ກິນເຕັດກັບແມ່ຮັກຫວຽດນາມ

ພັນໂທນາງ ຈັນເພັງ ດວງສະຫວັນ, ຫົວໜ້າພະແນກຂ່າວຕ່າງປະເທດ, ໜັງສືພິມກອງທັບປະຊາຊົນລາວທັງເປັນສະມາຊິກທັງເປັນນາຍແປພາສາໃຫ້ແກ່ຄະນະປະຕິບັດງານ. ໃນບັນດາອານຸສອນທີ່ມີກັບຫວຽດນາມນັ້ນ, ເອື້ອຍບໍ່ອາດຫຼົງລືມໄດ້ຊຸມປີທີ່ຮຽນຢູ່ໂຮງຮຽນ T1. “ປີ 1970, ສົງຄາມໄດ້ແຜ່ລາມອອກຢ່າງກວ້າງຂວາງ. ໃນຄາວນັ້ນ ຂ້າພະເຈົ້າ ມີອາຍຸ 10 ປີ, ໄດ້ຈາກພໍ່ແມ່, ອ້າຍເອື້ອຍນ້ອງ ແລະປະຊາຊົນໃນບ້ານ ນາອຸມ (ເມືອງເມືອງຄໍາ, ແຂວງຊຽງຂວາງ) ເຊິ່ງແມ່ນບ້ານເກີດເມືອງນອນຂອງຕົນເພື່ອໄປຮຽນຢູ່ຫວຽດນາມ. ໃນການເດີນທາງຄັ້ງນັ້ນ, ແຂວງຊຽງຂວາງ ມີນັກຮຽນນັບຫຼາຍຮ້ອຍຄົນ, ສະເພາະບ້ານຂອງຂ້າພະເຈົ້າມີ 8 ຄົນ. ພວກຂ້າພະເຈົ້າ ເດີນທາງຕອນກາງເວັນ, ສ່ວນກາງຄືນແມ່ນພັກຜ່ອນ, ຕ້ອງໃຊ້ເວລາກວ່າໜຶ່ງເດືອນຈຶ່ງໄປຮອດຊາຍແດນຫວຽດນາມ. ຈາກນັ້ນ, ພວກຂ້າພະເຈົ້າ ໄປຮອດເມືອງແທງຖຸຍ, ແຂວງວິ້ງຟຸກ (ປັດຈຸບັນແມ່ນແຂວງຝູເທາະ), ຮຽນຢູ່ໂຮງຮຽນກິນນອນຊົນເຜົ່າລາວ ມີລະຫັດຊື່ໂຮງຮຽນແມ່ນ T1”,  ພັນໂທນາງ ຈັນເພັງ ດວງສະຫວັນ ຫວນຄືນຄືດັ່ງກ່າວ.

leftcenterrightdel
ທ່ານພົນຈັດຕະວາ ສີພອນ ຈັນສົມວົງ (ຜູ້ທີສາມ, ແຕ່ຂວາຫາຊ້າຍ), ທ່ານພັນເອກ ສີທະ ວີໄຊ (ຜູ້ທີ 1, ເບື້ອງຂວາ), ພັນໂທນາງ ຈັນເພັງ ດວງວະຫວັນ (ຜູ້ທີ 2, ແຕ່ຊ້າຍຫາຂວາ) ທີ່ຫໍມູນເຊື້ອຂອງກອງບັນຊາການທະຫານນະຄອນຫຼວງວຽງຈັນ. ພາບ: ຈ້ອງຫາຍ.

ປີ 1972, ນາງ ຈັນເພັງ ແລະໝູ່ເພື່ອນໄດ້ກິນເຕັດຫວຽດນາມເປັນຄັ້ງທໍາອິດກັບຄອບຄົວຄົນຫວຽດນາມ. ນາງ ຈັນເພັງ ພ້ອມກັບເອື້ອຍຄູຄົນຫວຽດນາມຜູ້ໜຶ່ງຊື່ ຈ້າຍ ແລະໝູ່ໄທບ້ານດຽວກັນສອງຄົນຢູ່ເຮືອນແມ່ ຢິງ. ວັນສົ່ງທ້າຍປີເກົ່າຕ້ອນຮັບປີໃໝ່,  ຄູ ແລະນັກຮຽນທັງ 4 ຄົນໄດ້ເບິ່ງແມ່ຫໍ່ເຂົ້າຕົ້ມ ແລະພ້ອມກັບຄອບຄົວພາກັນນັ່ງເຝົ້າໝໍ້ເຂົ້າຕົ້ມເພື່ອລໍຖ້າຈຸດເວລາສົ່ງທ້າຍປີເກົ່າຕ້ອນຮັບປີໃໝ່. ອາຍອຸ່ນຈາກແປວໄຟ ແລະອາລົມຈິດແຫ່ງການເຕົ້າໂຮມຂອງຄອບຄົວ, ກໍຄືລົດຊາດອັນຫອມຫວນພິເສດຂອງເຂົ້າຕົ້ມໃນວັນບຸນເຕັດມື້ນັ້ນ, ນາງ ຈັນເພັງ ຍັງຈື່ໄດ້ດີ.

ພາຍຫຼັງກິນເຕັດແລ້ວ, ກັບຄືນມາໂຮງຮຽນກິນນອນ, ແຕ່ວ່າຍາມມີເວລາຫວ່າງ, ນາງ ຈັນເພັງ ແລະໝູ່ເພື່ອນກໍ່ໄປຢ້ຽມຢາມແມ່ ຢິງ, ຊ່ວຍແມ່ຖາງຫຍ້າ, ຫຼົກມັນຕົ້ນຢ່າງເປັນປະຈໍາ. ມີຫຼາຍມື້ແມ່ກໍ່ໄດ້ເຮັດນໍ້າຫວານໝາກຖົ່ວດໍາ ຫຼືເຂົ້າໜຽວມັນຕົ້ນໃຫ້ກິນ, ມື້ໃດມີວຽກແມ່ຍັງໄດ້ປຸງແຕ່ງເຍື່ອງອາຫານຂົ້ວໝາກກ້ວຍໃສ່ຊີ້ນ ເຊິ່ງນັກຮຽນລາວ ມັກກິນທີ່ສຸດ. ປີ 1979, ນາງ ຈັນເພັງ ໄດ້ຮຽນຈົບມັດທະຍົມຕອນປາຍ, ກັບຄືນເມືອບ້ານເກີດເມືອງນອນ ແລະໄດ້ນໍາຄວາມຊົງຈໍາກ່ຽວກັບແມ່ຢິງເມືອພ້ອມດ້ວຍອະນຸສອນແຫ່ງຄວາມຮັກແພງ, ໃກ້ຊິດສະໜິດສະໜົມກ່ຽວກັບປະເທດຊາດ ແລະຊາວຫວຽດນາມ ອີກດ້ວຍ.

ໃນຄາບເຂົ້າຄາບໜຶ່ງຢູ່ນະຄອນຫຼວງວຽງຈັນ, ໄດ້ຟັງພວກຂ້າພະເຈົ້າ ແລະເອື້ອຍ ຈັນເພັງ ລົມກັນກ່ຽວກັບໂຮງຮຽນ T1,   ທ່ານພັນເອກ ບີມົວ ໄຟດາເຢຍຈາ, ຮອງຜູ້ອໍານວຍໃຫຍ່ຝ່າຍບໍລິຫານ-ບຸກຄະລາກອນບໍລິສັດ Star Telecom (ບໍລິສັດຮ່ວມທຸລະກິດລະຫວ່າງກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel) ຂອງກອງທັບປະຊາຊົນຫວຽດນາມ ແລະ Lao Asia Telecom ຂອງກອງທັບປະຊາຊົນລາວ), ແບ່ງປັນວ່າ: “ຂ້າພະເຈົ້າກໍ່ແມ່ນອະດີດນັກຮຽນຢູ່ໂຮງຮຽນ T1 ຄືກັນ”. ທ່ານພັນເອກ ບີມົວ ໄຟດາເຢຍຈາ ໃຫ້ຮູ້ວ່າ, ພໍ່ລາວແມ່ນພະນັກງານປະຕິວັດທີ່ໄດ້ເສຍສະຫຼະຊີວິດຢູ່ທົ່ງໄຫຫີນ, ແຂວງຊຽງຂວາງ ໃນປີ 1967. ຫຼັງຈາກນັ້ນ 2 ປີ, ທ້າວ ບີມົວ ກໍ່ໄດ້ໄປຮຽນຢູ່ໂຮງຮຽນກິນນອນຊົນເຜົ່າ T1.

ເມື່ອຍົກຍ້າຍມາ, ບີມົວ ແລະໝູ່ຄົນໜຶ່ງໄດ້ຮັບການລ້ຽງດູຈາກຄອບຄົວຄົນຫວຽດນາມ. “ເຮືອນພໍ່ແມ່ຮັກຂອງຂ້າພະເຈົ້າມີລູກ 3 ຄົນ, ອ້າຍກົກມີອາຍຸລຸ້ນລາວຄາວດຽວກັບພວກຂ້າພະເຈົ້າ, ນ້ອງຫຼ້າອາຍຸປະມານ 3 ຫຼື 4 ປີນີ້ແຫຼະ. ແມ່ໄດ້ເອົາໃຈໃສ່ ແລະເບິ່ງແຍງດູແລພວກຂ້າພະເຈົ້າຄືລູກຄີງຂອງເພິ່ນ. ປີທີ່ພວກຂ້າພະເຈົ້າກິນເຕັດກັບຄອບຄົວແມ່, ພວກຂ້າພະເຈົ້າໄດ້ຮັບອັງເປົ່າ, ໄດ້ກິນເຂົ້າຕົ້ມ ແລະບັນດາເຍື່ອງອາຫານໃນວັນບຸນປີໃໝ່ປະຈໍາຊາດຂອງຫວຽດນາມ. ຂ້າພະເຈົ້າບໍ່ລືມເຍື່ອງອາຫານປາໜຶ້ງ. ແມ່ໜຶ້ງໝົດຄືນ, ກິນແຊບອີ່ຫຼີ. ເມື່ອກັບຄືນມາລາວ, ເຖິງວ່າຄິດຮອດຄິດເຖິງຄວາມຜູກພັນຮັກໄຄ່ຂອງແມ່ຮັກຫວຽດນາມກໍ່ຕາມ ແຕ່ຂ້າພະເຈົ້າຍັງບໍ່ທັນມີເງື່ອນໄຂ ເພື່ອໄປຢ້ຽມຢາມແມ່ເທື່ອ. ອ້າຍ ບີມົວ ເລົ່າຄືນສູ່ຟັງ.

ບຸນເຕັດປີນີ້, ນັດພົບອ້າຍຢູ່ຮ່າໂນ້ຍ ເດີ!

ນັ້ນແມ່ນຄໍາໝັ້ນໝາຍຂອງພັນເອກ ສີທະ ວີໄຊ ຫົວໜ້າການທະຫານກອງບັນຊາການທະຫານນະຄອນຫຼວງວຽງຈັນ ໃນການໂອ້ລົມອັນສະໜິດສະໜົມກັບຄະນະພະນັກງານ, ນັກຂ່າວໜັງສືພິມກອງທັບປະຊາຊົນຫວຽດນາມ. ມື້ທີ່ພວກຂ້າພະເຈົ້າໄປຢ້ຽມຢາມນັ້ນແມ່ນມື້ພັກຊົດເຊີຍວັນຊາດຂອງເພື່ອນ, ແຕ່ວ່າມີຄວາມຕື້ນຕັນໃຈແທ້ໆເມື່ອມີບັນດາສະຫາຍໃນກອງບັນຊາການ ແລະຜູ້ຕາງໜ້າບັນດາອົງການທີ່ກ່ຽວຂ້ອງມາຕ້ອນຮັບຄະນະຢ່າງຄົບໜ້າຄົບຕາ. ທ່ານພັນເອກ ສີທະ ວີໄຊ ເປີດອົກເປີດໃຈວ່າ: “ເມື່ອໄດ້ຍິນວ່າມີບັນດາເພື່ອນຫວຽດນາມມາຢ້ຽມຢາມ, ພວກຂ້າພະເຈົ້າລໍຖ້າຕ້ອນຮັບຕັ້ງແຕ່ເຊົ້າດ້ວຍຄວາມດີໃຈ. ການພົບພໍ້ກັນໃນມື້ພັກຄືແນວນີ້ມີແຕ່ສະຫງວນໃຫ້ຄົນໃນຄອບຄົວເທົ່ານັ້ນ...”.

leftcenterrightdel
ພັນເອກ ບີມົວ ໄຟດາເຢຍຈາ (ຜູ້ທີ 1, ເບື້ອງຊ້າຍ) ທີ່ສູນເຕັກນິກຂອງບໍລິສັດ Star Telecom. ພາບ: ຈ້ອງຫາຍ.

ໂດຍຮູ້ມາວ່າ, ກອງບັນຊາການທະຫານນະຄອນຫຼວງວຽງຈັນ ແລະກອງບັນຊາການທະຫານນະຄອນຫຼວງຮ່າໂນ້ຍ ມີສາຍພົວພັນອັນເລິກເຊິ່ງ. ພິເສດ, ນັບແຕ່ປີ 2005 ເປັນຕົ້ນມາ, ເມື່ອສອງຝ່າຍຈັດຕັ້ງພິທີແຮກສ່ຽວຢູ່ນະຄອນຫຼວງຮ່າໂນ້ຍ ນັ້ນ, ການເຄື່ອນໄຫວສົມທົບກັນຍິ່ງນັບມື້ນັບເປັນປະຈໍາ ແລະໃກ້ຊິດຕິດແທດກວ່າ. ບໍ່ພຽງແຕ່ສົມທົບກັນໃນບັນດາເຫດການ ແລະການພົວພັນດ້ານວຽກງານເທົ່ານັ້ນ ຫາກຍັງໃນໂອກາດງານບຸນຕ່າງໆ, ບຸນປີໃໝ່, ຄອບຄົວພະນັກງານສອງຝ່າຍກໍຢ້ຽມຢາມໄປມາຫາສູ່ກັນ, ແບ່ງປັນຄວາມເບີກບານມ່ວນຊື່ນນໍາກັນດ້ວຍອາລົມຈິດອັນສະໜິດສະໜົມ. ທ່ານພົນຈັດຕະວາ ສີພອນ ຈັນສົມວົງ, ຫົວໜ້າການເມືອງກອງບັນຊາການທະຫານນະຄອນຫຼວງວຽງຈັນ ບໍ່ລື່ມອະນຸສອນຄັ້ງຫຼ້າສຸດເມື່ອມາຢ້ຽມຢາມຮ່າໂນ້ຍກົງກັບໂອກາດຕ້ອນຮັບບຸນປີໃໝ່ປະຈໍາຊາດຂອງຫວຽດນາມ: “ບຸນເຕັດປີ 2018, ຜົວເມຍພວກຂ້າພະເຈົ້າພ້ອມກັບສອງຄອບຄົວພະນັກງານຂອງກອງບັນຊາການທະຫານນະຄອນຫຼວງວຽງຈັນ ໄດ້ໄປຢ້ຽມຢາມຮ່າໂນ້ຍ ກົງກັບວັນທີ 30 ບຸນເຕັດປະຈໍາຊາດຂອງຫວຽດນາມ. ໄປຢ້ຽມຢາມຮ່າໂນ້ຍຫຼາຍເທື່ອແລ້ວ, ແຕ່ຕ້ອງມາຫວຽດນາມກົງກັບໂອກາດຕ້ອນຮັບບຸນປີໃໝ່ປະຈໍາຊາດຈຶ່ງຮູ້ສຶກໄດ້ບັນຍາກາດພິເສດ ແລະອາລົມຈິດຂອງຄອບຄົວໃນຊຸມວັນຕົ້ນປີໃໝ່ຂອງພວກເພື່ອນຫວຽດນາມໄດ້. ພວກຂ້າພະເຈົ້າມາຢາມຄອບຄົວໃດກໍເຫັນແທ່ນບູຊາບັນພະບຸລຸດ ດ້ວຍເຄື່ອງຂອງບູຊາທີ່ມີສີສັນບຸນເຕັດ.

ອໍາລາປະເທດລາວແຫ່ງສັນຕິສຸກ ແລະຮັກແຂກແພງຄົນໃນຂະນະທີ່ບຸນປີໃໝ່ປະຈຳຊາດປີກຸນ 2019 ໃກ້ຈະມາຮອດ. ຫວັງວ່າ, ອ້າຍ ສີທະ ວີໄຊ, ອ້າຍ ບີມົວ, ເອື້ອຍ ຈັນເພັງ ຈະກັບມາຢ້ຽມຢາມຫວຽດນາມ ຕາມທີ່ໄດ້ນັດໝາຍກັນ...

ໂດຍ: ໄຊຊະນະ