WB ແລະ ADB ຊ່ວຍເຫຼືອເງິນກູ້ໃຫ້ແກ່ອິນໂດເນເຊຍ
ໃນແຈ້ງການທີ່ມີອອກຢູ່ທີ່ເກາະບາຫຼີ (ອິນໂດເນເຊຍ) ບ່ອນທີ່ໄດ້ຈັດກອງປະຊຸມປະຈຳປີຂອງອົງການກອງທຶນສາກົນ (IMF) ທະນາຄານໂລກ (WB) ນັ້ນ WB ໄດ້ຕົກລົງສະໜອງຄ່າໃຊ້ຈ່າຍມູນຄ່າ 1 ຕື້ໂດລາສະຫະລັດ ເພື່ອຊ່ວຍເຫຼືອອິນໂດເນເຊຍ ໃຊ້ເຂົ້າໃນການແກ້ໄຂຜົນຮ້າຍຕາມມາຈາກໄພພິບັດແຜ່ນດິນໄຫວ ແລະສຶນາມິ ຊຶ່ງເກີດຂຶ້ນຢູ່ທີ່ແຂວງ ສຸລາເວສີກາງ ເມື່ອວັນທີ 28 ເດືອນກັນຍາທີ່ຜ່ານມາ.
ທ່ານ ຄຣິສຕາລີນາ ຈອດເຈວາ ຜູ້ອຳນວຍການຝ່າຍບໍລິຫານຂອງ WB ເວົ້າວ່າໃນສ່ວນຄ່າໃຊ້ຈ່າຍພາຍໃຕ້ຮູບການກູ້ຢືມດັ່ງກ່າວ ບໍ່ສະເພາະແຕ່ໃຊ້ເພື່ອບູລະນະສ້າງສາຢູ່ໃນເຂດປະສົບໄພທຳມະຊາດເທົ່ານັ້ນ ຫາກຍັງເພື່ອຊ່ວຍເຫຼືອອິນໂດເນເຊຍ ໃນການສ້າງຂີດຄວາມສາມາດໃນການຟື້ນຟູຫຼັງໄພພິບັດນຳອີກເປັນການຊ່ວຍເຫຼືອປະເທດນີ້ໃຫ້ມີການກະກຽມທີ່ດີກວ່າ ເພື່ອຮັບມືກັບໄພພິບັດທີ່ຄ້າຍຄືກັນນັ້ນໃນອະນາຄົດ.
    |
 |
|
ພາບປະກອບຈາກ: vientianemai.net. |
ກ່ອນໜ້ານັ້ນ ເມື່ອວັນທີ 12 ຕຸລາ ທະນາຄານພັດທະນາອາຊີ (ADB) ກໍ່ໄດ້ໃຫ້ສັນຍາເຖິງການສະໜອງບ້ວງການເງິນສຸກເສີນ ມູນຄ່າ 1 ຕື້ໂດລາສະຫະລັດ ເພື່ອຊ່ວຍເຫຼືອອິນໂດເນເຊຍບູລະນະສ້າງສາຫຼັງເກີດໄພພິບັດແຜ່ນດິນໄຫວ ແລະສຶນາມິດັ່ງກ່າວເຊັ່ນກັນ. ຄຳສັນຍານີ້ມີອອກມາຢູ່ໃນພົບປະລະຫວ່າງທ່ານ ຕາເກຮີໂກ ນາກາໂອ ປະທານ ADB ກັບປະທານາທິບໍດີອິນໂດເນເຊຍ ໂຈໂກ ວີໂດໂດ ຊຶ່ງມີຂຶ້ນຢູ່ນອກກອງປະຊຸມປະຈຳປີຂອງ IMF - WB ທີ່ເກາະບາຫຼີ. ກອງທຶນຊ່ວຍເຫຼືອສຸກເສີນຂອງ ADB ນັ້ນປະກອບມີ 500 ລ້ານໂດລາສະຫະລັດ ເພື່ອຊ່ວຍເຫຼືອງົບປະມານສຸກເສີນຂອງລັດຖະບານອິນໂດເນເຊຍ ແລະອີກ 500 ລ້ານໂດລາສະຫະລັດ ແມ່ນໃຊ້ໃຫ້ແກ່ວຽກງານບູລະນະສ້າງສາພື້ນຖານໂຄງລ່າງທີ່ສຳຄັນ ເຊັ່ນລະບົບສະໜອງນ້ຳ ແລະອະນາໄມໂຮງຮຽນຖະໜົນຫົນທາງຂົວ ແລະຕານ່າງໄຟຟ້າ. ກອງທຶນດັ່ງກ່າວແມ່ນນອນຢູ່ໃນໂຄງການເງິນກູ້ຂອງ ADB ໃຫ້ແກ່ອິນໂດເນເຊຍ ໂດຍມີລະດັບສະເລ່ຍ 2 ຕື້ໂດລາສະຫະລັດ/ປີ.
ແຜ່ນດິນໄຫວ ແລະສຶນາມິດັ່ງກ່າວໄດ້ເຮັດໃຫ້ດິນກາຍເປັນຂີ້ຕົມປົກຄຸມ ແລະທຳລາຍຫຼາຍເຂດໃນທົ່ວແຂວງສຸລາເວສີກາງ ໂດຍສະເພາະກໍ່ແມ່ນຢູ່ເມືອງ ປາລູ ຊີກິ ດົງກາລາ ແລະ ປາຣີກີ ມູຕອງ. ໄລ່ມາຮອດເວລານີ້ທາງການອິນໂດເນເຊຍ ໄດ້ປະກາດຕົວເລກຜູ້ເສຍຊີວິດ ຢູ່ໃນໄພພິບັດທຳມະຊາດເທື່ອນີ້ແມ່ນຢູ່ທີ່ 2.073 ຄົນ. ນອກຈາກນັ້ນແລ້ວ ກໍ່ຍັງມີຜູ້ທີ່ຍັງຊອກບໍ່ເຫັນອີກເກືອບ 5.000 ຄົນ ແລະມີຜູ້ຕ້ອງໄດ້ອົບພະຍົບໜີໄພເກືອບ 90.000 ຄົນ. ຕາມການຄາດຄະເນແລ້ວແມ່ນຕ້ອງໄດ້ໃຊ້ເວລາຢ່າງໜ້ອຍ 2 ປີ ຈຶ່ງຈະເຮັດໃຫ້ຜູ້ທີ່ສູນເສຍເຮືອນຊານ ສາມາດດຳລົງຊີວິດໄດ້ຢ່າງໝັ້ນຄົງ. ໃນຂະນະດຽວກັນ ສະພາບຂາດແຄນນ້ຳສະອາດ ແລະຢາປົວພະຍາດ ກໍ່ເປັນຜົນກະທົບຕໍ່ປະມານ 200.000 ຄົນ ຊຶ່ງຕ້ອງການໄດ້ຮັບການສະໜອງເປັນການສຸກເສີນ.
ຂ່າວ: ວຽງຈັນໃໝ່