ກຳແພງເມືອງຈີນ ເປັນສະຖານທີ່ທ່ອງທ່ຽວທາງດ້ານປະຫວັດສາດ ແລະເປັນສິ່ງມະຫັດສະຈັນຂອງໂລກ
ເມື່ອເວົ້າເຖິງສິ່ງມະຫັດສະຈັນຂອງໂລກໜຶ່ງໃນສິ່ງດັ່ງກ່າວ, ກໍ່ຄືກໍາແພງເມືອງຈີນ ຫລື ກຳແພງຍັກທີ່ຫລາຍຄົນໄດ້ຂະໜານນາມກັນໄປ, ໃນຂະນະດຽວກັນກໍ່ໄດ້ມີຫລາຍລ້ານຄົນໄປຮອດໄປເຖິງ ແລະໄດ້ສຳພັດກັບບັນຍາກາດຊົມວິວທິວທັດທຳມະຊາດເທິງພູເຂົາ, ຄົດໂຄ້ງໂງເງທີ່ສວຍງາມຍາກທີ່ຈະພັນລະນາໄດ້ ແລະກໍ່ຍັງມີອີກຫລາຍລ້ານຊີວິດທີ່ຍັງບໍ່ມີໂອກາດໄດ້ໄປຮອດຈອດເຖິງກຳແພງດັ່ງກ່າວນີ້ໄດ້, ແນວໃດກໍ່ມີຜູ້ຂຽນຈະພາມາຮູ້ຈັກກັບປະຫວັດຄວາມເປັນມາຂອງກຳແພງເມືອງຈີນ ບາງຈຸດນ້ອຍໆ ເທົ່າທີ່ໄດ້ໄປຮູ້ເຫັນ ແລະຟັງມາເວົ້າເລົ່າຊູ່ຟັງ.
ກຳແພງເມືອງຈີນໄດ້ສ້າງຂຶ້ນໃນຣາຊະວົງໂຈ ຫຼື ປະມານ 3 ພັນປີກ່ອນສ້າງດ້ວຍຫີນພູ, ຫີນຜາ, ປູດ້ວຍຫີນ, ສ້າງເປັນຈຸດເປັນປ້ອມທີ່ຄົດໂຄ້ງເງໄປຕາມສັນພູ ແລະຈອມພູສູງ ຢ່າງມີສິລະປະ ແລະເອກະລັກວັດທະນະທຳຂອງຊາວຈີນ. ຕົກມາໃນປີ 221 ກ່ອນຄິສຕາຈັກ ອິນຊີຮອງເຕ້ ໄດ້ທ້ອນໂຮມປະເທດເປັນອັນໜຶ່ງອັນດຽວກັນ, ໄດ້ມີກຳລັງພົນທີ່ເຂັ້ມແຂງ ແລະໄດ້ສົ່ງກຳລັງພົນຢ່າງຫຼວງຫຼາຍ ເພື່ອໄປກໍ່ສ້າງກຳແພງດັ່ງກ່າວໃຫ້ເຊື່ອມຈອດກັນ, ໂດຍມີຄວາມຍາວປະມານ 21.196 ກິໂລແມັດ ເພື່ອປ້ອງກັນຂ້າເສີກເຂົ້າມາຮຸກຮານ, ເນື່ອງຈາກວ່າທາງໃຕ້ຂອງກຳແພງເມືອງຈີນ ແມ່ນເຜົ່າທີ່ທຳການຜະລິດກະສິກຳ, ປູກຝັງລ້ຽງສັດ, ສ່ວນຢູ່ທາງເໜືອແມ່ນເຜົ່າລ້າສັດ, ເມື່ອເຖິງຍາມລະດູໜາວເຜົ່າລ້າສັດອາຫານບໍ່ພຽງພໍ, ຂາດສະບຽງອາຫານ, ແມ່ນໄດ້ເຂົ້າມາປຸ້ນສະດົມເຜົ່າທີ່ຢູ່ທາງໃຕ້ ເຊັ່ນ: ຍາດຜູ້ຍິງ, ປຸ້ນເອົາຊັບສິນ, ປຸ້ນເອົາສະບຽງອາຫານ ແລະອື່ນໆ.
ກຳແພງເມືອງຈີນນອກຈາກເປັນສິ່ງປ້ອງກັນຈາກຂ້າເສີກແລ້ວດ້ານສັນກຳແພງຍັງໃຊ້ເປັນບ່ອນເກັບມ້ຽນສະບຽງອາຫານ ແລະ ອາວຸດເສີກຕ່າງໆ ເພື່ອໃຊ້ໃນການໂຈມຕີສັດຕູທີ່ມາຮຸກຮານ. ກຳແພງເມືອງຈີນ, ໃນສະໄໝບໍ່ມີດິນໝື້ ແລະລະເບີດຖືວ່າກຳແພງທີ່ດີແໜ້ນໜາສາມາດປ້ອງກັນຂ້າເສີກໄດ້ເປັນຢ່າງດີ.
|
|
ກຳແພງເມືອງຈີນ. ພາບ: kpl.gov.la. |
ມາເຖິງຣາຊະວົງມິງ ກໍ່ໄດ້ມີການກໍ່ສ້າງ ແລະປັບປຸງກຳແພງເມືອງຈີນທີ່ຊຸດໂຊມຕື່ມອີກ, ເວົ້າລວມແລ້ວຕະຫຼອດໄລຍະ 3 ພັນປີຜ່ານມາຄົນຈີນແມ່ນໄດ້ມີການປັບປຸງ ແລະພັດທະນາກຳແພງເມືອງຈີນມາໂດຍຕະຫຼອດ. ກຳແພງເມືອງຈີນເປັນທີ່ຮູ້ຈັກ ແລະມີຊື່ສຽງເປັນສິ່ງມະຫັດສະຈັນຂອງໂລກ ກໍ່ຍ້ອນວ່າເມື່ອ 3 ພັນປີກ່ອນໃນສະໄໝນັ້ນກຳລັງພົນ ແລະປະຊາກອນຍັງບໍ່ຫຼວງຫຼາຍ, ແຕ່ກໍ່ສາມາດເຕົ້າໂຮມກຳລັງພົນມາສ້າງກຳແພງໄດ້. ນີ້ສະແດງໃຫ້ເຫັນເຖິງນໍ້າໃຈຄວາມສາມັກຄີທີ່ຍິ່ງໃຫຍ່ ແລະມີຄວາມເສຍສະຫຼະສູງ. ດັ່ງນັ້ນ, ຈຶ່ງຖືວ່າເປັນສິ່ງມະຫັດສະຈັນທີ່ສຸດຂອງໂລກ.
ມາເຖິງປັດຈຸບັນກຳແພງເມືອງຈີນ ໄດ້ມີການພັດທະນາສິ່ງໃໝ່ໆເກີດຂຶ້ນ ແລະໄດ້ກາຍເປັນສະຖານທີ່ທ່ອງທ່ຽວທີ່ສຳຄັນທາງດ້ານປະຫວັດສາດ, ເປັນສິ່ງມະຫັດສະຈັນຂອງໂລກ, ໃຫ້ຄົນລຸ້ນຫລັງໄດ້ສຶກສາຄົ້ນຄວ້າຮໍ່າຮຽນ ແລະສິ່ງສຳຄັນແມ່ນສາມາດສ້າງລາຍຮັບອັນມະຫາສານມາສູ່ປະເທດຊາດນຳອີກ. ດັ່ງນັ້ນ, ເມື່ອທ່ານໃດມີໂອກາດໄດ້ໄປທ່ອງທ່ຽວປະເທດຈີນ ຂໍເຊີນຊວນທ່ານໄປສຳພັດກັບບັນຍາກາດທິວທັດທຳມາຊາດທີ່ສວຍງາມຂອງກຳແພງເມືອງຈີນ, ພູຜາສູງຊັນ, ຕ່ຳສູງສະຫລັບຊັບຊ້ອນກັນໄປ ແລະຮັບຮອງວ່າທ່ານຈະບໍ່ຜິດຫວັງຢ່າງແນ່ນອນ.
ຂ່າວ: ຂປລ