ລີສອດປາກນໍ້າຄານ ຄອງແຊັມຊ່ວງເຮືອປະເພນີ 2018
ໃນໂອກາດບຸນອອກພັນສາປະວໍລະນາ ແລະບຸນຊ່ວງເຮືອປະເພນີ ປະຈຳປີ 2018, ຫລາຍແຂວງໃນທົ່ວປະເທດ ໄດ້ຈັດການແຂ່ງຂັນຊ່ວງເຮືອປະເພນີ ຢ່າງຄຶກຄື້ນມ່ວນຊື່ນຕິດພັນກັບຮີດຄອງປະເພນີອັນດີງາມ ຂອງຊາດລາວ. ໃນນັ້ນ, ການແຂ່ງຂັນຊ່ວງເຮືອຢູ່ເມືອງຈັນທະບູລີ, ນະຄອນຫລວງວຽງຈັນ, ໂດຍມີທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ເຈົ້າຍິງແບທຣິສ ອີລີຊາເບດ ແມຣີ ແຫ່ງຣາຊະອານາຈັກອັງກິດ, ມີການນຳພັກ-ລັດ, ອຳນາດການປົກຄອງຕະຫລອດຮອດມວນຊົນຊາວນະຄອນຫລວງວຽງຈັນ ເຂົ້າຮ່ວມຊົມ, ຮ່ວມເຊຍຢ່າງຫລວງຫລາຍ.
|
|
ພາບປະກອບຈາກ: nhandan.com.vn. |
ການແຂ່ງຂັນໃນຄັ້ງນີ້, ປະກອບມີເຮືອປະເພນີຊາຍ 7 ລຳ, ເຮືອປະເພນີຍິງ 5 ລຳ ແລະເຮືອສູດຊາຍ 5 ລຳ ແລະເຮືອກິລາ 12 ສີພາຍ 6 ລຳ. ຜ່ານການແຂ່ງຂັນສາມາດສະຫລຸບໄດ້ຄື: ເຮືອຊະນະເລີດອັນດັບທີ 1 ເຮືອປະເພນີຊາຍໄດ້ແກ່ເຮືອລີສອດປາກນໍ້າຄານໄດ້ຮັບຂັນເງິນໜັກ 1 ກິໂລກຼາມ, ພ້ອມເງິນລາງວັນ 20 ລ້ານກີບ; ອັນດັບທີ 2 ໄດ້ແກ່ເຮືອ ທະນາຄານຮ່ວມພັດທະນາໄດ້ຮັບຂັນເງິນໜັກ 0,75 ກິໂລກຼາມພ້ອມເງິນລາງວັນ 15 ລ້ານກີບ, ອັນດັບທີ 3 ໄດ້ແກ່ເຮືອພອນສະຫວັນ 99 ໄດ້ຮັບຂັນເງິນໜັກ 0,5 ກິໂລກຼາມ ພ້ອມເງິນລາງວັນ 10 ລ້ານກີບ. ສຳລັບເຮືອປະເພນີຍິງອັນດັບທີ 1 ໄດ້ແກ່ເຮືອບໍລິສັດແສງເພັດກໍ່ສ້າງ, ອັນດັບທີ 2 ໄດ້ແກ່ເຮືອທ່າພະ ແລະອັນດັບ 3 ໄດ້ແກ່ເຮືອບໍລິສັດພັນທະວົງ. ສຳລັບ ລາງວັນແມ່ນຄືກັນກັບເຮືອປະເພນີຊາຍ. ສ່ວນເຮືອສູດຊາຍອັນດັບທີ 1 ໄດ້ແກ່ເຮືອກຸ່ມທຸລະກິດຊ້າງເພັດໄດ້ຮັບຂັນເງິນໜັກ 1 ກິໂລກຼາມ ພ້ອມເງິນລາງວັນ 15 ລ້ານກີບ, ອັນດັບທີ 2 ໄດ້ແກ່ເຮືອບໍລິສັດແສງເພັດກໍ່ສ້າງ ໄດ້ຮັບຂັນເງິນໜັກ 0,75 ກິໂລກຼາມ ພ້ອມເງິນລາງວັນ 10 ລ້ານກີບ, ອັນດັບທີ 3 ໄດ້ແກ່ເຮືອພອນແກ້ວ ໄດ້ຮັບຂັນເງິນໜັກ 0,5 ກິໂລກຼາມ ພ້ອມເງິນລາງວັນ 5 ລ້ານກີບ.
|
|
ພາບປະກອບຈາກ: nhandan.com.vn. |
ສ່ວນເຮືອກິລາ 12 ສີພາຍອັນດັບ 1 ໄດ້ແກ່ເຮືອເທບພິສິດ (ບ້ານນາລ້ອງ) ໄດ້ຮັບຂັນລາງວັນພ້ອມເງິນລາງວັນ 10 ລ້ານກີບ, ອັນດັບທີ 2 ໄດ້ແກ່ ເຮືອກຸ່ມທຸລະກິດຊ້າງເພັດ 1 ໄດ້ຮັບຂັນລາງວັນພ້ອມເງິນລາງວັນ 8 ລ້ານກີບ ແລະອັນດັບ 3 ເຮືອນາວາສັກສິດ ໄດ້ຮັບຂັນລາງວັນພ້ອມເງິນລາງວັນ 6 ລ້ານກີບ.
ຂ່າວ: ກິດຕາ