ຜູ້ແທນກວ່າ 2.000 ເທື່ອຄົນຈະເຂົ້າຮ່ວມກອງປະຊຸມ GMS 6 ແລະ CLV 10 ຢູ່ ຮ່າໂນ້ຍ
ກປ.ອອນໄລ - ຕອນບ່າຍວັນທີ 15 ມີນາ, ຢູ່ນະຄອນ ຮ່າໂນ້ຍ ໄດ້ດໍາເນີນການປະຊຸມຂ່າວສາກົນກ່ຽວກັບກອງປະຊຸມສຸດຍອດຮ່ວມມືອະນຸພາກພື້ນແມ່ນໍ້າຂອງເປີດກວ້າງຄັ້ງທີ 6 (GMS 6) ແລະກອງປະຊຸມຂັ້ນສູງຮ່ວມມືເຂດສາມລ່ຽມພັດທະນາ ກໍາປູເຈຍ-ລາວ-ຫວຽດນາມ (CLV) ຄັ້້ງທີ 10 ພາຍໃຕ້ການເປັນປະທານຂອງທ່ານ ດັ້ງດິ່ງກີ໋, ຮອງລັດຖະມົນຕີກະຊວງການຕ່າງປະເທດຫວຽດນາມ.
ທ່ານ ດັ້ງດິ່ງກີ໋ ໃຫ້ຮູ້ວ່າ, ກອງປະຊຸມສຸດຍອດ GMS 6 ແລະກອງປະຊຸມຂັ້ນສູງເຂດສາມລ່ຽມພັດທະນາ ກໍາປູເຈຍ-ລາວ-ຫວຽດນາມ ຄັ້້ງທີ 10 ຈະດໍາເນີນແຕ່ວັນທີ 29 ຫາວັນທີ 31 ມີນາ ຢູ່ຮ່າໂນ້ຍ, ຄາດຄະເນວ່າຈະມີການເຂົ້າຮ່ວມຂອງຜູ້ແທນກວ່າ 2.000 ເທື່ອຄົນເຂົ້າຮ່ວມ, ໃນນັ້ນມີການນໍາຂັ້ນສູງບັນດາປະເທດສະມາຊິກ GMS, CLV, ຜູ້ຕາງໜ້າບັນດາອົງການຈັດຕັ້ງສາກົນ, ການນໍາບັນດາວິສາຫະກິດ, ກຸ່ມບໍລິສັດໃຫຍ່ຢູ່ພາກພື້ນ ແລະໃນໂລກ.
|
|
ບັນຍາກາດທີ່ການປະຊຸມຂ່າວ. ພາບ: baomoi.com. |
ຕາມທ່ານ ດັ້ງດິ່ງກີ໋ ແລ້ວ, ກອງປະຊຸມສຸດຍອດ GMS 6 ມີຫົວຂໍ້ວ່າ: “ເສີມຂະຫຍາຍ 25 ປີແຫ່ງການຮ່ວມມື, ກໍ່ສ້າງ GMS ທີ່ເຊື່ອມໂຍງ, ຍືນຍົງ ແລະວັດທະນາຖາວອນ”. ເນື່ອງໃນໂອກາດນີ້, ເປັນຄັ້ງທໍາອິດທີ່ ຫວຽດນາມ ຍົກອອກຂໍ້ລິເລິ່ມຈັດຕັ້ງເວທີປາໄສສຸດຍອດວິສາຫະກິດ GMS ດ້ວຍຄາດໝາຍແມ່ນເພີ່ມທະວີການເຈລະຈາລະຫວ່າງວິສາຫະກິດ ແລະລັດ, ເຊື່ອມຕໍ່ບັນດາວິສາຫະກິດຢູ່ພາກພື້ນ ແລະໃນໂລກ. ໃນຂະນະນັ້ນ, ກອງປະຊຸມຂັ້ນສູງເຂດສາມລ່ຽມພັດທະນາ ກໍາປູເຈຍ-ລາວ-ຫວຽດນາມ ຄັ້້ງທີ 10 ຈະກວດກາຄືນສະພາບການປະຕິບັດ “ແຜນສັງລວມກ່ຽວກັບການພັດທະນາເສດຖະກິດສັງຄົມຢູ່ເຂດສາມລ່ຽມພັດທະນາ ກໍາປູເຈຍ-ລາວ-ຫວຽດນາມ ໄລຍະ 2010-2020” ແລະປຶກສາຫາລື, ກໍານົດທິດທາງຮ່ວມມືໃນໄລຍະຈະມາເຖິງ, ເປັນຕົ້ນແມ່ນເພີ່ມທະວີການເຊື່ອມຕໍ່ເສດຖະກິດ ກໍາປູເຈຍ-ລາວ-ຫວຽດນາມ.
ແປໂດຍ: ທູຈາງ