ອັງກິດ-ນູແວນເຊລັງ ລົງນາມຂໍ້ຕົກລົງ “ຮັບຮູ້ຊຶ່ງກັນແລະກັນ” ຫຼັງ BREXIT
ວັນທີ 21 ມັງກອນນີ້ ອັງກິດ ແລະນູແວນເຊລັງ ໄດ້ລົງນາມຂໍ້ຕົກລົງວ່າດ້ວຍການ “ຮັບຮູ້ຊຶ່ງກັນແລະກັນ” ເພື່ອຫຼຸດຜ່ອນຜົນກະທົບຈາກການທີ່ອັງກິດຖອນອອກຈາກສະຫະພາບເອີຣົບ ຫຼືທີ່ເອີ້ນວ່າ Brexit ທີ່ອາດຈະເກີດຂຶ້ນກັບການຄ້າລະຫວ່າງສອງຝ່າຍ.
ຂໍ້ຕົກລົງດັ່ງກ່າວໄດ້ຮັບການລົງນາມໃນໂອກາດທີ່ນາຍົກລັດຖະມົນຕີນູແວນເຊລັງ ຈາຊິນດາ ອາກເດນ ຢ້ຽມຢາມອັງກິດ ກ່ອນທີ່ຈະເດີນທາງໄປເຂົ້າຮ່ວມເວທີປາໄສເສດຖະກິດໂລກ ທີ່ດາວົສ (ປະເທດສະວິດ). ໃນເວລາຢູ່ຢ້ຽມຢາມອັງກິດນັ້ນ ນາງ ອາກເດນ ໄດ້ພົບປະກັບນາຍົກລັດຖະມົນຕີອັງກິດ ເຕເຣຊາເມ.
    |
 |
|
ທ່ານນາງ ເຕເຣຊາເມ ນາຍົກລັດຖະມົນຕີອັງກິດ ແລະທ່ານນາງ ຈາຊິນດາ ອາກເດນ ນາຍົກລັດຖະມົນຕີນູແວນເຊລັງ. ພາບ: The West Australian. |
ຂໍ້ຕົກລົງດັ່ງກ່າວລະບຸວ່າບັນດາຄວາມຕ້ອງການໃນດ້ານນິຕິກຳ ສຳລັບບັນດາຜູ້ປະກອບການສົ່ງອອກສິນຄ້າຈະບໍ່ຖືກປ່ຽນແປງໃນໄລຍະຫຼັງ Brexit ກ່ອນທີ່ສອງປະເທດຈະບັນລຸຂໍ້ຕົກລົງການຄ້າເສລີແບບສອງຝ່າຍ. ຂໍ້ຕົກລົງນີ້ຄ້າຍຄືກັນກັບຂໍ້ຕົກລົງ ທີ່ອັງກິດ ແລະອົດສະຕຣາລີ ໄດ້ລົງນາມຮ່ວມກັນເມື່ອທ້າຍອາທິດທີ່ຜ່ານມາ.
ປັດຈຸບັນນີ້ ອັງກິດ ເປັນໜຶ່ງໃນບັນດາຄູ່ຄ້າລາຍໃຫຍ່ແບບສອງຝ່າຍຂອງນູແວນເຊລັງ. ໃນປີ 2015 ນູແວນເຊລັງ ໄດ້ນຳເຂົ້າສິນຄ້າ ແລະການບໍລິການຈາກອັງກິດ ເປັນມູນຄ່າ 1,34 ຕື້ໂດລາສະຫະລັດ.
ຂ່າວ: ວຽງຈັນໃໝ່