ໄຂກອງປະຊຸມຂັ້ນສູງ ຄັ້ງທີ 18 ຂະບວນການບໍ່ຮ່ວມກຸ່ມ
ກປ.ອອນໄລ - ຕອນເຊົ້າວັນທີ 25 ຕຸລາ, ທີ່ສູນປະຊຸມສາກົນບາກູ, ອາແຊກໄບຢານ, ກອງປະຊຸມຂັ້ນສູງ ຄັ້ງທີ 18 ຂອງຂະບວນການບໍ່ຮ່ວມກຸ່ມ ໄດ້ໄຂຂຶ້ນຢ່າງເປັນທາງການ. ດ້ວຍຫົວຂໍ້ “ຍົກສູງບັນດາຫຼັກການ Bangdung ເພື່ອແນໃສ່ຮັບມື ແລະສົມທົບກັນກຳຈັດສິ່ງທ້າທາຍຂອງໂລກໃນປັດຈຸບັນ ຢ່າງຄົບຖ້ວນ”, ກອງປະຊຸມຂັ້ນສູງບາກູ ຄັ້ງນີ້ມີການເຂົ້າຮ່ວມຂອງການນໍາຂັ້ນສູງ ແລະຜູ້ຕາງໜ້າ 120 ປະເທດສະມາຊິກຂະບວນການບໍ່ຮ່ວມກຸ່ມ, ຜູ້ຕາງໜ້າບັນດາປະເທດສັງເກດການ ແລະບັນດາອົງການຈັດຕັ້ງສາກົນ.
ກ່າວຄໍາເຫັນໄຂກອງປະຊຸມ, ທ່ານ Ilham Aliyev ປະທານາທິບໍດີ ອາແຊກໄບຢານ ຢັ້ງຢືນວ່າ, ດ້ວຍຖານະເປັນປະທານຂະບວນການບໍ່ຮ່ວມກຸ່ມໃນ 3 ປີຕໍ່ໜ້າ, ອາແຊກໄບຢານ ຈະເຄົາລົບ ແລະຊຸກຍູ້ຄໍາໝັ້ນສັນຍາຂອງຂະບວນການສໍາລັບບັນດາຫຼັກການ Bangdung ຢ່າງແຂງແຮງ, ໂດຍສະເພາະແມ່ນເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ບໍ່ແຊກແຊງເຂົ້າວຽກງານພາຍໃນຂອງບັນດາປະເທດ, ແກ້ໄຂການຂັດແຍ່ງສາກົນໂດຍສັນຕິວິທີ... ທ່ານປະທານາທິບໍດີ Aliyev ກໍໃຫ້ຄໍາໝັ້ນສັນຍາວ່າຈະຊຸກຍູ້ການພົວພັນຮ່ວມມືໃນຂົງເຂດເສດຖະກິດ, ພັດທະນາລະຫວ່າງບັນດາປະເທດສະມາຊິກຂະບວນການບໍ່ຮ່ວມກຸ່ມດ້ວຍກັນ, ເພີ່ມທະວີການເຈລະຈາກັບບັນດາລະບອບຫຼາຍຝ່າຍ, ຊຸກຍູ້ຜົນປະໂຫຍດລວມຂອງບັນດາປະເທດສະມາຊິກຂະບວນການບໍ່ຮ່ວມກຸ່ມຢູ່ສະຫະປະຊາຊາດ...
|
|
ຕອນບ່າຍວັນທີ 25 ຕຸລາ 2019 (ຕາມເວລາທ້ອງຖິ່ນ) ທີ່ບາກູ, ອາແຊກໄບຢານ, ທ່ານນາງ ດັ້ງທິງອັກທິ້ງ ຮອງປະທານປະເທດຫວຽດນາມ ເຂົ້າຮ່ວມ ແລະກ່າວຄໍາເຫັນທີ່ກອງປະຊຸມຂັ້ນສູງ ຄັ້ງທີ 18 ຂະບວນການບໍ່ຮ່ວມກຸ່ມ. ພາບ: ສໍານັກຂ່າວສານຫວຽດນາມ. |
ທ່ານນາງ ດັ້ງທິງອັກທິ້ງ ຮອງປະທານປະເທດ ນໍາໜ້າຄະນະຜູ້ແທນຫວຽດນາມ ໄປເຂົ້າຮ່ວມ ແລະມີບົດກ່າວປາໄສສໍາຄັນທີ່ກອງປະຊຸມ. ກ່ອນໜ້ານັ້ນ, ຕອນບ່າຍວັນທີ 24 ຕຸລາ, ທີ່ນະຄອນຫຼວງບາກູ, ອາແຊກໄບຢານ, ທ່ານນາງຮອງປະທານປະເທດ ດັ້ງທິງອັກທິ້ງ ໄດ້ເປັນປະທານພິທີສະເຫຼີມສະຫຼອງ 60 ປີແຫ່ງວັນປະທານໂຮ່ຈີມິນ ໄປຢ້ຽມຢາມ ອາແຊກໄບຢານ. ເຂົ້າຮ່ວມພິທີສະເຫຼີມສະຫຼອງມີຄະນະຜູ້ແທນຫວຽດນາມ, ການນໍາກະຊວງການຕ່າງປະເທດ ແລະກະຊວງພະລັງງານອາແຊກໄບຢານ, ບັນດາຊ່ຽວຊານດ້ານນໍ້າມັນອາຍແກັດພ້ອມດ້ວຍເພື່ອນມິດ, ຊ່ຽວຊານອາແຊກໄບຢານ ທີ່ເຄີຍດໍາລົງຊີວິດ ແລະເຮັດວຽກຢູ່ຫວຽດນາມ ເຂົ້າຮ່ວມຢ່າງຫຼວງຫຼາຍ.
ໂດຍ: ໄຊຊະນະ