ອັງກິດ ເນລະເທດນັກການທູດລັດເຊຍ ຫຼາຍຄົນ
ກປ.ອອນໄລ - ກໍລະນີການວາງຢາເບື່ອນັກສືບຂ່າວສອງຝ່າຍຊາວລັດເຊຍ Sergei Skripal ສືບຕໍ່ພາໃຫ້ການພົວພັນລະຫວ່າງອັງກິດ ແລະລັດເຊຍ ເພີ່ມຄວາມເຄັ່ງຕຶງ.
ວັນທີ 14 ມີນາ, ພາຍຫຼັງບັນດາຄໍາກ່າວເຕືອນ, ທ່ານນາງ Theresa May ນາຍົກລັດຖະມົນຕີ ອັງກິດ ໄດ້ເນລະເທດນັກການທູດລັດເຊຍ ປະຈໍາ ອັງກິດ ຈໍານວນ 23 ຄົນ ແລະຢຸດຕິການເຄື່ອນໄຫວພົບປະທາງການທູດຂັ້ນສູງກັບ ລັດເຊຍ ຢ່າງເປັນທາງການ.
ກ່າວຄໍາເຫັນຕໍ່ສະພາແຫ່ງຊາດ ອັງກິດ, ທ່ານນາງ Theresa May ນາຍົກລັດຖະມົນຕີອັງກິດ ໃຫ້ຮູ້ວ່າ, ລັດເຊຍ ບໍ່ມີປະຕິກິລິຍາໃດຕໍ່ຂໍ້ສະເໜີຂອງທ່ານນາງ Theresa May ວ່າຮຽກຮ້ອງຕ້ອງອະທິບາຍກ່ຽວກັບເລື່ອງສານເຄມີແຕ່ສະໄໝສະຫະພາບ ໂຊວຽດ ທີ່ມີຊື່ວ່າ Novichok ເຊິ່ງໄດ້ກວດພົບໃນກໍລະນີວາງຢາເບື່ອນັກສືບຂ່າວສອງຝ່າຍຊາວລັດເຊຍ Sergei Skripal. ສະນັ້ນ, ນັກການທູດລັດເຊຍຈໍານວນ 23 ຄົນ ເຊິ່ງ ອັງກິດ ຖືວ່າເປັນນັກສືບຂ່າວຈະຕ້ອງອອກຈາກປະເທດ ອັງກິດ ໃນໄລຍະເວລາ 1 ອາທິດ.
|
|
ຕາມທ່ານນາງ Theresa May ນາຍົກລັດຖະມົນຕີ ອັງກິດ ແລ້ວ, ນັກການທູດ ລັດເຊຍ ຈໍານວນ 23 ຄົນ ເຊິ່ງ ອັງກິດ ຖືວ່າເປັນນັກສືບຂ່າວຈະຕ້ອງອອກຈາກປະເທດ ອັງກິດ ໃນໄລຍະເວລາ 1 ອາທິດ. ພາບ: CBC. |
ຕໍ່ໜ້າຂໍ້ຕົກລົງດັ່ງກ່າວຂອງ ອັງກິດ, ກະຊວງການຕ່າງປະເທດລັດເຊຍ ໃຫ້ຮູ້ວ່າໄດ້ຮັບບັນຊີລາຍຊື່ພາລະກອນຖືກເນລະເທດ ແລະຈະມີມາດຕະການຕອບໂຕ້ທີ່ເໝາະສົມໂດຍໄວ. ກ່ອນໜ້ານັ້ນ, ສະຖານທູດລັດເຊຍ ປະຈໍາ ອັງກິດ ປະກາດວ່າຂໍ້ຕົກລົງຂອງອັງກິດໃນການເນລະເທດບັນດານັກການທູດ ລັດເຊຍ ແມ່ນ “ບາດກ້າວທີ່ບໍ່ມອງກວ້າງເຫັນໄກ, ບໍ່ເໝາະສົມ ແລະບໍ່ສາມາດຮັບຮູ້ໄດ້”.
ໃນການປະຊຸມດ່ວນຂອງສະພາຄວາມໝັ້ນຄົງ ສະຫະປະຊາຊາດ ທີ່ດໍາເນີນໃນວັນດຽວກັນ, ທ່ານ Vassily Nebenzia ເອກອັກຄະລັດຖະທູດ ລັດເຊຍ ປະຈໍາ ສະຫະປະຊາຊາດ ກໍ່ຢືນຢັນວ່າການສົງໄສຂອງ ອັງກິດ "ແມ່ນບໍ່ສາມາດຮັບຮູ້ໄດ້”, ພ້ອມທັງຮຽກຮ້ອງໃຫ້ອັງກິດ ຍົກອອກພະຍານຫຼັກຖານຖືກຕ້ອງຊັດເຈນ. ທ່ານຢືນຢັນວ່າບໍ່ສາມາດກ່າວຫາ ລັດເຊຍ ຢືນຫຼັງກໍລະນີວາງຢາເບື່ອດັ່ງກ່າວໂດຍບໍ່ມີຫຼັກຖານໄດ້.
ແປໂດຍ: ຮວ່າງເຈື່ອງ