ໄຂງານບຸນລະດູບານໃໝ່ ອຽນຕື ປີຈໍ 2018
ກປ.ອອນໄລ - ວັນທີ 25 ກຸມພາ, ທີ່ເດີ່ນຈັດພີທີງານບຸນ ອຽນຕື ຂຶ້ນກັບສູນວັດທະນະທໍາ ຈຸກເລີມອຽນຕື, ນະຄອນ ອວງບີ໋, ແຂວງ ກວາງນິງ ໄດ້ດໍາເນີນພີທີໄຂງານບຸນລະດູບານໃໝ່ ອຽນຕື ປີ 2018.
ງານບຸນປີນີ້ມີຂະໜາດໃຫຍ່ກວ່າທຸກປີ, ດ້ວຍພິທີທີ່ເຄັ່ງຂຶມ ແລະງານບຸນທີ່ຄຶກຄັກມ່ວນຊື່ນ, ສ່ວນກອນລຳໄດ້ຮັບການລົງທຶນຢ່າງລະອຽດລະອໍວາດພາບໃຫ້ເຫັນຊີວິດແຫ່ງການຖືສິນກິນບວດຂອງພະພຸດທະເຈົ້າ ເຈີ່ນເຍີນຕົງ. ງານບຸນນີ້ແມ່ນນອນໃນບັນດາການເຄື່ອນໄຫວທີ່ຕອບສະໜອງປີທ່ອງທ່ຽວແຫ່ງຊາດ 2018 ໂດຍແຂວງ ກວາງນິງ ເປັນເຈົ້າພາບ.
|
|
ງານບຸນລະດູບານໃໝ່ ອຽນຕື. ພາບ: ສໍານັກຂ່າວສານຫວຽດນາມ. |
ໃນຂອບເຂດງານບຸນໄດ້ດໍາເນີນການເຄື່ອນໄຫວວັດທະນະທໍາສິລະປະຫຼາຍຢ່າງຄື, ຕີໄກ່, ດຶງເຊືອກ, ໂຍນໝາກຄອນ, ການປັກແສ່ວຫັດຖະກໍາ, ບັນດາວາດຟ້ອນທີ່ເປັນມູນເຊື້ອຂອງຊົນເຜົ່າ ຢາວແທງອີ ຢູ່ ອຽນຕື... ການແຂ່ງຂັນໝາກເສິກ ອຽນຕື; ການສະແດງສິລະປະຢູ່ຂົວ ຖຸຍດິ່ງ, ຫ້ວຍ ຢ້າຍອວານ; ການວາງສະແດງດອກເໝີຍສີເຫຼືອງ ອຽນຕື...
ປີ 2017 ງານບຸນລະດູບານໃໝ່ ອຽນຕື ໄດ້ດຶງດູດແຂກມາຢ້ຽມຊົມ ແລະດໍາເນີນຊີວິດທາງສາສະໜາປະມານ 1,5 ລ້ານເທື່ອຄົນ. ປີນີ້ດ້ວຍການປ່ຽນແປງໃໝ່ກ່ຽວກັບທັດສະນີຍະພາບ ແລະການຈັດຕັ້ງ, ແຂວງ ກວາງນິງ ມີຄວາມມຸ່ງຫວັງວ່າຈະຕ້ອນຮັບແຂກທ່ອງທ່ຽວມາ ອຽນຕື ປະມານ 2 ລ້ານເທື່ອຄົນ.
ແປໂດຍ: ເກື່ອງດັ້ງ