ສປຊ ຈະປຶກສາຫາລືຂໍ້ຕົກລົງການປົກປ້ອງທະເລຫລວງ
ຕາມຂ່າວຕ່າງປະເທດ, ວັນທີ 4 ກັນຍາ, ສະຫະປະຊາຊາດຈະເລີ່ມປຶກສາຫາລື ລະຫວ່າງປະເທດສະມາຊິກ ເພື່ອກະກຽມສົນທິສັນຍາກ່ຽວກັບການວາງແຜນມາດຕະການໃນການດູແລທະເລຫຼວງ, ຊຶ່ງເປັນທະເລທີ່ບໍ່ໄດ້ຂຶ້ນກັບອານາເຂດຂອງປະເທດໃດແຕ່ເປັນຊັບສິນລວມຂອງທຸກໆປະເທດ.
ເບື້ອງຕົ້ນມີການກຳນົດເວລາປຶກສາຫາລື 2 ປີເພື່ອແນໃສ່ປົກປ້ອງຄວາມຫຼາກຫຼາຍຂອງຊັບພະຍາກອນທາງທະເລ, ລວມເຖິງ ການປ້ອງກັນບໍ່ໃຫ້ມີການຊວງຊິງຊັບພະຍາກອນຈາກທະເລເພີ່ມຂື້ນໃນອະນາຄົດ. ທະເລຫຼວງກວມເອົາເນື້ອທີ່ເຖິງ 40% ຢູ່ເທິງພື້ນຜີວໂລກ. ຂະນະທີ່ກົດໝາຍທະເລທີ່ສະຫະປະຊາຊາດໃຫ້ການຮອງຮັບເມື່ອປີ 1982 ບໍ່ໄດ້ກວມເຖິງພື້ນທີ່ດັ່ງກ່າວ.
ເນື້ອໃນ: ຂປລ