ງານມະຫາກໍາບຸນຊ້າງປະຈໍາປີ 2019 ຈະມີຊ້າງເຂົ້າຮ່ວມກິດຈະກໍາ 70 ເຊືອກ
ງານມະຫາກໍາບຸນຊ້າງແຂວງໄຊຍະບູລີ ເປັນບຸນປາງໃຫຍ່ໜຶ່ງທີ່ເປັນເອກະລັກຂອງແຂວງ ແລະເປັນແຂວງດຽວທີ່ໄດ້ຈັດງານດັ່ງກ່າວພາຍໃນປະເທດລາວ, ເຊິ່ງຈະຈັດຂຶ້ນໃນເດືອນກຸມພາຂອງທຸກໆປີ. ສະເພາະປີ 2019 ແມ່ນຈະຈັດຂຶ້ນ ໃນວັນທີ 23-28 ກຸມພາ ຈະມີຊ້າງເຂົ້າຮ່ວມທັງໝົດ 70 ເຊືອກ.
ໃນວັນທີ 18 ທັນວາ 2018, ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ທັງເປັນປະທານຈັດງານມະຫາກໍາບຸນຊ້າງໄດ້ຖະແຫລງຂ່າວຕໍ່ສື່ມວນຊົນວ່າ: ງານມະຫະກໍາບຸນຊ້າງໄຊຍະບູລີ ຄັ້ງທີ 13 ຈະເລີ່ມຢ່າງເປັນທາງການແຕ່ວັນທີ 23-28 ກຸມພາ 2019 ເຊິ່ງຈະມີຊ້າງເຂົ້າຮ່ວມທັງໝົດ 70 ໂຕ.
|
|
ງານມະຫາກໍາບຸນຊ້າງປະຈໍາປີ 2017. ພາບ: vov.vn. |
ຈຸດປະສົງຂອງການຈັດງານ ກໍເພື່ອເປັນການອະນຸລັກຮັກສາຊ້າງລາວ ເພາະຊ້າງເປັນມູນມໍລະດົກຂອງຊາດເປັນມິ່ງຂວັນຄູ່ບ້ານຄູ່ເມືອງ, ທັງເປັນການສືບຕໍ່ຮັກສາວັດທະນະທຳ, ຮີດຄອງປະເພນີອັນດີງາມ ແລະວິຖີການດຳລົງຊີວິດຂອງປະຊາຊົນບັນດາເຜົ່າຂອງແຂວງໄຊຍະບູລີ ທີ່ຕິດພັນກັບຊ້າງມາແຕ່ອາດີດຕະການ ໃຫ້ຢືນຍົງຄົງຕົວຄຽງຄູ່ກັບປະຊາຊົນຕະຫລອດໄປ. ນອກຈາກນີ້, ຍັງເປັນການສົ່ງເສີມກິດຈະກໍາອະນຸລັກຊ້າງ, ໃຫ້ຊ້າງຈໍານວນ 70 ໂຕ ທີ່ມາຈາກທົ່ວແຂວງ ໄດ້ພົບກັນ, ປະສົມພັນກັນ ແລະກໍໃຫ້ເກີດການສືບພັນໃນອະນາຄົດ, ທັງເປັນເວທີການສະແດງທັກສະຄວາມສາມາດ ໃນການຄວບຄຸມຊ້າງຕໍ່ສາທາລະນະຊົນ ແລະຍັງເປັນບ່ອນແລກປ່ຽນບົດຮຽນຂອງຄວນຊ້າງ ເພື່ອສືບທອດອາຊີບລ້ຽງຊ້າງ ໃຫ້ຄົງຢູ່ຄູ່ຊາວແຂວງໄຊຍະບູລີ ຕະຫລອດໄປ.
ສໍາລັບກິດຈະກໍາຫລັກຂອງການຈັດງານແມ່ນຈະເນັ້ນໜັກກິດຈະກຳທີ່ຕິດພັນກັບຊ້າງ ແລະການອະນຸລັກຊ້າງ ໂດຍສະເພາະການສະແດງຂອງຊ້າງຄຳຮູ້, ໃນໄລຍະການຈັດງານແຕ່ລະວັນແມ່ນຈະຈັດໃຫ້ມີກິດຈະກໍາທ່ອງທ່ຽວແຫລ່ງທຳມະຊາດທີ່ສວຍງາມ, ວັດທະນະທໍາຂອງປະຊາຊົນ 8 ເຜົ່າ ທີ່ເປັນເອກະລັກຂອງແຂວງໄຊຍະບູລີ. ນອກຈາກນີ້, ຍັງມີກິດຈະກຳອື່ນໆ ເປັນຕົ້ນແມ່ນພິທີເຮັດບຸນຕັກບາດອຸທິດກຸສົນໃຫ້ຊ້າງ, ການວາງສະແດງ ແລະຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ, ສິນຄ້າກະສິກຳ, ຫັດຖະກຳ, ອຸດສາຫະກຳປຸງແຕ່ງທີ່ເປັນເອກະລັກຂອງທ້ອງຖິ່ນພາຍໃນແຂວງ, ຕ່າງແຂວງ ແລະສິນຄ້າຕ່າງໆຈາກປະເທດໃກ້ຄຽງ ເຊິ່ງຈະເປີດເປັນທາງການແຕ່ວັນທີ 20-28 ກຸມພາ 2019. ພ້ອມກັນນັ້ນ, ແຕ່ລະຄືນຈະມີການຄົບງັນ, ການສະແດງຄອນເສີດ, ສິລະປະວັນະຄະດີຈາກພາກສ່ວນຕ່າງໆ.
ຂ່າວ: ອຸ່ນເຮືອນ ໂພທິລັກ