ອາຣັບບີ ຊາອູດິດ ປະຕິເສດ “ຂໍ້ຕົກລົງສະຕະວັດ” ໂດຍ ອາເມລິກາ ສະເໜີ
ກປ.ອອນໄລ - ໜັງສືພິມ Haaretz ຂອງ ອິດສະຣາແອນ ລົງວັນທີ 1 ສິງຫາໄດ້ເປີດເຜີຍວ່າໃນຈົດໝາຍຂອງເຈົ້າກະສັດ ອາຣັບບີ ຊາອູດິດ Salman bin Abdulaziz ທີ່ສົ່ງເຖິງທຳນຽບຂາວ, ໃນນັ້ນໃຫ້ຮູ້ວ່າ, Riyadh ໄດ້ແຈ້ງໃຫ້ອໍານາດການປົກຄອງຂອງປະທານາທິບໍດີອາເມລິກາ Donald Trump ຮັບຊາບວ່າ, ປະເທດນີ້ຈະບໍ່ສາມາດສະໜັບສະໜູນແຜນການສັນຕິພາບລະຫວ່າງ ອິດສະຣາແອນ ແລະປາແລດສະຕິນ ເຊິ່ງໄດ້ສື່ມວນຊົນເອີ້ນວ່າ “ຂໍ້ຕົກລົງສະຕະວັດ” ຖ້າວ່າຂໍ້ຕົກລົງນີ້ບໍ່ເຕື້ອງເຖິງເລື່ອງ Jerusalem ຕາເວັນອອກແມ່ນນະຄອນຫຼວງຂອງລັດ ປາແລດສະຕິນ.
ໜັງສືພິມດັ່ງກ່າວເນັ້ນໜັກວ່າ “ເຈົ້າກະສັດ Salman bin Abdulaziz ສະແດງທ່າທີສະໜັບສະໜູນຕໍ່ຫຼັກໝັ້ນຂອງ ປາແລດສະຕິນ ແລະຮັບປະກັນກັບວົງການການນໍາ Arab ວ່າລາຊະອານາຈັກນີ້ຍັງເຄົາລົບຂໍ້ລິເລີ່ມສັນຕິພາບ Arab 2002, ຕາມນັ້ນແລ້ວຈຶ່ງກໍານົດການສ້າງຕັ້ງລັດປາແລດສະຕິນ ໂດຍອີງໃສ່ບັນດາເສັ້ນຊາຍແດນປີ 1967, ມີນະຄອນຫຼວງແມ່ນ Jerusalem ຕາເວັນອອກ”.
|
|
ປະທານາທິບໍດີອາເມລິກາ Donald Trump ພົບປະກັບທ່ານ Mahmoud Abbas ປະທານາທິບໍດີປາແລດສະຕິນ. ພາບ: Reuters. |
ໜັງສືພິມ Haaretz ໃຫ້ຂ່າວຕື່ມອີກວ່າ, ເຈົ້າກະສັດ Salman bin Abdulaziz ກໍ່ປະກາດໃຊ້ຄໍາສັ່ງດ່ວນເພື່ອຈັດແບ່ງເງິນຈຳນວນ 80 ລ້ານໂດລາສະຫະລັດໃຫ້ອໍານາດການປົກຄອງລັດປາແລດສະຕິນ ເພື່ອທົດແທນບັນດາຄວາມເສຍຫາຍເມື່ອ ອາເມລິກາ ຕັດເງິນຊ່ວຍເຫຼືອ.
ແປໂດຍ: ໄຊນີດາ