ຫວຽດນາມ ຮຽກຮ້ອງໃຫ້ປະຊາຄົມສາກົນໜູນຊ່ວຍປະຊາຊົນປາແລັດສະຕິນ ຜ່ານຜ່າວິກິດການ
ກປ.ອອນໄລ - ວັນທີ 26 ຕຸລາ, ສະພາຄວາມໝັ້ນຄົງສະຫະປະຊາຊາດ (ສປຊ) ໄດ້ຈັດກອງປະຊຸມປຶກສາຫາລືທາງໄກກ່ຽວກັບສະພາບການຢູ່ຕາເວັນອອກກາງ, ລວມມີບັນຫາປາແລັດສະຕິນ, ໂດຍພາຍໃຕ້ການເປັນປະທານຂອງທ່ານ Sergey Vershinin ຮອງລັດຖະມົນຕີການຕ່າງປະເທດລັດເຊຍ.
ກອງປະຊຸມມີການເຂົ້າຮ່ວມຂອງທ່ານ Nickolay Mladenov ຜູ້ປະສານງານພິເສດກ່ຽວກັບວິວັດທະນາການສ້າງສັນຕິພາບຢູ່ຕາເວັນອອກກາງ. ທ່ານ ດັ້ງມິງຄອຍ ຮອງລັດຖະມົນຕີກະຊວງການຕ່າງປະເທດຫວຽດນາມ ໄດ້ຕາງໜ້າໃຫ້ຫວຽດນາມ ເຂົ້າຮ່ວມກອງປະຊຸມ.
    |
 |
|
ທ່ານຮອງລັດຖະມົນຕີການຕ່າງປະເທດ ດັ້ງມິງຄອຍ ເຂົ້າຮ່ວມກອງປະຊຸມປຶກສາຫາລືທາງໄກ. ພາບ: ສໍານັກຂ່າວສານຫວຽດນາມ. |
ກ່າວຄໍາເຫັນທີ່ກອງປະຊຸມ, ທ່ານ ດັ້ງມິງຄອຍ ຮອງລັດຖະມົນຕີກະຊວງການຕ່າງປະເທດຫວຽດນາມ ໄດ້ຮຽກຮ້ອງໃຫ້ປະຊາຄົມສາກົນໜູນຊ່ວຍປະຊາຊົນ ປາແລັດສະຕິນ ພາຍໃຕ້ທຸກຮູບການເພື່ອຜ່ານຜ່າວິກິດການຫຼາຍທິດນີ້, ໃນນັ້ນໃຫ້ບຸລິມະສິດໜູນຊ່ວຍມະນຸດສະທໍາແກ່ກຸ່ມມີຄວາມສ່ຽງ, ດ້ອຍໂອກາດ, ພ້ອມທັງຍົກລະດັບການອຸປະຖໍາໃຫ້ແກ່ອົງການໜູນຊ່ວຍຂອງ ສປຊ; ຮຽກຮ້ອງໃຫ້ບັນດາຝ່າຍຈົ່ງລະງັບໃຈ, ຫຼຸດຜ່ອນຄວາມເຄັ່ງຕຶງ, ຢຸດຕິບັນດາການກະທໍາທີ່ໃຊ້ຄວາມຮຸນແຮງເພື່ອຜົນປະໂຫຍດຂອງສາມັນຊົນ; ທ່ານ ຖືວ່າບັນດາຄວາມກ້າວໜ້າກ່ຽວກັບວິວັດທະນາການດ້ານການເມືອງ ເປັນຕົ້ນແມ່ນການກະກຽມການເລືອກຕັ້ງ ປາແລັດສະຕິນ ບໍ່ອາດຈະຍືນຍົງໄດ້ ຖ້າຫາກບໍ່ມີຄໍາໝັ້ນສັນຍາສັນຕິພາບຂອງບັນດາຝ່າຍທີ່ກ່ຽວຂ້ອງ; ທ່ານ ກໍ່ຢັ້ງຢືນວ່າ ຫວຽດນາມ ສະໜັບສະໜູນບັນດາຄວາມມານະພະຍາຍາມ ແລະຂໍ້ລິເລີ່ມເພື່ອແນໃສ່ບັນລຸໄດ້ມາດຕະການຮອບດ້ານ, ຍຸຕິທໍາ ແລະຍາວນານໃຫ້ແກ່ບັນຫາປາແລັດສະຕິນ, ໂດຍອີງໃສ່ບັນດາຫຼັກການພື້ນຖານຂອງກົດໝາຍສາກົນ ແລະບັນດາມະຕິທີ່ກ່ຽວຂ້ອງຂອງສະພາຄວາມໝັ້ນຄົງ ແລະ ສປຊ.
ເນື່ອງໃນໂອກາດນີ້, ທ່ານຮອງລັດຖະມົນຕີ ດັ້ງມິງຄອຍ ກໍ່ສະແດງຄວາມສາມັກຄີຂອງຫວຽດນາມ ທີ່ມີຕໍ່ການຕໍ່ສູ້ທີ່ເປັນທໍາຂອງປະຊາຊົນປາແລັດສະຕິນ ມຸ່ງໄປເຖິງການສ້າງຕັ້ງລັດປາແລັດສະຕິນ ເອກະລາດ ພ້ອມກັນຍືນຍົງຄົງຕົວໃນສັນຕິພາບກັບລັດອິດສະຣາແອັນ ທີ່ຢູ່ລຽບຕາມເສັ້ນຊາຍແດນກ່ອນປີ 1967 ແລະກັບນະຄອນຫຼວງແມ່ນ Jerusalem ຕາເວັນອອກ.
ໂດຍ: ໄຊຊະນະ