ອາຊຽນ ແລະອົດສະຕາລີ ລົງນາມໃນບົດບັນທຶກຊ່ວຍຈໍາກ່ຽວກັບການຮ່ວມມືຕ້ານການກໍ່ການຮ້າຍສາກົນ
ກປ.ອອນໄລ - ໃນຂອບເຂດກອງປະຊຸມສຸດຍອດພິເສດອາຊຽນ ແລະອົດສະຕາລີ ພວມດໍາເນີນຢູ່ນະຄອນ Sydney, ຕອນບ່າຍວັນທີ 17 ມີນາ, ບັນດາເຈົ້າໜ້າທີ່ຕາງໜ້າອົດສະຕາລີ ແລະບັນດາປະເທດຂຶ້ນກັບສະມາຄົມປະຊາຊາດອາຊີຕາເວັນອອກສ່ຽງໃຕ້ (ASEAN) ໄດ້ລົງນາມໃນບົດບັນທຶກຊ່ວຍຈໍາ “ເພີ່ມທະວີການຮ່ວມມືຕ້ານການກໍ່ການຮ້າຍສາກົນ”.
ພິທີລົງນາມໄດ້ດໍາເນີນພາຍໃຕ້ການເປັນສັກຂີພິຍານຂອງການນໍາບັນດາປະເທດອາຊຽນ ແລະທ່ານນາຍົກລັດຖະມົນຕີອົດສະຕາລີ Malcom Turnbull.
|
|
ການນໍາບັນດາປະເທດອາຊຽນ ແລະອົດສະຕາລີ ເຂົ້າຮ່ວມກອງປະຊຸມສຸດຍອດພິເສດອາຊຽນ ແລະອົດສະຕາລີ ຢູ່ Sydney ວັນທີ 17 ມີນາ. ພາບ: ສຳນັກຂ່າວສານຫວຽດນາມ. |
ບົດບັນທຶກຊ່ວຍຈໍານີ້ໄດ້ຖືເປັນບາດກ້າວບຸກທະລຸປະຫວັດສາດປະກອບສ່ວນຊຸກຍູ້ການພົວພັນຮ່ວມມືສອງຝ່າຍໃນຂົງເຂດປົກປັກຮັກສາຄວາມໝັ້ນຄົງຢູ່ພາກພື້ນ. ຜ່ານບັນດາຂໍ້ຕົກລົງແມ່ທີ່ໄດ້ຮັບການລົງນາມ, ອາຊຽນ ແລະອົດສະຕາລີ ເຫັນດີເປັນເອກະພາບເພີ່ມທະວີການຮ່ວມມືຕ້ານການກໍ່ການຮ້າຍໃນບັນດາຂົງເຂດຄືການເງິນ ແລະລັດທິໃຊ້ຄວາມຮຸນແຮງຂວາຈັດ. ຄຽງຂ້າງນັ້ນ, ອົດສະຕາລີ ກໍ່ໃຫ້ຄໍາໝັ້ນສັນຍາຈະຮັກສາບັນດາການເຈລະຈາປະຈຳປີຂັ້ນລັດຖະບານ, ບັນດາອົງການປ້ອງກັນຄວາມສະຫງົບ ແລະບັນດາກົມກອງປະຕິບັດກົດໝາຍກັບອາຊຽນ ເພື່ອພ້ອມກັນຊອກຫາບັນດາມາດຕະການປົກປັກຮັກສາພື້ນຖານຄວາມໝັ້ນຄົງຢູ່ພາກພື້ນຢ່າງແທດຈິງ.
ບົດບັນທຶກຊ່ວຍຈໍາລວມມີບັນດາຂໍ້ລິເລີ່ມ ແລະບັນດາຂໍ້ຕົກລົງແມ່ດ້ວຍເນື້ອໃນກວມລວມບັນດາຂົງເຂດຄືເຕັກນິກ, ໜູນຊ່ວຍໂຄງການກໍ່ສ້າງກົດໝາຍຕ້ານການກໍ່ການຮ້າຍ, ຈັດຕັ້ງບັນດາການເຈລະຈາຂັ້ນພາກພື້ນ ແລະກອງປະຊຸມສໍາມະນາດ້ວຍບັນດາຫົວຂໍ້ກ່ຽວກັບພະຍານຫຼັກຖານເອເລັກໂຕນິກ, ສືບຂ່າວການເງິນ ແລະສະກັດກັ້ນ, ຕ້ານການຂວາຈັດທາງອິນເຕີເນັດ.
ແປໂດຍ: ຫງວຽນກຸກ