ເຈົ້າໜ້າທີ່ອາວຸໂສ ກູບາ - ຣັດເຊຍ ໃຫ້ສັນຍາຊຸກຍູ້ການຮ່ວມມື
ລັດຖະມົນຕີການຕ່າງປະເທດກູບາ ບຣູໂນ ໂຣດຣີເກສ ພາຣີລາ ໄດ້ຕ້ອນຮັບທ່ານ ວາລາດີເມຍ ຕີຕອບ ຮອງລັດຖະມົນຕີການຕ່າງປະເທດຣັດເຊຍ ທີ່ຢູ່ລະຫວ່າງການຢ້ຽມຢາມ ແລະເຮັດວຽກຢູ່ກູບາ ເມື່ອບໍ່ດົນມານີ້.
ໃນການພົບປະດັ່ງກ່າວ ທັງສອງຝ່າຍໄດ້ຍົກໃຫ້ເຫັນເຖິງການພົວພັນແບບສອງຝ່າຍລະຫວ່າງຣັດເຊຍ ກັບກູບາ ທີ່ດີງາມໃນປັດຈຸບັນ. ພ້ອມກັນນັ້ນກໍ່ສະແດງຄວາມພ້ອມໃນການສືບຕໍ່ເພີ່ມທະວີການພົວພັນທາງດ້ານການເມືອງ, ການທູດ, ເສດຖະກິດ, ການຄ້າ. ໃນຂະນະດຽວກັນສອງຝ່າຍກໍ່ໄດ້ປຶກສາຫາລືກັນກ່ຽວກັບສະພາບການໃນປັດຈຸບັນ ແລະແບ່ງປັນຫຼັກໝັ້ນທີ່ມີຕໍ່ບັນດາບັນຫາທີ່ສັບສົນຂອງສາກົນ ແລະພາກພື້ນ.
ກ່ອນໜ້ານັ້ນ, ທ່ານ ຕີຕອບ ໄດ້ພົບປະກັບຮອງລັດຖະມົນຕີການຕ່າງປະເທດກູບາ ມາເຊລີໂນ ເມດີນາ ກົງຊາເລສ. ໃນນັ້ນ, ຝ່າຍກູບາ ໄດ້ສະແດງຄວາມຮູ້ບຸນຄຸນຕໍ່ຄວາມສະໜັບສະໜູນຂອງຣັດເຊຍ ທີ່ມີຕໍ່ກູບາ ໃນການຕ້ານກັບຄຳສັ່ງປິດລ້ອມທາງດ້ານເສດຖະກິດ-ການຄ້າ ແລະການເງິນ ຊຶ່ງ ອາເມຣິກາ ປະຕິບັດຕໍ່ກູບາ ໃນຫຼາຍທົດສະວັດທີ່ຜ່ານມາ.
ຂ່າວ: ວຽງຈັນໃໝ່