ADB ມີບົດບາດສໍາຄັນໃນການສົ່ງເສີມຂະແໜງການທ່ອງທ່ຽວໃນລາວ
ທະນາຄານພັດທະນາອາຊີ (ADB) ໄດ້ສະໜອງການຊ່ວຍເຫຼືອທາງດ້ານການເງິນໃຫ້ ສປປ ລາວ ແຕ່ປີ 2002 ເພື່ອສົ່ງເສີມການທ່ອງທ່ຽວເຖິງ 107,9 ລ້ານໂດລາສະຫະລັດ ໃນນີ້ລວມມີເງິນກູ້ຢືມ 50,9 ລ້ານໂດລາສະຫະລັດ ແລະເງິນຊ່ວຍເຫຼືອລ້າ 57 ລ້ານໂດລາສະຫະລັດ ໃນ 4 ໂຄງການ.
ການຊ່ວຍເຫຼືອທາງດ້ານການເງິນຈາກທະນາຄານດັ່ງກ່າວສ່ວນໃຫຍ່ແມ່ນເພື່ອພັດທະນາດ້ານພື້ນຖານໂຄງລ່າງການທ່ອງທ່ຽວ, ສິ່ງອຳນວຍຄວາມສະດວກໃນການທ່ອງທ່ຽວ ແລະບໍລິການດ້ານທ່ອງທ່ຽວໃນສູນການທ່ອງທ່ຽວຂ້າມຊາຍແດນ ແລະສົ່ງເສີມການສ້າງຄວາມເຂັ້ມແຂງໃນສະຖາບັນ ເພື່ອສົ່ງເສີມການທ່ອງທ່ຽວ. ສິ່ງເຫຼົ່ານີ້, ໄດ້ສ້າງໂອກາດທາງທຸລະກິດ ແລະປັບປຸງຄຸນນະພາບການຊີວິດຜູ້ທີ່ໄດ້ຮັບຜົນປະໂຫຍດ ແລະປະຊາຊົນທີ່ດໍາລົງຊີວິດຢູ່ໃນເຂດໂຄງການ.
ທ່ານ ຢາຊູຊິ ເນກິຊິ ຜູ້ຕາງໜ້າສຳນັກງານທະນາຄານພັດທະນາອາຊີ ປະຈຳ ສປປ ລາວ ໄດ້ໃຫ້ສຳພາດແກ່ນັກຂ່າວໃນໂອກາດທີ່ທ່ານລົງຢ້ຽມຢາມໂຄງການພັດທະນາການທ່ອງທ່ຽວແບບຍືນຍົງຂອງ ADB ເມື່ອອາທິດທີ່ຜ່ານມານີ້ວ່າ: ສປປ ລາວ ມີເງື່ອນໄຂ ແລະສິ່ງອຳນວຍຄວາມສະດວກຫຼາຍຢ່າງໂດຍສະເພາະແມ່ນເລື່ອງການທ່ອງທ່ຽວ, ມີມູນເຊື້ອປະຫວັດສາດອັນດີງາມ, ມີຮີດຄອງປະເພນີ, ວັດທະນະທຳ, ມີຊັບພະຍາກອນທຳມະຊາດທີ່ອຸດົມສົມບູນ ແລະເປັນທ່າແຮງໜຶ່ງທີ່ຈະດຶງດູດບັນດານັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາປະເທດໃຫ້ຫຼາຍຂຶ້ນ.
ທ່ານ ຢາຊູຊິ ເນກິຊິ ກ່າວວ່າ: ແຂວງອຸດົມໄຊ ແມ່ນໜຶ່ງໃນ 9 ແຂວງ ທີ່ໄດ້ຮັບການຊ່ວຍເຫຼືອດ້ານການເງິນຂອງ ADB ສໍາລັບຂະແໜງການທ່ອງທ່ຽວໃນປີ 2015-2020, ເຊິ່ງໄດ້ມີຫຼາຍໆໂຄງການທີ່ພວມຈັດຕັ້ງປະຕິບັດຢູ່ ແລະບາງໂຄງການໄດ້ສຳເລັດໄປແລ້ວ. ເຊິ່ງເປົ້າໝາຍຫຼັກຂອງ ADB ແມ່ນການສົ່ງເສີມປັບປຸງຊີວິດການເປັນຢູ່ຂອງປະຊາຊົນຜູ້ໄດ້ຮັບຜົນປະໂຫຍດຈາກໂຄງການໃຫ້ມີຊີວິດທີ່ດີຂຶ້ນ, ເຊິ່ງໂຄງການຂອງພວກເຮົາກໍໄດ້ມີຫຼາຍໆກິດຈະກຳທີ່ພວມຈັດຕັ້ງປະຕິບັດ ໂດຍສະເພາະການສ້າງຄວາມອາດສາມາດໃຫ້ຜູ້ທີ່ໄດ້ຮັບຜົນປະໂຫຍດນັ້ນເປັນຕົ້ນແມ່ນການບໍລິການພັກແຮມຢູ່ເຮືອນປະຊາຊົນ, ການເປັນຜູ້ນຳທ່ຽວ ແລະຝຶກອົບຮົມໃນເລື່ອງບໍລິການການທ່ອງທ່ຽວ, ເຊິ່ງເປັນກິດຈະກຳໜຶ່ງເຮັດໃຫ້ປະຊາຊົນທ້ອງຖິ່ນໄດ້ມີອາຊີບ ແລະສ້າງລາຍຮັບທີ່ໝັ້ນຄົງໃຫ້ແກ່ເຂົາເຈົ້າ.
ນອກຈາກນີ້, ADB ໄດ້ໃຫ້ການສະໜັບສະໜູນດ້ານການເງິນແກ່ໂຄງການພັດທະນາຕ່າງໆຊ່ວຍປັບປຸງຊີວິດການເປັນຢູ່ ຂອງປະຊາຊົນທ້ອງຖິ່ນແຂວງອຸດົມໄຊ ແລະໄດ້ຊ່ວຍໃນການພັດທະນາພື້ນຖານໂຄງລ່າງ ເພື່ອເຮັດໃຫ້ເຂົ້າເຖິງສະຖານ ທີ່ທ່ອງທ່ຽວສະດວກສະບາຍຂຶ້ນ, ເຮັດໃຫ້ບັນດານັກທ່ອງທ່ຽວໄດ້ເຂົ້າມາທ່ຽວ, ມາພັກດົນຂຶ້ນ ແລະໃຊ້ຈ່າຍຫຼາຍຂຶ້ນ. ພ້ອມສະໜອງການຝຶກອົບຮົມໃຫ້ປະຊາຊົນທ້ອງຖິ່ນກ່ຽວກັບວິທີເຮັດເຄື່ອງທີ່ລະນຶກທີ່ດີສໍາລັບຜູ້ມາຢ້ຽມຢາມ, ທ່ຽວຊົມ ແລະໃຫ້ການບໍລິການທີ່ພັກອາໃສທີ່ດີ (home stay) ໃຫ້ແກ່ບັນດານັກທ່ອງທ່ຽວນຳອີກ.
ຂ່າວ: ມະນີທອນ