ປຶກສາຫາລືວຽກງານກະກຽມໃຫ້ແກ່ກອງປະຊຸມ WEF ASEAN
ກປ.ອອນໄລ - ວັນທີ 7 ມິຖຸນາ, ທີ່ສໍານັກງານກະຊວງການຕ່າງປະເທດຫວຽດນາມ ໄດ້ດໍາເນີນການປະຊຸມຄັ້ງທີ 2 ຄະນະຈັດຕັ້ງກອງປະຊຸມເວທີປາໄສເສດຖະກິດໂລກກ່ຽວກັບອາຊຽນປີ 2018 (WEF ASEAN 2018) ພາຍໃຕ້ການເປັນປະທານຂອງທ່ານ ບຸ່ຍແທງເຊີນ ຮອງລັດຖະມົນຕີຜູ້ປະຈໍາການກະຊວງການຕ່າງປະເທດ, ຫົວໜ້າຄະນະຈັດຕັ້ງ ເພື່ອປຶກສາຫາລື, ກວດກາຄືນວຽກງານກະກຽມທຸກດ້ານໃຫ້ແກ່ກອງປະຊຸມ WEF ASEAN.
|
|
ບັນດາສະມາຊິກໃນຄະນະຈັດຕັ້ງ ແລະຜູ້ຕາງໜ້າບັນດາກະຊວງ, ຂະແໜງການ ແລະທ້ອງຖິ່ນທີ່ກ່ຽວຂ້ອງເຂົ້າຮ່ວມການປະຊຸມ. ພາບ: baoquocte.vn. |
ກ່າວຄໍາເຫັນທີ່ການປະຊຸມ, ທ່ານຮອງລັດຖະມົນຕີຜູ້ປະຈໍາການ ບຸ່ຍແທງເຊີນ ເນັ້ນໜັກວ່າ, ການນໍາພັກ ແລະລັດ ເອົາໃຈໃສ່, ຖືເປັນສໍາຄັນຄວາມໝາຍຫຼາຍດ້ານຂອງກອງປະຊຸມ WEF ASEAN, ຕີລາຄາວ່ານີ້ແມ່ນໜຶ່ງໃນບັນດາການເຄື່ອນໄຫວພົວພັນຕ່າງປະເທດສໍາຄັນຂອງປະເທດໃນປີ 2018.
ກອງປະຊຸມ WEF ASEAN ປີ 2018 ພາຍໃຕ້ຫົວຂໍ້ “ນໍ້າໃຈວິສາຫະກິດ ແລະການປະຕິວັດອຸດສາຫະກໍາຄັ້ງທີ 4” ຈະດໍາເນີນແຕ່ວັນທີ 11-13 ກັນຍາ 2018 ທີ່ຫໍປະຊຸມແຫ່ງຊາດ. ກອງປະຊຸມຄາດຄະເນມີປະມານ 55 ວາລະປະຊຸມຈະສຸມໃສ່ປຶກສາຫາລືກ່ຽວກັບບັນດາກາລະໂອກາດ, ຜົນປະໂຫຍດກໍ່ຄືບັນດາບັນຫາການປະຕິວັດອຸດສາຫະກໍາ 4.0 ທີ່ວາງອອກໃຫ້ແກ່ບັນດາປະເທດອາຊຽນ, ບັນດາແນວຄວາມຄິດ, ນະໂຍບາຍປຸກລຸກນໍ້າໃຈເລີ່ມທຸລະກິດ, ຊຸກຍູ້ການພັດທະນາຢ່າງຂະຫຍັນຂັນເຄື່ອນ, ປະດິດສ້າງ ແລະຍົກສູງກຳລັງແກ່ງແຍ້ງຂອງບັນດາປະເທດອາຊຽນ ໃນການປະຕິວັດອຸດສາຫະກໍາ 4.0.
ແປໂດຍ: ຮວ່າງເຈື່ອງ