ຕາມຂ່າວສານຫວຽດນາມ, ເມື່ອບໍ່ດົນມານີ້, ທ່າມກາງສະພາບ ສ.ອາເມລິກາ ແລະຈີນ ຍັງບໍ່ສາມາດຊອກຫາວິທີການແກ້ໄຂຄວາມຄືບໜ້າກ່ຽວກັບບັນຫາການຄ້າ, ສະຫະປະຊາຊາດ ໄດ້ປະກາດເຕືອນວ່າ ສ.ອາເມລິກາ ເກັບພາສີນຳເຂົ້າສິນຄ້າຈີນ ສົ່ງຜົນກະທົບຢ່າງໃຫຍ່ຫຼວງໃຫ້ແກ່ຂົງເຂດການຄ້າໃນໂລກກໍຄືການຈູດຊະນວນເຮັດໃຫ້ເສດຖະກິດໂລກຂະຫຍາຍຕົວຫຼຸດລົງ.

leftcenterrightdel
ປັດຈຸບັນ, ຍອດປະລິມານສິນຄ້າຂອງສອງຝ່າຍທ່ີຖືກເກັບພາສີ ໄດ້ເພີ່ມຂຶ້ນຫຼາຍກວ່າ 360 ຕື້ໂດລາສະຫະລັດ. ພາບ: Reuters

ທ່ານນາງ ປາເມລາ ໂຄກຮາມີນຕັນ ປະທານກອງປະຊຸມສະຫະປະຊາຊາດ ກ່ຽວກັບການຄ້າ ແລະການພັດທະນາ ກ່າວໃນກອງປະຊຸມຂ່າວວ່າຖ້າ ສ.ອາເມລິກາ ແລະຈີນ ຕອບໂຕ້ການເກັບພາສີ ເຊິ່ງກັນ ແລະກັນ ຈະເຮັດໃຫ້ເສດຖະກິດໂລກຫຼຸດລົງ ເນື່ອງຈາກສິນຄ້າ ແລະຕະຫຼາດການເງິນຈະບໍ່ມີຄວາມໝັ້ນຄົງ, ຂະນະດຽວກັນນັ້ນ, ວິສາຫະກິດຕ້ອງມີການປ່ຽນແປງເພື່ອໃຫ້ແທດເໝາະກັບສົງຄາມການຄ້າ ສ.ອາເມລິກາ-ຈີນ ພ້ອມກັນນັ້ນຈະສົ່ງຜົນກະທົບເຖິງການຈະເລີນເຕີບໃຫຍ່ໃນທົ່ວໂລກ. ທ່ານນາງປາເມລາໂຄກຮາມີນຕັນ ກ່າວວ່າສົງຄາມການຄ້າລະຫວ່າງສອງພື້ນຖານເສດຖະກິດຂະໜາດໃຫຍ່ສຸດຂອງໂລກເຮັດໃຫ້ອັດຕາການວ່າງງານເພີ່ມຂຶ້ນ ແລະນຳໄປສູ່ຄວາມຜິດດ່ຽງທາງດ້ານການຄ້າຕໍ່ຝ່າຍທ່ີສາມເປັນຕົ້ນສະຫະພັນເອີຣົບ, ຍີ່ປຸ່ນ ຫຼື ເມັກຊິກ. ສົງຄາມການຄ້າ ສ.ອາເມລິກາ-ຈີນ ໄດ້ເກີດຂຶ້ນໃນໄລຍະກາງປີ 2018, ຈາກນັ້ນສອງຝ່າຍໄດ້ມີການຕອບໂຕ້ ເຊິ່ງກັນແລະກັນ ດ້ວຍການເກັບພາສີໃໝ່. ປັດຈຸບັນ, ຍອດປະລິມານສິນຄ້າຂອງສອງຝ່າຍທ່ີຖືກເກັບພາສີ ໄດ້ເພີ່ມຂຶ້ນຫຼາຍກວ່າ 360 ຕື້ໂດລາສະຫະລັດ./.

ເນື້ອໃນ: ຂປລ