ໂຄສະນາການທ່ອງທ່ຽວຫວຽດນາມ ຢູ່ ຄູເວດ
ວັນທີ 12 ທັນວາ, ທີ່ສຳນັກງານຫ້ອງການການຄ້າ ແລະອຸດສາຫະກຳ ຄູເວດ (KCCI) ໄດ້ດຳເນີນກອງປະຊຸມສຳມະນາ “ການທ່ອງທ່ຽວຫວຽດນາມ - ກາລະໂອກາດໃຫ້ບັນດາບໍລິສັດການທ່ອງທ່ຽວຄູເວດ” ໂດຍສະຖານທູດຫວຽດນາມ ປະຈຳຄູເວດ ແລະ KCCI ຮ່ວມກັນຈັດຕັ້ງ.
ທີ່ກອງປະຊຸມສຳມະນາ, ບັນດາຜູ້ແທນໄດ້ຮັບຟັງຜູ້ຕາງໜ້າຂອງບໍລິສັດ Viettravel ແນະນຳກ່ຽວກັບການທ່ອງທ່ຽວຢູ່ຫວຽດນາມ, ຄວາມສາມາດບົ່ມຊ້ອນ ແລະການເຕີບໂຕໃນຊຸມປີຜ່ານມາ ແລະບັນດາຜະລິດຕະພັນການທ່ອງທ່ຽວແນໃສ່ຕອບສະໜອງຄວາມຕ້ອງການຂອງແຫຼ່ງນັກທ່ອງທ່ຽວລະດັບສູງທີ່ມາຈາກ ຄູເວດ ແລະບັນດາປະເທດເຂດອ່າວ. ກອງປະຊຸມສຳມະນາ ກໍ່ໄດ້ຮັບຟັງຜູ້ຕາງໜ້າຂອງບໍລິສັດ Emirates Airlines ແລະ Quatar Airways ແນະນຳບັນດາສາຍການບິນຂອງ 2 ບໍລິສັດການບິນຈາກ ຄູເວດ ໄປຍັງຫວຽດນາມ ແລະຄວາມສາມາດໜູນຊ່ວຍລາຄາຊື້ປີ້ຍົນສຳລັບບັນດາ tour ໄປຈາກຄູເວດ.
|
|
ຜູ້ແທນເຂົ້າຮ່ວມກອງປະຊຸມສຳມະນາ. ພາບ: cand.com.vn. |
ພາຍຫລັງກອງປະຊຸມສຳມະນາ, ສະຖານທູດຫວຽດນາມ ປະຈຳ ຄູເວດ ໄດ້ສົມທົບກັບ Viettravel ແລະ Souk Safa - ບໍລິສັດທ່ອງທ່ຽວໃຫຍ່ທີ່ສຸດຂອງຄູເວດ ຈັດຕັ້ງການເຄື່ອນໄຫວໂຄສະນາໂດຍກົງເຖິງປະຊາຊົນຄູເວດ ຄື: ແນະນຳບັນດາ tour ທ່ອງທ່ຽວດ້ວຍລາຄາຖືກ, ແນະນຳອາຫານການກິນ ແລະລາຍການດົນຕີພື້ນເມືອງຫວຽດນາມ ຢູ່ Avenues Mall – ສູນການຄ້າໃຫຍ່ສຸດຂອງຄູເວດ ດ້ວຍຈຳນວນແຂກ 600.000 ຄົນ/ອາທິດ.
ຂ່າວຈາກ: vovworld.vn