ນາຍົກລັດຖະມົນຕີຫວຽດນາມ ພົບປະກັບນາຍົກລັດຖະມົນຕີໄທ
ກປ.ອອນໄລ - ຕອນຄໍ່າວັນທີ 2 ພະຈິກ, ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ພົບປະກັບທ່ານ ປຣະຢຸດ ຈັນໂອຊາ ນາຍົກລັດຖະມົນຕີໄທ, ທີ່ການພົບປະທ່ານ ຫງວຽນຊວນຟຸກປາດຖະໜາຢາກໃຫ້ສອງປະເທດສົມທົບກັນຢ່າງແໜ້ນແຟ້ນ ເພື່ອແນໃສ່ຊຸກຍູ້ການພົວພັນຄູ່ຮ່ວມມືຍຸດທະສາດຫວຽດນາມ-ໄທ ໃຫ້ກ້າວເຂົ້າສູ່ລວງເລິກ ແລະມີປະສິດທິຜົນ, ຜັນຂະຫຍາຍບັນດາກົນໄກຮ່ວມມື, ຊຸກຍູ້ການຮ່ວມມືດ້ານການຄ້າ ແລະການລົງທຶນ, ແຮງງານ, ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ.
|
|
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ພົບປະກັບທ່ານ ປຣະຢຸດ ຈັນໂອຊາ ນາຍົກລັດຖະມົນຕີໄທ. ພາບ: baochinhphu.vn. |
ບົນຈິດໃຈໜູນຊ່ວຍເຊິ່ງກັນ ແລະກັນ, ທ່ານ ຫງວຽນຊວນຟຸກ ສະເໜີໃຫ້ໄທ ເອົາໃຈໃສ່ສ້າງເງື່ອນໄຂສະດວກໃຫ້ແກ່ສິນຄ້າຫວຽດນາມ ໄດ້ຈໍາໜ່າຍຢູ່ຕະຫຼາດໄທ, ເອົາໃຈໃສ່ໜູນຊ່ວຍປະຊາຄົມຊາວຫວຽດນາມ ອາໄສຢູ່ປະເທດໄທ ມີຄວາມອຸ່ນອຽນໃຈດໍາລົງຊີວິດ, ທໍາມາຫາກິນ, ເຊື່ອມຕົວເຂົ້າກັບສັງຄົມໄທ.
ທ່ານ ປຣະຢຸດ ຈັນໂອຊາ ກໍ່ສະເໜີໃຫ້ສອງປະເທດເພີ່ມທະວີການສົມທົບແກ້ໄຂບັນດາບັນຫາທີ່ມີຜົນກະທົບລວມຕໍ່ອາຊຽນ, ຄື: ມົນລະພິດທາງອາກາດ, ຄວາມໝັ້ນຄົງຂອງແຫຼ່ງນໍ້າ, ໂດຍສະເພາະແມ່ນຊອກຫາມາດຕະການເພີ່ມທະວີວົງເງິນການຄ້າ, ຂະໜາດລົງທຶນ, ເປີດປະຕູຕະຫຼາດ, ສ້າງເງື່ອນໄຂໃຫ້ແກ່ວິສາຫະກິດແຕ່ລະປະເທດດໍາເນີນທຸລະກິດຢ່າງສະດວກ. ການນໍາສອງປະເທດໄດ້ເຫັນດີເປັນເອກະພາບເພີ່ມທະວີການສົມທົບກັນຢ່າງແໜ້ນແຟ້ນເພື່ອບັນລຸໄດ້ບັນດາເປົ້າໝາຍລວມໃນການກໍ່ສ້າງປະຊາຄົມອາຊຽນ, ເພີ່ມທະວີບົດບາດເປັນໃຈກາງຂອງອາຊຽນ, ຊຸກຍູ້ການພົວພັນກັບບັນດາປະເທດຄູ່ຮ່ວມມື, ແກ້ໄຂບັນດາບັນຫາຄວາມໝັ້ນຄົງຢູ່ພາກພື້ນ, ໃນນັ້ນມີບັນຫາທະເລຕາເວັນອອກ.
ໂດຍ: ໄຊນີດາ