ງານວາງສະແດງທ່ອງທ່ຽວ ຈີນ-ອາຊຽນ
ງານວາງສະແດງທ່ອງທ່ຽວ ຈີນ-ອາຊຽນ (China-ASEAN EXPO Tourism Exhibition) ໄດ້ຈັດຂຶ້ນທີ່ ກຸຍຫຼິນ ສປ ຈີນ ໃນລະຫວ່າງວັນທີ 25-28 ຕຸລານີ້ ເຂົ້າຮ່ວມງານດັ່ງກ່າວມີບັນດາຫົວໜ່ວຍທຸລະກິດທ່ອງທ່ຽວ ສປ ຈີນ, ອາຊຽນ ແລະ ຜູ້ຊື້-ຜູ້ຂາຍຈາກທົ່ວໂລກ ລວມມີ 800 ຮ້ານ ຊຶ່ງເປັນງານຕະຫຼາດທ່ອງທ່ຽວທີ່ສຳຄັນ ສຳລັບຮ້ານວາງສະແດງຄັ້ງນີ້ ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວລາວ ກໍ່ໄດ້ເຂົ້າຮ່ວມ.
ຄະນະຜູ້ແທນລາວນຳໂດຍທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວວັດທະນະທຳ ແລະທ່ອງທ່ຽວແຫ່ງ ສປປ ລາວ ໄດ້ຮັບກຽດເປັນແຂກກິດຕິມະສັກຂຶ້ນກ່າວມີຄຳເຫັນຕໍ່ພິທີເປີດງານວາງສະແດງການທ່ອງທ່ຽວຈີນ-ອາຊຽນ ຊຶ່ງໄດ້ຍົກໃຫ້ເຫັນນະໂຍບາຍຂອງພັກ-ລັດຖະບານ ສປປ ລາວ ໂດຍຖືເອົາວຽກງານທ່ອງທ່ຽວເປັນຂະແໜງການບຸລິມະສິດໜຶ່ງທີ່ສຳຄັນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.
|
|
ພາບປະກອບຄັດຈາກ: kpl.gov.la. |
ລັດຖະບານ ສປປ ລາວ ໄດ້ປະກາດໃຫ້ປີ 2018 ເປັນປີທ່ອງທ່ຽວລາວ ຈຳນວນນັກທ່ອງທ່ຽວກໍ່ໄດ້ເພີ່ມຂຶ້ນ ໃນ 6 ເດືອນຕົ້ນປີນີ້ ນັກທ່ອງທ່ຽວສາກົນມາທ່ຽວລາວ 2 ລ້ານກວ່າຄົນເພີ່ມຂຶ້ນ 6% ຖ້າທຽບໃສ່ໄລຍະດຽວກັນຂອງປີ 2017 ໃນນັ້ນນັກທ່ອງທ່ຽວຈີນ ເຂົ້າມາທ່ຽວລາວ 4 ແສນກວ່າຄົນ ເພີ່ມຂຶ້ນ 50% ສຳລັບປີ 2019 ຈະຈັດຕັ້ງສົ່ງເສີມປີທ່ອງທ່ຽວລາວ-ຈີນ ພວກເຮົາວາງຄາດໝາຍສູ້ຊົນໄວ້ວ່າ ປີ 2019 ຈະໄດ້ຕ້ອນຮັບນັກທ່ອງທ່ຽວຈີນ ປະມານ 1 ລ້ານຄົນ ສະນັ້ນກໍ່ຂໍເຊີນຊວນບັນດານັກທ່ອງທ່ຽວຈີນ ກໍ່ຄື ນັກທ່ອງທ່ຽວຈາກທົ່ວໂລກມາທ່ຽວປະເທດລາວ.
ນອກນັ້ນຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມສຳມະນາໃນຫົວຂໍ້ກອງປະຊຸມສຳມະນາກ່ຽວກັບການທ່ອງທ່ຽວອະນາຄົດຂອງການທ່ອງທ່ຽວໄປສູ່ປີ 2030 “The Future of Tourism Road to 2030” ຊຶ່ງຈັດຂຶ້ນໂດຍກະຊວງວັດທະນະທຳ ແລະທ່ອງທ່ຽວ ສປ ຈີນ ຮ່ວມກັບອົງການທ່ອງທ່ຽວໂລກ (UNWTO) ແລະສະມາຄົມການທ່ອງທ່ຽວພາກພື້ນອາຊີ-ປາຊີຟິກ (PATA) ກອງປະຊຸມດັ່ງກ່າວ ຍັງໄດ້ຍົກໃຫ້ເຫັນຄວາມສຳຄັນຂອງວຽກງານພັດທະນາຜະລິດຕະພັນທ່ອງທ່ຽວທີ່ມີຄຸນະພາບ ບັນຫາສິ່ງແວດລ້ອມບຸກຄະລາກອນການທ່ອງທ່ຽວ ແລະເຕັກໂນໂລຊີ ຕື່ມອີກ.
ໂດຍ: ວຽງຈັນໃໝ່