ບັນດາສະຫາຍທີ່ໄດ້ຮັບການເລືອກຕັ້ງໃຫ້ດໍາລົງຕຳແໜ່ງການນຳປະທານປະເທດ, ສະພາແຫ່ງຊາດ ແລະລັດຖະບານລ້ວນແຕ່ມີປະສົບຜົນສຳເລັດດ້ວຍຄວາມມານະພະຍາຍາມ, ມີຫົວຄິດປະດິດສ້າງ ແລະຄວາມຮັບຜິດຊອບສູງໃນຕຳແໜ່ງ.

leftcenterrightdel
ສະພາແຫ່ງຊາດຫວຽດນາມ ສຳເລັດການແຕ່ງຕັ້ງບັນດາຕຳແໜ່ງການນຳຂອງກົງຈັກລັດ. ພາບ: ສໍານັກຂ່າວສານຫວຽດນາມ.

ໃນປີ 2016, ສະຫາຍ ເວືອງດິ່ງເຫ້ວ ເປັນຮອງນາຍົກລັດຖະມົນຕີ ພ້ອມດ້ວຍຄະນະປະຈໍາລັດຖະບານ ແລະຄະນະລັດຖະບານ ກໍ່ໄດ້ປະສົບຜົນສຳເລັດສຳຄັນເຮັດໃຫ້ເສດຖະກິດມະຫາພາກມີຄວາມໝັ້ນຄົງເຂັ້ມແຂງກວ່າເກົ່າ, ປະກອບສ່ວນເຮັດໃຫ້ ເສດຖະກິດເຕີບໂຕເຂັ້ມແຂງທີ່ສຸດໃນຮອບ 10 ປີທີ່ຜ່ານມາ ແລະແຜ່ຂະຫຍາຍຜົນສຳເລັດດ້ານເສດຖະກິດ ແລະແນວຄິດໃໝ່ ຕະຫລອດຮອດເຂດຊົນນະບົດ. ທ່ານຮອງນາຍົກລັດຖະມົນຕີ ເວືອງດິ່ງເຫ້ວ ໄດ້ມີການພົບປະຫລາຍຄັ້ງກັບຫລາຍກະຊວງ, ຂະແໜງການ ແລະທ້ອງຖິ່ນທີ່ກ່ຽວຂ້ອງເພື່ອຊອກຫາວິທີແກ້ໄຂປັບໂຄງສ້າງຂອງໜີ້ສາທາລະນະຄືນໃໝ່, ຫລຸດຜ່ອນອັດຕາສ່ວນໜີ້ສາທາລະນະ ແລະຄວາມກົດດັນໃນການຈ່າຍໜີ້; ເປັນເສນາທິການໃຫ້ແກ່ລັດຖະບານ ແລະສະພາແຫ່ງຊາດ ປະກາດໃຊ້ມະຕິສະບັບເລກ 42/2017/ສພຊ 14 ກ່ຽວກັບການແກ້ໄຂໜີ້ທວງຍາກຂອງເສດຖະກິດ, ປັບປຸງກົດໝາຍວ່າດ້ວຍສະຖາບັນສິນເຊື່ອ. ໂດຍສະເພາະແມ່ນ, ຜົນສຳເລັດຂອງການຄຸ້ມຄອງລາຄາພາຍໃຕ້ການຊີ້ນຳໂດຍກົງຂອງທ່ານຮອງນາຍົກ ລັດຖະມົນຕີ ເວືອງດິ່ງເຫ້ວ ຍິ່ງມີຄວາມໝາຍຍິ່ງກວ່າອີກໃນສະພາບການເຕີບໂຕ GDP ຂອງຫວຽດນາມ ມີການຂະຫຍາຍຕົວຢ່າງຕໍ່ເນື່ອງໃນ 4 ປີຜ່ານມາ. ຕະຫລອດໜຶ່ງປີທີ່ດໍາລົງຕໍາແໜ່ງເປັນເລຂາຄະນະພັກນະຄອນຫລວງຮ່າໂນ້ຍ, ດ້ວຍວິທີການເຮັດວຽກເວົ້າໜ້ອຍ, ເຮັດຫລາຍແຕ່ມີຄວາມຈິງຈັງ ແລະມີປະສິດທິຜົນຂອງສະຫາຍ ເວືອງດິ່ງເຫ້ວ ໄດ້ສ້າງການປ່ຽນແປງໃໝ່ໃນລະບົບການເມືອງ.

ສະຫາຍ ຫງວຽນຊວນຟຸກ ໄດ້ຖືກເລືອກຕັ້ງຈາກສະມາຊິກສະພາແຫ່ງຊາດ ເປັນນາຍົກລັດຖະມົນຕີ ໃນປີ 2016, ໃນກອງປະຊຸມຄັ້ງສຸດທ້າຍຂອງສະພາແຫ່ງຊາດຊຸດທີ XIII. ໃນໄລຍະດໍາລົງຕໍາແໜ່ງ 5 ປີທີ່ຜ່ານມາ, ສະຫາຍໄດ້ປະເຊີນໜ້າກັບຄວາມຫຍຸ້ງຍາກ ແລະສິ່ງທ້າທາຍຫລາຍຢ່າງ, ໂດຍສະເພາະແມ່ນການແຜ່ລະບາດຂອງພະຍາດໂຄວິດ-19 ທີ່ປະສົບເປັນຄັ້ງທໍາອິດ, ທ່ານນາຍົກລັດຖະມົນຕີ ຫງວຽນຊວນຟຸກ ດ້ວຍພາລະໜ້າທີ່ອັນສໍາຄັນຂອງຜູ້ເປັນຫົວໜ້າລັດຖະບານຫວຽດນາມ ຍາມໃດກໍ່ຢຶດໝັ້ນໃນຈິດໃຈວ່າຕ້ອງ “ເຮັດແທ້ທໍາຈິງ”, ເຊິ່ງເປັນກຸນແຈສຳລັບຄະນະລັດຖະບານ ແລະນາຍົກລັດຖະມົນຕີ ຊອກຫາໄດ້ມາດຕະການແກ້ໄຂສຳລັບຂໍ້ຫຍຸ້ງຍາກ ແລະຂໍ້ຄົງຄ້າງໃນໄລຍະດຳລົງຕຳແໜ່ງເມື່ອຫວນຄືນເບິ່ງ 5 ປີທີ່ຜ່ານມາ, ທ່ານນາຍົກລັດຖະມົນຕີ ຫງວຽນຊວນຟຸກ ແລະຄະນະລວມໝູ່ຂອງລັດຖະບານໄດ້ປະເຊີນ​​ໜ້າ ແລະເອົາຊະນະຄື້ນກະແສຟອງ ແລະ ຄວາມຜັນຜວນທີ່ໜ້າປະທັບໃຈທັງຢູ່ພາຍໃນ ແລະຕ່າງປະເທດ. ໂດຍສະເພາະ, ຫວຽດນາມ ຮັກສາໄດ້ລະດັບການເຕີບໂຕຢູ່ລະດັບສູງ, ຮັກສາສະຖຽນລະພາບດ້ານເສດຖະກິດມະຫາພາກແມ່ນບັນດາຂີດໝາຍເສດຖະກິດທີ່ພົ້ນເດັ່ນໃນສະໄໝການດຳລົງຕຳແໜ່ງຂອງທ່ານນາຍົກລັດຖະມົນຕີ ຫງວຽນຊວນຟຸກ. ບັນດາຜົນສຳເລັດຂອງຫວຽດນາມ ທີ່ຍາດມາໄດ້ເຊິ່ງຊ່ວຍຍົກສູງພາລະບົດບາດ ແລະຊື່ສຽງຂອງປະເທດຊາດໃນເວທີສາກົນ. ຕາມການຕີລາຄາຂອງຫລາຍອົງການຈັດອັນດັບສິນເຊື່ອສາກົນ, ການຈັດອັນດັບຂອງຫວຽດນາມ ນັບມື້ຍິ່ງໄດ້ຈັດຢູ່ໃນອັນດັບສູງ. ພາລະບົດບາດ ແລະຊື່ສຽງຂອງຫວຽດນາມ ທີ່ກ່າວມາຂ້າງເທິງນັ້ນແມ່ນຂີດໝາຍທີ່ສຳຄັນຂອງຜູ້ເປັນຫົວໜ້າລັດຖະບານ ກໍ່ຄືທ່ານນາຍົກລັດຖະມົນຕີ ຫງວຽນຊວນຟຸກ.

ໃນຖານະເປັນເລຂາຄະນະພັກແຂວງກວາງນິງ (2011-2015), ສະຫາຍ ຟ້າມມິນຈິ້ງ ໄດ້ປະສົບຜົນສຳເລັດຢ່າງຈົບງາມໃນຫລາຍດ້ານ. ທ່ານໄດ້ພະຍາຍາມຊຸກຍູ້ການປະຕິຮູບດ້ານບໍລິຫານຂອງແຂວງກວາງນິງ ຕາມສອງທິດ ຄື: ກ່ອນອື່ນໝົດແມ່ນປັບປຸງສະພາບແວດລ້ອມການຜະລິດ ແລະການດຳເນີນທຸລະກິດ, ການຮັບໃຊ້ວິສາຫະກິດ; ທີສອງແມ່ນການຮັບໃຊ້ປະຊາຊົນ ຕ້ອງໃຫ້ດີກວ່າເກົ່າ. ສະນັ້ນ, ການດໍາເນີນຂັ້ນຕອນປະກອບເອກະສານຕ່າງໆຂອງປະຊາຊົນ ແລະວິສາຫະກິດຢູ່ທີ່ນີ້ໄດ້ເຮັດໂດຍໄວ ແລະສະດວກຫລາຍຂຶ້ນ. ສິ່ງດັ່ງກ່າວໄດ້ພິສູດໃຫ້ເຫັນວ່າໃນຊຸມປີມໍ່ໆມານີ້, ແຂວງກວາງນິງ ຍາມໃດກໍ່ນອນໃນກຸ່ມ ບັນດາແຂວງນຳໜ້າໃນການປະຕິຮູບການບໍລິຫານລັດ. ໃນປີ 2019, ແຂວງນີ້ໄດ້ຈັດຢູ່ລະດັບທີໜຶ່ງໃນທົ່ວປະເທດກ່ຽວກັບດັດຊະນີຂອງການປະຕິຮູບດ້ານການບໍລິຫານ ແລະດັດສະນີຄວາມເພິ່ງພໍໃຈຂອງປະຊາຊົນ. ກວາງນິງ ກໍ່ແມ່ນທ້ອງຖິ່ນໜຶ່ງທີ່ກຳລັງດຶງດູດແຫລ່ງກຳລັງແຮງຈາກຄູ່ຮ່ວມມືພາກລັດ-ເອກະຊົນ ເພື່ອລົງທຶນເຂົ້າໃນການກໍ່ສ້າງພື້ນຖານໂຄງລ່າງເປັນຕົ້ນແມ່ນ: ສະໜາມບິນ, ທ່າເຮືອ, ທາງດ່ວນ. ນີ້ແມ່ນແຂວງທີ່ມີລະບົບ ພື້ນຖານໂຄງລ່າງທີ່ທັນສະໄໝຢ່າງຍິ່ງເມື່ອທຽບກັບຫລາຍທ້ອງຖິ່ນອື່ນ, ເປັນແຂວງທີ່ມີສະໜາມບິນທີ່ມີການລົງທຶນຂອງເອກະຊົນຄັ້ງທຳອິດຢູ່ຫວຽດນາມ; ມີທາງດ່ວນເຊື່ອມຕໍ່ລະຫວ່າງແຂວງຍາວທີ່ສຸດໃນປະເທດຫວຽດນາມ. ບັນດາຜົນສໍາເລັດໄດ້ຮັບໃນມື້ນີ້ແມ່ນມີການປະກອບສ່ວນທີ່ສໍາຄັນຂອງທ່ານເລຂາຄະນະພັກແຂວງ ຟ້າມມິນຈິ້ງ.

ທ່ານໄດ້ຮັບເລືອກຕັ້ງເປັນກຳມະການກົມການເມືອງ ແລະໄດ້ຮັບມອບໝາຍໃຫ້ດຳລົງຕຳແໜ່ງຫົວໜ້າຄະນະຈັດຕັ້ງສູນກາງໃນປີ 2016. ໃນພາລະບົດບາດໜ້າວຽກ “ສຳຄັນຂອງສິ່ງສຳຄັນ” ຂອງພັກກອມມູນິດຫວຽດນາມ, ຫລາຍກວ່າໜຶ່ງໄລຍະດໍາລົງຕໍາແໜ່ງຜ່ານມາ, ກໍ່ຍັງເປັນເວລາຂອງ "ການທົດສອບໄຟ” ເຊິ່ງແມ່ນເຕັມໄປດ້ວຍສິ່ງທ້າທາຍສຳລັບຂະແໜງການຈັດຕັ້ງພະນັກງານ ກໍ່ຄືທົ່ວພັກ, ທົ່ວລະບົບການເມືອງ. ພາຍຫລັງກວ່າ 2 ປີແຫ່ງການປະຕິບັດມະຕິເລກທີ 18 ແລະ 19 ຂອງຄະນະບໍລິຫານງານສູນກາງຊຸດທີ XII (ກ່ຽວກັບການຊັບຊ້ອນ ແລະຈັດຕັ້ງລະບົບກົນຈັກໃຫ້ກະທັດຮັດ ແລະມີປະສິດທິຜົນ; ຍົກສູງຄຸນນະພາບ ແລະປະສິດທິຜົນຂອງການດຳເນີນງານຂອງຫົວໜ່ວຍທຸລະກິດພາກລັດ), ລະບົບກົງຈັກມີຄວາມຄ່ອງແຄ້ວພໍ່ສົມຄວນ. ສະໄໝກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ ກໍ່ເປັນຂີດໝາຍອັນສຳຄັນຂອງທ່ານຫົວໜ້າຄະນະຈັດຕັ້ງສູນກາງ ຟ້າມມິນຈິ້ງ ໃນການເປັນເສນາທິການທີ່ເປັນຍຸດທະສາດກ່ຽວກັບການຄວບຄຸມສິດອຳນາດ, ຕ້ານກັບການແລ່ນຊື້ຈ້າງສິດ, ແລ່ນຊື້ຈ້າງຕໍາແໜ່ງໃນວຽກງານຈັດຕັ້ງພະນັກງານ. ສະຫາຍໄດ້ເປັນຜູ້ລິເລີ່ມ ແລະຊີ້ນໍາຢ່າງຕັ້ງໜ້າໃນການຈັດຕັ້ງ ແລະພັດທະນາລາງວັນໜັງສືພິມແຫ່ງຊາດກ່ຽວກັບການກໍ່ສ້າງພັກ (ລາງວັນຄ້ອນຕີກ້ຽວທອງ) ໃນໄລຍະ 5 ປີຜ່ານມາເຊິ່ງໄດ້ກາຍເປັນລາງວັນໜັງສືພິມທີ່ມີຊື່ສຽງ, ໄດ້ສ້າງ ແລະກໍາລັງສ້າງເປັນການແຜ່ຂະຫຍາຍ ແລະມີຜົນດີໃນສັງຄົມຢ່າງກວ້າງຂວາງ.

ກອງປະຊຸມສະໄໝສາມັນຄັ້ງສຸດທ້າຍຂອງສະພາແຫ່ງຊາດຊຸດທີ XIV ຂອງພັກກອມມູນິດຫວຽດນາມ ໄດ້ຖືກວ່າເປັນກອງປະຊຸມມອບຮັບລະຫວ່າງສອງໄລຍະຂອງສະພາແຫ່ງຊາດຊຸດທີ XIV ແລະສະພາແຫ່ງຊາດຊຸດທີ XV. ໂດຍການຮວບຮວມເລືອກຕັ້ງເອົາບັນດາຕຳແໜ່ງການນຳຂັ້ນສູງຂອງປະທານປະເທດ, ສະພາແຫ່ງຊາດ ແລະລັດຖະບານ, ບັນດາສະມາຊິກສະພາແຫ່ງຊາດຫວຽດນາມ ມີຄວາມຫວັງສູງຕໍ່ກົງຈັກການນຳຊຸດໃໝ່ຈະສືບຕໍ່ເສີມຂະຫຍາຍສະຕິປັນຍາ ແລະຄວາມສາມາດຂອງຕົນ ເພື່ອກ້າວຕໍ່ປະຕິບັດຕາມຜົນສຳເລັດຂອງໄລຍະກ່ອນ, ນຳພາປະເທດໃຫ້ນັບມື້ນັບພັດທະນາຍິ່ງຂຶ້ນ, ຫັນຄວາມມູ່ງມາດປາຖະໜາຢາກນຳພາປະເທດຫວຽດນາມ ໃຫ້ເຂັ້ມແຂງ ແລະຈະເລີນຮຸ່ງເຮືອງບົນຈິດໃຈມະຕິຂອງກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ ໃຫ້ປະກົດຜົນເປັນຈິງ.

ເນື້ອໃນ: ຂປລ