລະກົດ, ທີ່ການປະຊຸມຂ່າວໂດຍສະຖານທູດກູບາ ປະຈໍາ ຫວຽດນາມ ຈັດຕັ້ງຢູ່ຮ່າໂນ້ຍ, ທ່ານ Orlando Nicolás Hernández Guillén ເອກອັກຄະລັດຖະທູດກູບາ ຢັ້ງຢືນວ່າ ກູບາ ຍາມໃດກໍ່ຖືເປັນສໍາຄັນການພົວພັນມິດຕະພາບທີ່ເປັນມູນເຊື້ອແບບພິເສດ ແລະການຮ່ວມມືຮອບດ້ານກັບຫວຽດນາມ; ຕີລາຄາສູງຈິດໃຈສາມັກຄີ, ການສະໜັບສະໜູນອັນລໍ້າຄ່າຂອງພັກ, ລັດ, ລັດຖະບານ ແລະປະຊາຊົນຫວຽດນາມ ທີ່ມີຕໍ່ປະຊາຊົນກູບາ ໃນໄລຍະທີ່ປະເທດນີ້ປະສົບກັບຄວາມຫຍຸ້ງຍາກ.
    |
 |
|
ທ່ານ Orlando Nicolás Hernández Guillén ເອກອັກຄະລັດຖະທູດກູບາ ປະຈໍາ ຫວຽດນາມ ກ່າວຄໍາເຫັນທີ່ການປະຊຸມຂ່າວ. ພາບ: ສໍານັກຂ່າວສານຫວຽດນາມ. |
ທ່ານ Orlando Nicolás Hernández Guillén ໃຫ້ຮູ້ວ່າ ກູບາ ກໍາລັງປະສົບກັບຄວາມຫຍຸ້ງຍາກທີ່ສຸດໃນປະຫວັດສາດ 60 ປີແຫ່ງການປະຕິວັດຍ້ອນຜົນສະທ້ອນຈາກການປິດລ້ອມ, ຂວ້ຳບາດດ້ານເສດຖະກິດ ແລະຜົນສະທ້ອນໂດຍພະຍາດໂຄວິດ-19 ກໍ່ຂຶ້ນ. ເຖິງຢ່າງໃດກໍ່ຕາມ, ສະພາບການໄດ້ຮັບການຄວບຄຸມແລ້ວ. ທ່ານ Orlando Nicolás Hernández Guillén ຖືວ່າ ບັນດາອິດທິກໍາລັງທີ່ເປັນປໍລະປັກຈາກພາຍນອກໄດ້ສວຍໃຊ້ສະພາບພະຍາດ, ຍຸແຫຍ່ການກະທໍາໃຊ້ຄວາມຮຸນແຮງ; ພ້ອມທັງກ່າວປະນາມການໂຄສະນາທາງສັງຄົມອອນລາຍແນໃສ່ເສກສັນປັ້ນແຕ່ງ, ບິດເບືອນຄວາມຈິງກ່ຽວກັບສະພາບການຢູ່ປະເທດນີ້.
ເນື່ອງໃນໂອກາດນີ້, ທ່ານ Orlando Nicolás Hernández Guillén ເຕື້ອງເຖິງບູລິມະສິດຕ່າງໆແນໃສ່ຊຸກຍູ້ການພົວພັນມິດຕະພາບແບບພິເສດ, ຄວາມສາມັກຄີສະໜິດຕິດພັນ, ຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງສອງພັກ, ສອງລັດ ແລະປະຊາຊົນສອງປະເທດກູບາ-ຫວຽດນາມ, ໃນນັ້ນມີບັນຫາຮ່ວມມືໃນການສະໜອງ, ຖ່າຍທອດເຕັກໂນໂລຢີຜະລິດວັກຊິນ.
ໂດຍ: ຈາງຫງວຽນ