ອາຊຽນ ແລະຈີນຈະດຳເນີນການເຈລະຈາກ່ຽວກັບ COC ຢ່າງເປັນທາງການໃນເດືອນ ມີນາ ຈະມາເຖິງ
ກປ.ອອນໄລ - ຕອນເຊົ້າວັນທີ 5 ກຸມພາ, ບັນດາເຈົ້າໜ້າທີ່ ອາຊຽນ (SOM) ໄດ້ປະຊຸມຢູ່ ສິງກະໂປ. ທ່ານຮອງລັດຖະມົນຕີກະຊວງການຕ່າງປະເທດ, ຫົວໜ້າ SOM ອາຊຽນ ຂອງ ຫວຽດນາມ ຫງວຽນກ໋ວກຢູງ ນໍາໜ້າຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມ.
ທີ່ກອງປະຊຸມ, ບັນດາປະເທດໄດ້ເຫັນດີເປັນເອກະພາບຕໍ່ລາຍການປຶກສາຫາລື ແລະລາຍການເຄື່ອນໄຫວຂອງກອງປະຊຸມວົງແຄບບັນດາລັດຖະມົນຕີກະຊວງການຕ່າງປະເທດ ອາຊຽນ ເຊິ່ງຈັດຕັ້ງແຕ່ວັນທີ 5 ມາຮອດວັນທີ 6 ກຸມພາ ຢູ່ ສິງກະໂປ. ຕາມນັ້ນແລ້ວ, ບັນດາລັດຖະມົນຕີກະຊວງການຕ່າງປະເທດຈະແລກປ່ຽນບາງເນື້ອໃນຕົ້ນຕໍຄືຜັນຂະຫຍາຍໝາກຜົນກອງປະຊຸມຂັ້ນສູງ ອາຊຽນ ຄັ້ງທີ 31 ເດືອນ ພະຈິກ 2017, ວິວັດການກໍ່ສ້າງປະຊາຄົມ, ຈຸດສຸມການຮ່ວມມື ອາຊຽນ ປີ 2018 ແລະບັນດາບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ.
|
|
ບັນດາເຈົ້າໜ້າທີ່ ອາຊຽນ (SOM) ເຂົ້າຮ່ວມປະຊຸມຢູ່ ສິງກະໂປ. ພາບ: VOV.VN |
ຄຽງຂ້າງນັ້ນ, ຫົວໜ້າບັນດາປະເທດກໍ່ໄດ້ແລກປ່ຽນບາງເນື້ອໃນໃນຂົງເຂດຮັບຜິດຊອບ, ລວມມີ, ສຳຫຼວດກວດກາການຜັນຂະຫຍາຍແຜນການສັງລວມກໍ່ສ້າງປະຊາຄົມການເມືອງ-ຄວາມໝັ້ນຄົງ ອາຊຽນ, ປຶກສາຫາລືເນື້ອໃນບັນດາຫົວຂໍ້ຮ່ວມມື ອາຊຽນ 2018 ແລະປະຕິບັດສໍາເລັດບັນດາເອກະສານກ່ອນທີ່ຢືນເຖິງບັນດາລັດຖະມົນຕີພິຈາລະນາ, ປຶກສາຫາລືກ່ຽວກັບບັນດາການເຄື່ອນໄຫວພົວພັນຕ່າງປະເທດຂອງ ອາຊຽນ, ໃນນັ້ນ, ມີແບບວິທີກໍ່ສ້າງ COC. ໄດ້ຮູ້ວ່າ, ອາຊຽນ ແລະຈີນ ຈະດຳເນີນການເຈລະຈາກ່ຽວກັບ COC ຢ່າງເປັນທາງການຕົ້ນເດືອນ ມີນາ ຈະມາເຖິງຢູ່ ຫວຽດນາມ.
ແປໂດຍ: ເກື່ອງດັ້ງ