ຫວຽດນາມ ໃຫ້ຄໍາໝັ້ນສັນຍາສືບຕໍ່ມານະພະຍາຍາມຊຸກຍູ້ ແລະປົກປ້ອງສິດທິມະນຸດ
ກປ.ອອນໄລ - ວັນທີ 22 ມັງກອນ, ທີ່ສໍານັກງານສະຫະປະຊາຊາດຢູ່ເຊີແນວ, ປະເທດສະວິດ, ຄະນະຜູ້ແທນຫວຽດນາມ ໂດຍທ່ານ ເລຮວ່າຍຈູງ, ຮອງລັດຖະມົນຕີກະຊວງການຕ່າງປະເທດຫວຽດນາມ ນໍາໜ້າໄດ້ເຂົ້າຮ່ວມວາລະເຈລະຈາກ່ຽວກັບບົດລາຍງານແຫ່ງຊາດຂອງຫວຽດນາມ ພາຍໃຕ້ກົນໄກທົບທວນປະຈໍາໄລຍະດ້ານສິດທິມະນຸດ (UPR) ໄລຍະທີ III ຂອງສະພາສິດທິມະນຸດສະຫະປະຊາຊາດ.
ກ່າວຄໍາເຫັນທີ່ການເຈລະຈາ, ທ່ານ ເລຮວ່າຍຈູງ ຢືນຢັນວ່າ ຫວຽດນາມ ຮັບຮູ້ການທົບທວນຕາມກົນໄກ UPR ແມ່ນການປະຕິບັດພັນທະຂອງປະເທດສະມາຊິກທີ່ມີຄວາມຮັບຜິດຊອບຂອງສະຫະປະຊາຊາດ, ພ້ອມທັງແມ່ນກາລະໂອກາດເພື່ອແນະນໍາກັບປະຊາຄົມສາກົນນະໂຍບາຍສະເໝີຕົ້ນສະເໝີປາຍ, ມານະພະຍາຍາມ ແລະຜົນງານກ່ຽວກັບການປົກປ້ອງ ແລະຊຸກຍູ້ສິດທິມະນຸດຢູ່ຫວຽດນາມ, ເຈລະຈາກັບບັນດາຄູ່ຮ່ວມມືສາກົນເພື່ອຊຸກຍູ້ການຮ່ວມມືສາກົນໃນຂົງເຂດສິດທິມະນຸດ.
|
|
ທ່ານ ເລຮວ່າຍຈູງ, ຮອງລັດຖະມົນຕີກະຊວງການຕ່າງປະເທດຫວຽດນາມ. ພາບ: ສໍານັກຂ່າວສານຫວຽດນາມ. |
ກອງປະຊຸມ UPR ກ່ຽວກັບຫວຽດນາມໄດ້ຮັບຄວາມເອົາໃຈໃສ່ສູງຈາກປະເທດຕ່າງໆດ້ວຍ 122 ປະເທດ ເຂົ້າຮ່ວມກອງປະຊຸມ ແລະກ່າວຄໍາເຫັນ. ບັນດາປະເທດໄດ້ຮັບຮູ້ບັນດານະໂຍບາຍ, ຄວາມມານະພະຍາຍາມ ແລະຜົນງານຂອງຫວຽດນາມ ໃນການຮັບປະກັນສິດທິມະນຸດ, ປະຕິບັດບັນດາຂໍ້ສະເໜີແນະ UPR ຢ່າງເຂັ້ມງວດ, ເປັນຕົ້ນແມ່ນໃນຂົງເຂດເສດຖະກິດ, ສັງຄົມ, ວັດທະນະທຳ, ຮັບປະກັນຊີວິດສັງຄົມ, ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ ແລະສິດຂອງແມ່ຍິງ, ເດັກນ້ອຍ, ຄົນພິການ, ຄົນຊົນເຜົ່າສ່ວນໜ້ອຍ...
ກຸ່ມປະຕິບັດງານກ່ຽວກັບ UPR ຈະປະຊຸມໃນຕອນບ່າຍວັນທີ 25 ມັງກອນ ເພື່ອພິຈາລະນາຮັບຮອງເອົາບົດລາຍງານກ່ຽວກັບຜົນການທົບທວນ UPR ສໍາລັບຫວຽດນາມ ຍື່ນສະເໜີຕໍ່ສະພາສິດທິມະນຸດສະຫະປະຊາຊາດ ຮັບຮອງເອົາຢ່າງເປັນທາງການໃນເດືອນມິຖຸນາ 2019.
ໂດຍ: ຄໍາແພງ