ອາຊຽນ-ຈີນ ບັນລຸຂໍ້ຕົກລົງກ່ຽວກັບ “ເອກະສານໜຶ່ງດຽວ” ໃນການເຈລະຈາ COC
ກປ.ອອນໄລ - ຕາມນັກຂ່າວສໍານັກຂ່າວສານຫວຽດນາມ ປະຈຳ ສິງກະໂປ, ສະມາຄົມປະຊາຊາດອາຊີຕາເວັນອອກສ່ຽງໃຕ້ (ASEAN) ແລະຈີນ ໄດ້ບັນລຸຂໍ້ຕົກລົງ “ເອກະສານໜຶ່ງດຽວ” ໃນການເຈລະຈາກ່ຽວກັບກົດແຫ່ງການປະພຶດຢູ່ທະເລຕາເວັນອອກ (COC), ເຊິ່ງແມ່ນບາດກ້າວສໍາຄັນເພື່ອມຸ່ງໄປເຖິງການຮັດແຄບຊ່ອງຫວ່າງຄວາມແຕກຕ່າງກັນລະຫວ່າງຝ່າຍຕ່າງໆ.
ກ່າວຄໍາເຫັນທີ່ກອງປະຊຸມລັດຖະມົນຕີອາຊຽນ-ຈີນ, ທ່ານ Vivian Balakrishnan ລັດຖະມົນຕີການຕ່າງປະເທດສິງກະໂປ ຖະແຫຼງວ່ານີ້ແມ່ນ “ຂີດໝາຍສໍາຄັນ” ໃນວິິວັດທະນາການ COC, ນັບແຕ່ກອງປະຊຸມບັນດາເຈົ້າໜ້າທີ່ອາວຸໂສອາຊຽນ-ຈີນ ກ່ຽວກັບການປະຕິບັດຖະແຫຼງການແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ທີ່ດໍາເນີນຢູ່ຈີນ ໃນເດືອນມິຖຸນາ 2018.
|
|
ທ່ານ Vivian Balakrishnan ລັດຖະມົນຕີການຕ່າງປະເທດສິງກະໂປ. ພາບ: ສໍານັກຂ່າວສານຫວຽດນາມ. |
ຕາມທ່ານ Vivian Balakrishnan, ນີ້ຈະແມ່ນເອກະສານພື້ນຖານໃຫ້ບັນດາການເຈລະຈາ COC ໃນອະນາຄົດ ແລະສອງຝ່າຍກໍ່ໄດ້ເຫັນດີເປັນເອກະພາບຕໍ່ບັນດາແບບວິທີຕົ້ນຕໍໃຫ້ແກ່ບັນດາການເຈລະຈາ COC ໃນໄລຍະຈະມາເຖິງ.
ທ່ານ Vivian Balakrishnan ໃຫ້ຮູ້ວ່າຈີນ ແມ່ນໜຶ່ງໃນບັນດາຄູ່ຮ່ວມມືຂອງອາຊຽນ ແລະທັງສອງຝ່າຍໄດ້ບັນລຸຜົນງານຫຼາຍຢ່າງໃນສາມປີຜ່ານມາ, ດ້ວຍການຮ່ວມມືປັບປຸງດ້ວຍບັນດາສາຍສຳພັນດ້ານເສດຖະກິດຢ່າງແຮງ.
ເຖິງຢ່າງໃດກໍ່ຕາມ, ທ່ານກໍ່ເນັ້ນໜັກວ່າວິວັດການຮ່ວມມືລະຫວ່າງສອງຝ່າຍພຽງແຕ່ອີງໃສ່ພື້ນຖານແຫ່ງຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ພ້ອມກັນແກ້ໄຂບັນດາຄວາມແຕກຕ່າງກັນໂດຍສັນຕິວິທີ ແລະຕາມຈິດໃຈເຈດຕະນາດີ.
ແປໂດຍ: ທູຈາງ