ກອງປະຊຸມລັດຖະມົນຕີອາຊຽນ ກ່ຽວກັບການປ້ອງກັນ, ຕ້ານອາດຊະຍາກໍາຂ້າມຊາດຄັ້ງທີ 14
ກປ.ອອນໄລ - ຕອນເຊົ້າວັນທີ 25 ພະຈິກ, ທີ່ຮ່າໂນ້ຍ, ກະຊວງຕໍາຫຼວດຫວຽດນາມ ໄດ້ຈັດຕັ້ງກອງປະຊຸມຂ່າວກ່ຽວກັບກອງປະຊຸມລັດຖະມົນຕີອາຊຽນ ກ່ຽວກັບການປ້ອງກັນ, ຕ້ານອາດຊະຍາກໍາຂ້າມຊາດ ຄັ້ງທີ 14 (AMMTC 14) ພາຍໃຕ້ການເປັນປະທານຂອງ ທ່ານພົນຈັດຕະວາ ເລເຕິ໋ນເຕິ໊ຍ ຮອງລັດຖະມົນຕີກະຊວງຕໍາຫຼວດຫວຽດນາມ, ຫົວໜ້າຄະນະຈັດຕັ້ງກອງປະຊຸມ.
ກອງປະຊຸມ AMMTC 14 ໄດ້ດໍາເນີນໃນລະຫວ່າງວັນທີ 25 – 26 ພະຈິກ ຜ່ານລະບົບທາງໄກ. ນີ້ແມ່ນເຫດການຮ່ວມມືສາກົນສໍາຄັນໂດຍກະຊວງຕໍາຫຼວດຫວຽດນາມ ເປັນປະທານໃນປີຫວຽດນາມ ເປັນປະທານອາຊຽນ 2020. ຕໍ່ໜ້າບັນດາສິ່ງທ້າທາຍຂອງພະຍາດໂຄວິດ-19 ເຖິງສຸຂະພາບຂອງປະຊາຄົມ ແລະການຄົມມະນາຄົມສາກົນ, ກະຊວງຕໍາຫຼວດຫວຽດນາມ ໄດ້ປຶກສາຫາລືກັບບັນດາປະເທດອາຊຽນ ແລະຕົກລົງເຫັນດີຈັດຂຶ້ນກອງປະຊຸມຜ່ານລະບົບທາງໄກຄັ້ງທໍາອິດໃນປະຫວັດສາດຂອງ AMMTC.
|
|
ທ່ານພົນຈັດຕະວາ ເລເຕິ໋ນເຕິ໊ຍ ຮອງລັດຖະມົນຕີກະຊວງຕໍາຫຼວດຫວຽດນາມ ກ່າວຄໍາເຫັນທີ່ກອງປະຊຸມ. ພາບ: ສໍານັກຂ່າວສານຫວຽດນາມ. |
ພິທີໄຂກອງປະຊຸມ AMMTC 14 ໄດ້ດໍາເນີນໃນວັນທີ 26 ພະຈິກ. ພາຍຫຼັງພິທີໄຂແມ່ນວາລະປະຊຸມຄົບຄະນະຂອງກອງປະຊຸມໂດຍທ່ານພົນເອກ ໂຕເລິມ ລັດຖະມົນຕີກະຊວງຕໍາຫຼວດຫວຽດນາມ (ຫົວໜ້າ AMMTC ຫວຽດນາມ) ເປັນປະທານ.
ກອງປະຊຸມ AMMTC 14 ໄດ້ຈັດຂຶ້ນເພື່ອແນໃສ່ປະຕິບັດພັນທະ ແລະຄວາມຮັບ ຜິດຊອບຂອງຫວຽດນາມ ໃນອາຊຽນ, ປະກອບສ່ວນເຂົ້າໃນຜົນສຳເລັດລວມຂອງປີປະທານອາຊຽນ 2020 ຂອງຫວຽດນາມ; ຢັ້ງຢືນບົດບາດ, ຄວາມຮັບຜິດຊອບສາກົນ, ຄຳໝັ້ນສັນຍາດ້ານການເມືອງຢ່າງແຮງ ແລະຄວາມເປັນເຈົ້າການ, ຕັ້ງໜ້າຂອງຫວຽດນາມ ໃນການຮ່ວມມືກັບສາກົນກ່ຽວກັບການປ້ອງກັນ, ຕ້ານອາດຊະຍາກຳຂ້າມຊາດ.
ໂດຍ: ທະນາພອນ