ໃນຈົດໝາຍ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ສະແດງຄວາມຂອບອົກຂອບໃຈຢ່າງຈິງໃຈ ແລະເລິກເຊິ່ງມາຍັງທ່ານ ຮຸນແຊນ ນາຍົກລັດຖະມົນຕີ, ລັດຖະບານ ແລະປະຊາຊົນລາຊະອານາຈັກກຳປູເຈຍ ທີ່ໄດ້ໜູນຊ່ວຍຢ່າງແທດຈິງ ແລະທັນການໃຫ້ອຳນາດການປົກຄອງ ແລະປະຊາຊົນນະຄອນໂຮ່ຈີມິນ, ປະກອບສ່ວນມີປະສິດທິຜົນເຂົ້າໃນວຽກງານປ້ອງກັນ, ຕ້ານພະຍາດໂຄວິດ-19 ຂອງນະຄອນໂຮ່ຈີມິນ ກໍ່ຄືຂອງຫວຽດນາມ. ທ່ານ ຟ້າມມິງຈິ໊ງ ເນັ້ນໜັກວ່າ ການກະທຳອັນສູງສົ່ງນີ້ຍິ່ງມີຄ່າກວ່າເມື່ອລັດຖະບານ ແລະປະຊາຊົນກຳປູເຈຍ ກໍ່ມານະພະຍາຍາມຮັບມືກັບໂລກລະບາດຢູ່ພາຍໃນປະເທດ, ເປັນການພິສູດໃຫ້ເຫັນນ້ຳໃຈມິດຕະພາບ, ຄວາມສາມັກຄີ ແລະມູນເຊື້ອ “ຊ່ວຍເຫຼືອກັນ” ອັນສູງສົ່ງເຊິ່ງສອງຊາດສະຫງວນໃຫ້ກັນ, ພິເສດເມື່ອແຕ່ລະປະເທດປະເຊີນໜ້າກັບຄວາມຫຍຸ້ງຍາກ, ສິ່ງທ້າທາຍ.

leftcenterrightdel
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ. ພາບ: ສຳນັກຂ່າວສານຫວຽດນາມ.

ທ່ານ ຟ້າມມິງຈິ໊ງ ສະແດງຄວາມຂອບອົກຂອບໃຈຕໍ່ຄວາມເອົາໃຈໃສ່ຂອງທ່ານ ຮຸນແຊນ ແລະລັດຖະບານລາຊະອານາຈັກກຳປູເຈຍ ທີ່ໄດ້ສະຫງວນໃຫ້ປະຊາຄົມຊາວຫວຽດນາມ ແລະຜູ້ທີ່ມີເຊື້ອສາຍຫວຽດນາມ ພວມດຳລົງຊີວິດ, ຮ່ຳຮຽນ ແລະເຮັດວຽກຢູ່ກຳປູເຈຍ ໃນວິວັດການຜັນຂະຫຍາຍນະໂຍບາຍຮັບມືກັບພະຍາດໂຄວິດ-19 ໃນໄລຍະຜ່ານມາ; ພ້ອມທັງສະແດງຄວາມເຊື່ອໝັ້ນວ່າ ດ້ວຍຄວາມຕັດສິນໃຈ ແລະການສົມທົບກັນລະຫວ່າງສອງລັດຖະບານ, ພ້ອມດ້ວຍການຮ່ວມແຮງຮ່ວມໃຈຂອງປະຊາຊົນສອງປະເທດ, ຫວຽດນາມ ແລະກຳປູເຈຍ ຈະເອົາຊະນະໂລກລະບາດໄດ້ໂດຍໄວເພື່ອຟື້ນຟູເສດຖະກິດ ແລະສືບຕໍ່ພັດທະນາແບບຍືນຍົງ.

ໂດຍ: ສົມເພັດ