ຍີ່ປຸ່ນຢືນຢັນຄືນໃນການສະໜັບສະໜູນ ໃຫ້ແກ່ການປັບປຸງ ໂຄງລ່າງຊົນລະປະທານ ໃນອ່າງແມ່ນໍ້າຂອງ
ຂປລ. ລັດຖະບານຢີ່ປຸ່ນ ໄດ້ຢືນຢັນຄືນ ໃນການສະໜັບສະໜູນ ຕໍ່ຄະນະກຳມາທິການແມ່ນໍ້າຂອງສາກົນ (ຄມສ) ໃນການສືບຕໍ່ກິດຈະກຳ ພາຍໃຕ້ໂຄງການກ່ຽວກັບການປັບປຸງໂຄງລ່າງຊົນລະປະທານ ໃນບັນດາປະເທດອ່າງແມ່ນໍ້າຂອງຕອນລຸ່ມ, ເຊິ່ງລວມມີ ກຳປູເຈຍ, ສປປ ລາວ, ຣາຊະອານາຈັກໄທ ແລະ ສສ.ຫວຽດນາມ.
ໃນກອງປະຊຸມ ລະຫວ່າງ ຫົວໜ້າກອງເລຂາຄະນະກຳມາທິການ ແມ່ນໍ້າຂອງສາກົນ ແລະ ຜູ້ຕາງໜ້າກະຊວງກະສິກຳ, ປ່າໄມ້ ແລະ ການປະມົງ ຂອງປະເທດ ຢີ່ປຸ່ນ ໃນວັນທີ 5 ກໍລະກົດ 2018 ທີ່ນະຄອນຫລວງວຽງຈັນ, ປະເທດຢີ່ປຸ່ນ ໄດ້ສະເໜີການສະໜັບສະໜູນ ໃຫ້ກັບໂຄງການດັ່ງກ່າວ ແລະ ບັນດາກິດຈະກຳ ທີ່ກ່ຽວຂ້ອງທີ່ກຳລັງດຳເນີນຢູ່ ເຊິ່ງຕ້ອງການງົບປະມານຈຳນວນ 1,4 ລ້ານໂດລາສະ ຫະລັດ ໃນການຈັດຕັ້ງປະຕິບັດ. ໃນໄລຍະເວລາ 4 ປີ ຂອງໂຄງການແຕ່ປີ 2017- 2021, ລັດຖະບານຢີ່ປຸ່ນ ຈະສຸມໃສ່ການປັບປຸງໂຄງລ່າງຊົນລະປະທານ ທີ່ເປັນມິດກັບການເຄື່ອນຍ້າຍຂອງປາ ເຊິ່ງຈະມີກິດຈະກຳທີ່ກ່ຽວກັບການຕິດຕັ້ງ ໂຄງລ່າງຊົນລະປະທານ, ຕິດຕາມການປ່ຽນແປງ ການນຳໃຊ້ທີ່ດິນກະສິກຳ, ປັບປຸງຖານຂໍ້ມູນຊົນລະປະທານຂອງ ຄມສ ແລະ ສະໜັບສະໜູນການນຳໃຊ້ ນໍ້າໃຕ້ດິນທີ່ຍືນຍົງ ແລະ ການຄຸ້ມຄອງການຜະລິດພືດ ໃນທົ່ວອ່າງຕອນລຸ່ມ.
|
|
ອ່າງແມ່ນໍ້າຂອງ. ພາບ: nature.org.vn. |
ການສະໜັບສະໜູນດັ່ງກ່າວ, ແມ່ນສອດຄ່ອງກັບແຜນຍຸດທະສາດຂອງ ຄມສ ສົກປີ 2016–2020 ເຊິ່ງແນໃສ່ຕອບສະໜອງຄວາມຕ້ອງການ ໃນອະນາຄົດ ຂອງອ່າງແມ່ນໍ້າຂອງ ໃນການຂະຫຍາຍຊົນລະປະທານ ແລະ ຮັບມືກັບສິ່ງທ້າທາຍ ໃນການນໍາໃຊ້ນໍ້າໃນອ່າງແມ່ນໍ້າ ຂອງຕອນລຸ່ມໃຫ້ຍືນຍົງ.
ທ່ານ ຟາມ ຕວນ ພານ ຫົວໜ້າກອງເລຂາ ຄະນະກຳມາທິການແມ່ນໍ້າຂອງສາກົນ ກ່າວວ່າ: ການສະໜັບສະໜູນຂອງລັດຖະບານຢີ່ປຸ່ນ ຈະຊ່ວຍສ້າງວິທີການທີ່ມີປະສິດທິພາບ ໃນການວາງແຜນຊົນລະປະທານ ແລະ ຊຸກຍູ້ ການປັບປຸງຊີວິດການເປັນຢູ່ ແລະ ຫລຸດຜ່ອນຜົນກະທົບທາງສິ່ງແວດ ລ້ອມຈາກຊົນລະປະທານໃນອ່າງແມ່ນໍ້າຂອງ. ລັດຖະບານຢີ່ປຸ່ນແມ່ນຄູ່ຮ່ວມພັດທະນາ ຫລັກໜຶ່ງຂອງ ຄມສ ໂດຍນັບແຕ່ປີ 2001 ເປັນຕົ້ນມາ, ລັດຖະບານຢີ່ປຸ່ນ ໄດ້ໃຫ້ທຶນຊ່ວຍເຫລືອລ້າ ຫລາຍກວ່າ 13 ລ້ານໂດລາສະຫະລັດ ໃຫ້ກັບຫລາຍໂຄງການ, ລວມທັງວຽກງານການຄຸ້ມຄອງນໍ້າ ຖ້ວມ ແລະ ແຫ້ງ ແລ້ງ, ຊົນລະປະທານ, ການເດີນເຮືອ, ການປ່ຽນແປງດິນຟ້າອາກາດ ແລະ ການຄຸ້ມຄອງສິ່ງແວດ ລ້ອມ. ພາຍໃຕ້ການສະໜັບສະໜູນທາງດ້ານການເງິນໃນປັດຈຸບັນ, ປະເທດຢີ່ປຸ່ນເຊື່ອໝັ້ນວ່າຈະສາມາດສ້າງຄວາມເຂັ້ມແຂງ ໃຫ້ກັບການພັດທະນາເສດຖະກິດ ໂດຍຜ່ານວຽກງານກະສິກຳ ແລະ ຊົນລະປະທານ ທີ່ເປັນແຫລ່ງລາຍຮັບຫລັກ ແລະ ແຫ່ລງສະບຽງອາຫານຂອງຄົນຫລາຍລ້ານຄົນ.
ທ່ານ ຫິດາຟູມິ ມູຣາຊິຕະ ຮອງຫົວໜ້າ ຫ້ອງການຮ່ວມມືປັບປຸງທີ່ດິນ ໃນຕ່າງປະເທດຂອງກະຊວງກະສິກຳ, ປ່າໄມ້ ແລະ ການປະມົງ ຂອງຍີ່ປຸ່ນ ກ່າວວ່າ: ການຫລຸດຜ່ອນຄວາມທຸກຍາກ ໂດຍການປັບປຸງຊົນລະປະທານ ແມ່ນວັດຖຸປະສົງຫລັກ ຂອງການຮ່ວມມືດ້ານການພັດທະນາ ຂອງລັດຖະບານຢີ່ປຸ່ນ. ພວກເຮົາສະໜັບສະໜູນ ຄມສ ໃນຂົງເຂດວຽກງານດັ່ງກ່າວ ກໍຍ້ອນວ່າພວກເຮົາເຊື່ອ ວ່າວຽກງານກະສິກຳແມ່ນປັດໄຈຫລັກ ໃນການຫລຸດຜ່ອນຄວາມທຸກຍາກ.
ທ້າຍເດືອນຜ່ານມາ, ລັດຖະບານຢີ່ປຸ່ນ ແລະ ຄມສ ໄດ້ເລີ່ມຈັດຕັ້ງປະຕິບັດການສຶກສາ ກ່ຽວກັບການອະນຸລັກປ່າໄມ້ ແລະ ການຄຸ້ມຄອງອ່າງແມ່ນໍ້າ ໃນອ່າງແມ່ນໍ້າຂອງຕອນລຸ່ມ ເພື່ອເຮັດໃຫ້ການຄຸ້ມຄອງ ແລະ ອະນຸລັກ ສະພາບແວດລ້ອມຂອງອ່າງດີຂຶ້ນ. ການສຶກສາດັ່ງກ່າວ ກວມເອົາ 5 ປະເທດໃນອ່າງແມ່ນໍ້າຂອງ ເຊິ່ງລວມມີກໍາປູເຈຍ, ສປປ ລາວ, ຣາຊະອານາຈັກໄທ, ສສ. ຫວຽດນາມ, ມຽນມາ ແລະ ຄາດວ່າຈະສຳເລັດ ໃນເດືອນມີນາ 2019.
ເນື້ອໃນ: ຂປລ