ກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ຈະດໍາເນີນແຕ່ວັນທີ 25 ມັງກອນ ຫາວັນທີ 2 ກຸມພາ ຢູ່ນະຄອນຫຼວງຮ່າໂນ້ຍ. ຫວ່າງມໍ່ໆມານີ້, ໃນບົດຂຽນທີ່ເອົາລົງໃນວາລະສານການເມືອງ “ໂລກທີ່ຫຼາຍຂົ້ວ” ຂອງລັດເຊຍ ດ້ວຍຫົວຂໍ້ວ່າ “ກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ - ຂີດໝາຍປະຫວັດສາດໃນຊີວິດການເປັນຢູ່ຂອງຊາວຫວຽດນາມ", ນັກຂ່າວ Pavel Vinogradov ຢັ້ງຢືນວ່າ, ພັກກອມມູນິດຫວຽດນາມ ແມ່ນຜູ້ນໍາພາ, ແມ່ນໂຄສົກໃຫ້ຄວາມມຸ່ງມາດປາດຖະໜາ ແລະຜົນປະໂຫຍດເປັນຕາຍຂອງປະຊາຊົນຫວຽດນາມ. ພັກກອມມູນິດຫວຽດນາມ ໂດຍປະທານໂຮ່ຈີມິນ ກໍ່ຕັ້ງ ແມ່ນກໍາລັງນໍາພາປະເທດຊາດເພື່ອຮັບປະກັນໄຊຊະນະໃຫ້ກິດຈະການກໍ່ສ້າງສັງຄົມແຫ່ງຄວາມຍຸຕິທໍາ, ປັບປຸງຄວາມໝັ້ນຄົງ ແລະປົກປັກຮັກສາປະເທດຊາດ.
ໃນບົດຂຽນດັ່ງກ່າວ, ນັກຂ່າວ Pavel Vinogradov ຊີ້ແຈ້ງວ່າ ຕໍ່ໜ້າບັນດາຜົນສະທ້ອນຈາກພະຍາດໂຄວິດ-19 ແລະໄພທໍາມະຊາດ, ລັດຖະບານຫວຽດນາມ ໄດ້ມານະພະຍາຍາມຟື້ນຟູເສດຖະກິດ, ປັບປຸງການດໍາລົງຊີວິດໃຫ້ແກ່ປະຊາຊົນ. ໃນການຕໍ່ສູ້ຕ້ານພະຍາດໂຄວິດ -19, ຫວຽດນາມ ໄດ້ກາຍເປັນແບບຢ່າງຂອງໂລກ. ຜົນສໍາເລັດຂອງຫວຽດນາມໃນການປ້ອງກັນ, ຕ້ານພະຍາດໄດ້ຮັບການຮັບຮູ້ຈາກປະຊາຄົມສາກົນ. ນອກຈາກນັ້ນ, ຫວຽດນາມຍັງແມ່ນໜຶ່ງໃນບັນດາປະເທດດຶງດູດການລົງທຶນຕ່າງປະເທດທີ່ສຸດໃນປັດຈຸບັນ. ບັນດານັກລົງທຶນຕ່າງປະເທດບໍ່ພຽງແຕ່ຖືກດຶງດູດຍ້ອນຄ່າແຮງງານຕໍ່າ ແລະມີສີມືແຮງງານສູງເທົ່ານັ້ນ, ຫາກຍັງຍ້ອນເງື່ອນໄຂ ແລະສະພາບແວດລ້ອມແຫ່ງການດໍາເນີນທຸລະກິດມີຄວາມສະດວກຢູ່ຫວຽດນາມ. ຕາມທ່ານ Vinogradov ແລ້ວ, ສື່ມວນຊົນໃນທົ່ວໂລກລ້ວນແຕ່ຊີ້ແຈ້ງຖານະບົດບາດນັບມື້ນັບສູງຂອງຫວຽດນາມໃນເວທີສາກົນ. ດ້ວຍຈຳນວນບັດສະໜັບສະໜູນສູງ (192/193 ບັດ), ຫວຽດນາມ ໄດ້ຮັບການຄັດເລືອກຕັ້ງເປັນສະມາຊິກບໍ່ຖາວອນ ຂອງສະພາຄວາມໝັ້ນຄົງ ສະຫະປະຊາຊາດ ອາຍຸການ 2020-2021. ສິ່ງດັ່ງກ່າວແມ່ນພະຍາຍຫຼັກຖານກ່ຽວກັບຄວາມເຄົາລົບ ແລະຄວາມໄວ້ວາງໃຈສູງຂອງປະຊາຄົມສາກົນຕໍ່ຫວຽດນາມ. ໃນຊຸມປີຜ່ານມາ, ນັບແຕ່ເມື່ອເຂົ້າເປັນສະມາຊິກ ສປຊ ໃນປີ 1977, ຫວຽດນາມ ໄດ້ສະແດງໃຫ້ເຫັນວ່າແມ່ນສະມາຊິກທີ່ຕັ້ງໜ້າ, ມີຄວາມຮັບຜິດຊອບໃນການແກ້ໄຂບັນດາບັນຫາທ່ົວໂລກ ແລະພາກພື້ນ. ເລື່ອງຫວຽດນາມ ເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ຢູ່ຊູດັງໃຕ້, ສ.ອາຟະລິກາກາງ ໄດ້ຮັບຄວາມຍ້ອງຍໍຊົມເຊີຍຈາກເພື່ອນມິດສາກົນ. ນະໂຍບາຍພົວພັນຕ່າງປະເທດ “ຫວຽດນາມ ເປັນເພື່ອນມິດ, ຄູ່ຮ່ວມມືທີ່ໄວ້້ເນື້ອເຊື່ອໃຈ, ສະມາຊິກທີ່ມີຄວາມຮັບຜິດຊອບຂອງປະຊາຄົມໂລກ” ກໍ່ໄດ້ສະແດງໃຫ້ເຫັນຢ່າງມີຊີວິດຊີວາໃນປີຜ່ານມາ ເມື່ອ ຫວຽດນາມດໍາລົງບົດບາດປະທານອາຊຽນ 2020.
    |
 |
|
ຕົວເມືອງທີ່ທັນສະໄໝຢູ່ເມືອງເກົ່າເຢີ໊ຍ, ນະຄອນຫຼວງຮ່າໂນ້ຍ ຈາກມູມສູງ. ພາບ: ຈ້ອງຫາຍ. |
ບັນດາໝາກຜົນທີ່ບັນລຸໄດ້ໃນໄລຍະຜ່ານມາໄດ້ພິສູດໃຫ້ເຫັນຄວາມຖືກຕ້ອງຂອງແນວທາງ ແລະຍຸດທະສາດຂອງພັກກອມມູ ນິດຫວຽດນາມ. ນັກຂ່າວ Vinogradov ເນັ້ນໜັກວ່າ, ໃນ 90 ກວ່າປີຜ່ານມາ, ນັບແຕ່ເມື່ອວັນສ້າງຕັ້ງມາຮອດປັດຈຸບັນ, ກອງປະຊຸມໃຫຍ່ຂອງພັກກອມມູນິດຫວຽດນາມ ຍາມໃດກໍ່ແມ່ນເຫດການທີ່ມີຄວາມໝາຍປະຫວັດສາດອັນໃຫຍ່ຫຼວງ, ຂີດໝາຍການເລີ່ມຕົ້ນໄລຍະໃໝ່ໃນການດໍາລົງຊີວິດສັງຄົມຂອງຫວຽດນາມ. ກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ຈະວາງອອກທິດທາງ, ໜ້າທີ່ໃຫ້ແກ່ໄລຍະ 2021-2026 ກໍຄືໄລຍະຮອດປີ 2030. ຕາມທ່ານ Vinogradov ແລ້ວ, ບັນດາລັດຖະນະໂຍບາຍ, ມະຕິ ເຊິ່ງກອງປະຊຸມໃຫຍ່ ຄັ້ງທີ XIII ວາງອອກຈະມີຄວາມໝາຍສໍາຄັນທີ່ສຸດຕໍ່ກັບປະເທດທີ່ກໍາລັງພັດທະນາຢ່າງຂະຫຍັນຂັນເຄື່ອນ, ດ້ວຍພົນລະເມືອງເກືອບ 100 ລ້ານຄົນ. ທ່ານ Vinogradov ໃຫ້ຂໍ້ສັງເກດວ່າ ກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ໄດ້ຮັບຄວາມຫວັງວ່າຈະສ້າງກໍາລັງໜູນຢ່າງແຮງໃຫ້ການພັດທະນາຂອງ ປະເທດຊາດໃນທຸກຂົງເຂດ.
ໃນເວັບໄຊ infox.ru, ທ່ານ Grigory Trofimchuk ປະທານສະພາຊ່ຽວຊານກອງທຶນໜູນຊ່ວຍການຄົ້ນຄ້ວາວິທະຍາສາດ “ແນວຄວາມຄິດອາຊີ-ເອີລົບ”, ນັກຊ່ຽວຊານໃນຂົງເຂດນະໂຍບາຍພົວພັນຕ່າງປະເທດ, ການປ້ອງກັນຊາດ ແລະປ້ອງກັນຄວາມສະຫງົບ ເນັ້ນໜັກວ່າ, ໃນຊຸມທົດສະວັດຜ່ານມາ, ຫວຽດນາມ ບັນລຸໄດ້ຜົນງານພົ້ນເດັ່ນຫຼາຍຢ່າງໃນທຸກຂົງເຂດ: ການເມືອງ, ການພັດທະນາເສດຖະກິດ-ສັງຄົມ... ພິເສດ, ໃນສະພາບພະຍາດໂຄວິດ-19 ທີ່ສົ່ງຜົນກະທົບຢ່າງຮ້າຍແຮງເຖິງທົ່ວໂລກນັ້ນ, ແຕ່ພື້ນຖານເສດຖະກິດຫວຽດນາມ ຍັງສືບຕໍ່ຈະເລີນເຕີບໂຕ. ສິ່ງດັ່ງກ່າວສະແດງໃຫ້ເຫັນຄວາມສາມາດຮັບມືຂອງ ຫວຽດນາມ ກໍຄືປະສິດທິຜົນຂອງບັນດາແຜນນະໂຍບາຍ ໂດຍພັກ ແລະລັດວາງອອກ. ທ່ານ Grigory Trofimchuk ໃຫ້ຂໍ້ສັງເກດວ່າ, ຫວຽດນາມ ບັນລຸບັນດາຜົນງານປະທັບໃຈຄືດັ່ງກ່າວແມ່ນຍ້ອນມີແນວທາງຍຸດທະວິທີ, ຍຸດທະສາດຂອງພັກກອມມູນິດຫວຽດນາມ. ເມື່ອວາງອອກແນວທາງ, ພັກກອມມູນິດຫວຽດນາມ ໄດ້ຄິດໄລ່ຊັ່ງຊາເຖິງການຜັນແປທຸກດ້ານໃນໂລກ, ພາກພື້ນ ແລະພາຍໃນປະເທດ ເພື່ອໃຫ້ມີການດັດປັບທີ່ຈໍາເປັນໃຫ້ແກ່ບັນດາໂຄງການ, ແຜນການໃນໄລຍະຍາວ. ທ່ານ Trofimchuk ຢັ້ງຢືນວ່າ, ເປົ້າໝາຍແທດຈິງ ແລະສໍາຄັນທີ່ສຸດ ເຊິ່ງ ພັກກອມມູນິດຫວຽດນາມ ມຸ່ງໄປເຖິງແມ່ນນໍາມາເຊິ່ງຊີວິດການເປັນຢູ່ທີ່ອີ່ມໜຳສຳລານ, ຄວາມຜາສຸກໃຫ້ແກ່ທົ່ວປວງຊົນ. ກອງປະຊຸມໃຫຍ່ 5 ປີເທື່ອໜຶ່ງ ແມ່ນຂີດໝາຍເປັນໜ້າສົນໃຈໃນວິວັດການພັດທະນາຂອງພັກກອມມູນິດຫວຽດນາມ. ກ້າວໄປເຖິງກອງປະຊຸມໃຫຍ່ ຄັ້ງທີ XIII, ຫວຽດນາມ ເອົາໃຈໃສ່ເປັນພິເສດເຖິງການຈັດຕັ້ງກອງປະຊຸມໃຫຍ່ຂອງພັກຢູ່ທຸກຂັ້ນ. ແລະເປົ້າໝາຍຂອງກອງປະຊຸມໃຫຍ່ ຄັ້ງທີ XIII ໃກ້ຈະມາເຖິງແມ່ນ ນໍາຫວຽດນາມ ກ້າວເຂົ້າສູ່ໄລຍະພັດທະນາໃໝ່.
ທ່ານ Trofimchuk ຢືນຢັນວ່າ, ບໍ່ພຽງແຕ່ປະຊາຊົນຫວຽດນາມເທົ່ານັ້ນ ຫາກຍັງປະເທດອື່ນໆ, ພິເສດແມ່ນບັນດາຄູ່ຮ່ວມມືຍຸດທະສາດຂອງຫວຽດນາມ ພວມຕັ້ງຄວາມຫວັງຫຼາຍຢ່າງຕໍ່ກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ. ໃນຂະນະນັ້ນ, ໃນບົດຂຽນ “ຫວຽດນາມ ກ່ອນທີ່ຈະດໍາເນີນເຫດການສໍາຄັນ - ກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ”, ວາລະສານ "ໂລກຫຼາຍຂົ້ວ” ໃຫ້ຂໍ້ສັງເກດວ່າ, ບັນດາພາຫະນະສື່ມວນຊົນໃນທົ່ວໂລກພວມເອົາໃຈໃສ່ເປັນພິເສດເຖິງເຫດການການເມືອງດັ່ງກ່າວຂອງຫວຽດນາມ. ຍ້ອນວ່າ, ປັດຈຸບັນ, ຫວຽດນາມມີທີ່ຕັ້ງ ແລະບົດບາດນັບມື້ນັບສູງບໍ່ພຽງແຕ່ຢູ່ໃນພາກພື້ນອາຊີ-ປາຊີຟິກ ເທົ່ານັ້ນ ຫາກຍັງໃນທ່ົວໂລກອີກດ້ວຍ.
ໂດຍ: ທູຈາງ