ດັ່ງທີ່ໄດ້ຄາດຄະເນ, ໃນສານສະຫະລັດ, ທ່ານ Donald Trump ປະທານາທິບໍດີອາເມລິກາ ຖະແຫຼງວ່າ ຈະພົບປະກັບທ່ານ Kim Jong-un ການນໍາ ສປປ.ເກົາຫຼີ ຢູ່ຫວຽດນາມ ໃນລະຫວ່າງວັນທີ 27-28 ກຸມພາ. ສະຖານທີ່ດໍາເນີນກອງປະຊຸມແມ່ນຢູ່ຮ່າໂນ້ຍ. ທ່ານ Donald Trump ໄດ້ຂຽນຢູ່ Twitter ໃນວັນທີ 8 ກຸມພາວ່າ “ບັນດາທູດຂອງຂ້າພະເຈົ້າຫາກໍ່ອອກຈາກສປປ.ເກົາຫຼີ ພາຍຫຼັງການປະຊຸມທີ່ມີປະສິດທິຜົນ ແລະໄດ້ເຫັນດີເປັນເອກະພາບເວລາ, ສະຖານທີ່ດຳເນີນກອງປະຊຸມສຸດຍອດຄັ້ງທີ 2 ກັບທ່ານ Kim Jong-un. ການພົບປະຄັ້ງນີ້ຈະດໍາເນີນຢູ່ຮ່າໂນ້ຍ ຂອງຫວຽດນາມ ໃນລະຫວ່າງວັນທີ 27-28 ກຸມພາ. ຂ້າພະເຈົ້າຄອຍຖ້າການພົບປະກັບທ່ານ Kim Jong-un ແລະກ້າວໄປເຖິງການສ້າງສັນຕິພາບ”.

leftcenterrightdel
ທ່ານ Donald Trump ປະທານາທິບໍດີອາເມລິກາ ແລະທ່ານ Kim Jong-un ການນໍາ ສປປ.ເກົາຫຼີ ໃນການພົບປະເມື່ອເດືອນມິຖຸນາ 2018. ພາບ: AFP.

ກະຊວງການຕ່າງປະເທດຫວຽດນາມ ໄດ້ຊົມເຊີຍການນໍາສອງປະເທດ ອາເມລິກາ-ສປປ.ເກົາຫຼີ ຈັດຕັ້ງກອງປະຊຸມສຸດຍອດຄັ້ງທີ 2 ແລະສະໜັບສະໜູນຢ່າງແຮງຕໍ່ການເຈລະຈາ ເພື່ອແນໃສ່ຮັກສາສັນຕິພາບ, ຄວາມໝັ້ນຄົງ, ສະຖຽນລະພາບໃນແຫຼມເກົາຫຼີ. ໃນຖະແຫຼງການ, ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດຫວຽດນາມ ເນັ້ນໜັກວ່າ: “ຫວຽດນາມ ສະໜັບສະໜູນຢ່າງແຮງຕໍ່ການເຈລະຈາເພື່ອແນໃສ່ຮັກສາສັນຕິພາບ, ຄວາມໝັ້ນຄົງ, ສະຖຽນລະພາບໃນແຫຼມເກົາຫຼີ”. ຫວຽດນາມ ພ້ອມແລ້ວທີ່ຈະປະກອບສ່ວນຢ່າງຕັ້ງໜ້າ, ສົມທົບກັບບັນດາຝ່າຍທີ່ກ່ຽວຂ້ອງເພື່ອໃຫ້ກອງປະຊຸມສຸດຍອດອາເມລິກາ-ສປປ.ເກົາຫຼີ ຄັ້ງທີ 2 ປະສົບຜົນສໍາເລັດ, ປະກອບສ່ວນເຂົ້າໃນເປົ້າໝາຍດັ່ງກ່າວ”.

ສ່ວນທ່ານ Kim Eui-kyeo, ໂຄສົກທໍານຽບຂຽວ ສ.ເກົາຫຼີ ກ່າວວ່າ, ສ.ເກົາຫຼີ ປະເທດສວມບົດບາດສຳຄັນໃນເລື່ອງຈັດການເຈລະຈາລະຫວ່າງ ອາເມລິກາ-ສປປ.ເກົາຫຼີ-ກໍ່ຊົມເຊີຍຄຳຖະແຫຼງຂອງທ່ານ Donald Trump ກ່ຽວກັບເລື່ອງຈັດຕັ້ງກອງປະຊຸມສຸດຍອດ ອາເມລິກາ-ສປປ.ເກົາຫຼີ ຢູ່ຫວຽດນາມ, ພ້ອມທັງສະແດງຄວາມຫວັງວ່າ ການພົວພັນລະຫວ່າງບັນດາຝ່າຍຈະໄດ້ຮັບການປັບປຸງ. “ພວກຂ້າພະເຈົ້າຫວັງວ່າຫວຽດນາມ ຈະແມ່ນສະຖານທີ່ສຸດຍອດເພື່ອໃຫ້ອາເມລິກາ ແລະສປປ.ເກົາຫຼີ ສ້າງເປັນປະຫວັດສາດໃໝ່”.

ຕາມວົງການນັກໄຈ້ແຍກສາກົນ, ການເປັນເຈົ້າພາບຈັດກອງປະຊຸມສຸດຍອດ ອາເມລິກາ-ສປປ.ເກົາຫຼີ ຈະຊ່ວຍຫວຽດນາມ ດຶງດູດຄວາມສົນໃຈຈາກປະຊາຄົມສາກົນ, ພິເສດແມ່ນແຂກທ່ອງທ່ຽວ ແລະບັນດານັກລົງທຶນ, ຜ່ານບັນດາພາຫະນະສື່ມ່ວນຊົນທີ່ໂຄສະນາຢ່າງແຮງກ່ຽວກັບກອງປະຊຸມນີ້. ນີ້ກໍ່ແມ່ນກາລະໂອກາດເພື່ອໃຫ້ຫວຽດນາມ ໂຄສະນາເຜີຍແຜ່ນະໂຍບາຍພົວພັນຕ່າງປະເທດທີ່ຕັ້ງໜ້າຂອງຕົນ, ຜ່ານນັ້ນປະກອບສ່ວນຫຼາຍກວ່າໃຫ້ປະຊາຄົມສາກົນກໍ່ຄືໃຫ້ສັນຕິພາບ ແລະຄວາມໝັ້ນຄົງຢູ່ພາກພື້ນ.

ສັນຍານທີ່ຕັ້ງໜ້າອື່ນອີກແມ່ນເລື່ອງອາເມລິກາ ແລະຈີນ ເຫັນດີເປັນເອກະພາບດໍາເນີນການເຈລະຈາການຄ້າຮອບໃໝ່ໃນວັນທີ 11 ກຸມພາ ຢູ່ປັກກິ່ງ ດ້ວຍເນື້ອໃນສຸມໃສ່ປຶກສາຫາລືບັນຫາຊັບສິນທາງປັນຍາ. ກ່ອນໜ້ານັ້ນ, ການເຈລະຈາການຄ້າຮອບທີສອງລະຫວ່າງອາເມລິກາ ແລະຈີນ ໄດ້ຮັບຜົນພໍສົມຄວນເມື່ອສອງຝ່າຍແກ້ໄຂໄດ້ຫຼາຍບັນຫາຍັງຕິດຂັດ...

ວົງການນັກຊ່ຽວຊານໃຫ້ຂໍ້ສັງເກດວ່າ, ການຜັນແປດ້ານການເມືອງຢູ່ອາຊີໃນປະຈຸບັນສະແດງໃຫ້ເຫັນວ່າການເຈລະຈາແມ່ນໜຶ່ງໃນບັນດາມາດຕະການການເມືອງທີ່ມີປະສິດທິຜົນທີ່ສຸດ, ປະກອບສ່ວນນໍາມາເຊິ່ງສັນຕິພາບ, ສະຖຽນລະພາບໃຫ້ພາກພື້ນ ແລະໂລກ.

ໂດຍ: ທະນາພອນ