IMF ຮັບຮອງບ້ວງເງິນຊ່ວຍເຫຼືອ 56,3 ຕື້ໂດລາສະຫະລັດ ໃຫ້ແກ່ອາກຊັງຕິນ
ກອງທຶນເງິນຕາສາກົນ (IMF) ແຈ້ງໃຫ້ຮູ້ເມື່ອວັນທີ 26 ຕຸລາທີ່ຜ່ານມາວ່າໄດ້ໃຫ້ການຮັບຮອງບ້ວງເງິນຊ່ວຍເຫຼືອໃຫ້ແກ່ອາກຊັງຕິນມູນຄ່າ 56,3 ຕື້ໂດລາສະຫະລັດນັ້ນຢ່າງເປັນທາງການແລ້ວໂດຍມີກຳນົດ 3 ປີ.
ບ້ວງເງິນສິນເຊື່ອດັ່ງກ່າວໜ້ອຍກວ່າເມື່ອທຽບໃສ່ຕົວເລກທີ່ຄາດຄະເນໄວ້ 57,1 ຕື້ໂດລາສະຫະລັດ ຊຶ່ງສອງຝ່າຍນຳອອກມາໃນເວລາເລີ່ມການເຈລະຈາເມື່ອເດືອນກັນຍາທີ່ຜ່ານມາ.
ແຈ້ງການຂອງ IMF ໃຫ້ຮູ້ວ່າການຕົກລົງດັ່ງກ່າວມີອອກມາພາຍຫຼັງການປະຊຸມຂອງຄະນະບໍລິຫານງານ IMF ພາຍໃຕ້ການເປັນປະທານຂອງທ່ານນາງ ຄຣິສຕິນລາກາດ ຜູ້ອຳນວຍການໃຫຍ່ IMF. ຕາມການຕົກລົງນັ້ນແລ້ວກໍ່ແມ່ນ IMF ຈະເຫັນດີເປີດກວ້າງບ້ວງກູ້ຢືມສິນເຊື່ອປ້ອງກັນສຳຮອງໃຫ້ແກ່ອາກຊັງຕິນ ຈາກ 50 ຕື້ໂດລາສະຫະລັດຂຶ້ນເປັນ 56,3 ຕື້ໂດລາສະຫະລັດ ເພື່ອຊ່ວຍເຫຼືອພື້ນຖານເສດຖະກິດອາກຊັງຕິນ ຜ່ານຜ່າໄລຍະທີ່ຫຍຸ້ງຍາກໃນປັດຈຸບັນ.
|
|
ທ່ານນາງ ຄຣິສຕິນລາກາດ ຜູ້ອຳນວຍການໃຫຍ່ IMF. ພາບ: ສຳນັກຂ່າວສານຫວຽດນາມ. |
ການທີ່ IMF “ເປີດໄຟຂຽວ” ໃຫ້ແກ່ອາກຊັງຕິນເຂົ້າຫາບ້ວງກູ້ຢືມສິນເຊື່ອດັ່ງກ່າວມີຂຶ້ນໜຶ່ງມື້ຫຼັງຈາກທີ່ສະພາຕ່ຳຂອງອາກຊັງຕິນ ຮັບຮອງຮ່າງງົບປະມານປີ 2019 ໂດຍແມ່ນລັດຖະບານນຳສະເໜີ. ຕາມຮ່າງງົບປະມານນັ້ນກໍ່ແມ່ນ ອາກຊັງຕິນ ຄາດວ່າຈະຕັດຫຼຸດປະມານ 400 ຕື້ເປໂຊ (ເທົ່າກັບກວ່າ 10 ຕື້ໂດລາສະຫະລັດ) ເມື່ອທຽບໃສ່ປີ 2018 ຢູ່ໃນບ້ວງໃຊ້ຈ່າຍພາກລັດທ່າມກາງທີ່ພື້ນຖານເສດຖະກິດອາກຊັງຕິນ ພວມຜ່ານຜ່າໄລຍະທີ່ຫຼຸດຖອຍຮ້າຍແຮງ.
ບົດລາຍງານຂອງລັດຖະບານອາກຊັງຕິນ ໃຫ້ຮູ້ວ່າພື້ນຖານເສດຖະກິດຂອງປະເທດນີ້ຄາດວ່າຈະຫຼຸດລົງແຕ່ 2% ຫາ 3% ໃນປີ 2018 ແລະແຕ່ 0,5% ຫາ 2% ໃນປີ 2019 ກ່ອນທີ່ຈະເລີ່ມໄດ້ຮັບການຟື້ນຟູ.
ຂ່າວ: ວຽງຈັນໃໝ່