ເສັ້ນທາງໄປແຕ່ໃຈກາງຕາແສງ ຈ່າເວີນ ເຂົ້າເຂດຕັ້ງຖິ່ນຖານຄົງທີ່ຄືນໃໝ່ຂອງບ້ານ 2 ກິ່ວຊັນ, ທຸລະກັນດານ. ລົດ Zil 131 ໂດຍຮ້ອຍຕີທະຫານວິຊາການ ຫງວຽນແທງອານ ເປັນຜູ້ຂັບລົດ, ບໍ່ສາມາດໄປໄດ້ອີກ. ຕອນນີ້, ບັນດາສະມາຊິກໃນຄະນະປະຕິບັດງານນັບແຕ່ ທ່ານພົນຕີ ເຈີ່ນກວາງເຟືອງ, ກໍາມະການສູນກາງພັກ, ຫົວໜ້າການເມືອງທະຫານເຂດ 5, ຕະຫຼອດຮອດບັນດານັກຮົບຂອງກອງພັນໃຫຍ່ 143, ກອງພົນ 315 ສົ່ງໄປຊ່ວຍລ້ວນແລ້ວແຕ່ຈ້ອນຂາໂສ້ງຍ່າງລຸຍຕົມໄປ... ໄປຜ່ານບ້ານອົງຕ໋ວນ, ອົງວິງ... ຂ້າພະເຈົ້າໄດ້ເຫັນເຄື່ອງໃຊ້ຫຼາຍຢ່າງຄື, ໝໍ້ແຫກແຕກໂປະ, ເສື້ອໂສ້ງເກົ່າຖືກຂີ້ດິນຖົມ.
ບັນດາເຮືອນຢູ່ເປີ້ນພູໄດ້ຮື້ມ້າງອອກ ເພື່ອເອົາໄປປຸກບ່ອນຢູ່ໃໝ່. ບັນດາຕູບຜ້າບັດທີ່ກອງບັນຊາການແຂວງກວາງນາມ ແລະກອງພົນ 315 ສ້າງຂຶ້ນເປັນບ່ອນຕັ້ງທັບ, ຮັບໃຊ້ໃນການຍົກຍ້າຍ ແລະສ້າງເຮືອນຊ່ວຍພໍ່ແມ່ປະຊາຊົນ.
ຕາມທາງໄປ, ອ້າຍ ໂຮ່ວັນຕວນ, ນາຍບ້ານ ອົງຕວນ, ແບ່ງປັນດ້ວຍນໍ້າສຽງສັ່ນໆວ່າ, ຕອນບ່າຍວັນທີ 6 ພະຈິກ, ດິນ, ຫີນຫຼາຍພັນແມັດກ້ອນຈາກບັນດາໜ່ວຍພູໄດ້ເຊາະເຈື່ອນລົງມາຖົມເຮືອນ 4 ຫຼັງ. ຫຼາຍມື້ລຽນກັນມານີ້ພໍ່ແມ່ປະຊາຊົນມີຄວາມຫວາດຫວັ່ນເສຍຂວັນ, ຕອນກາງຄືນບໍ່ມີໃຜກ້ານອນຍ້ອນຢ້ານພູເຊາະເຈື່ອນລົງມາ. ໂຊກດີທີ່ມີບັນດາອາວທະຫານມາຊ່ວຍໄດ້ທັນ, ຖ້າບໍ່ດັ່ງນັ້ນພໍ່ແມ່ປະຊາຊົນບໍ່ຮູ້ວ່າຊິໄປທາງໃດ.
ໃກ້ຈະຮອດຕອນທ່ຽງ, ພວກຂ້າພະເຈົ້າຈື່ງມາຮອດຮ່ວມພູ ລຸງຈື, ຢູ່ທີ່ນີ້, ພະນັກງານ, ນັກຮົບບັນດາກົມກອງ, ກອງບັນຊາການແຂວງກວາງນາມ, ກອງພົນ 315 ເສື້ອໂສ້ງປຽກດ້ວຍນໍ້າເຫື່ອແຕ່ວ່າໃຜກໍ່ລ້ວນແຕ່ສຸມໃສ່ໜ້າທີ່ຊ່ວຍເຫຼືອປະຊາຊົນ.
ມີໜ້າແຕ່ວັນທີທໍາອິດຜູ້ບັນຊາການທະຫານຊ່ວຍເຫຼືອປະຊາຊົນ, ສະຫາຍພັນເອກ ເຈີ່ນມິງເຮືອງ, ຮອງຫົວໜ້າເສນາທິການກອງບັນຊາການທະຫານແຂວງກວາງນາມ, ເຂົ້າໃຈຄວາມທຸກຍາກທີ່ພໍ່ແມ່ປະຊາຊົນໄດ້ຜ່ານມາ. ອ້າຍເວົ້າວ່າ, ໃນຕະຫຼອດເວລາພູເຊາະເຈື່ອນມາຮອດປະຈຸບັນ, ກົມກອງໄດ້ຈັດສົ່ງພະນັກງານ, ນັກຮົບກວ່າ 400 ເທື່ອຄົນສົມທົບກັບກໍາລັງຂອງກອງພົນນ້ອຍທະຫານຊ່າງ 270 ຕັ້ງໜ້າໃກ້ຊິດຕິດແທດສະຖານທີ່ເກີດເຫດ, ປົດປ່ອຍໜ້າທາງ, ປຸກສ້າງເຮືອນຢູ່ຊົ່ວຄາວ 20 ຫຼັງ; ຂົນສົ່ງເຮືອນປະຊາຊົນ 100 ຫຼັງມາເຂດຕັ້ງຖິ່ນຖານຄືນໃໝ່.
ສະຫາຍພັນເອກ ດິງວັນມິງ, ຮອງຫົວໜ້າກອງພົນ 315, ໄດ້ແບ່ງບັນກັບພວກຂ້າພະເຈົ້າວ່າ: ຜູ້ບັນຊາການທະຫານເຂດໄດ້ຊີ້ນໍາວ່າ, ປຸກສ້າງເຮືອນຢ່າງຮີບດ່ວນ ເພື່ອໃຫ້ພໍ່ແມ່ປະຊາຊົນໄດ້ຕ້ອນຮັບບຸນເຕັດປີຈໍ. ຍ້ອນເຫດນັ້ນ, ພວກຂ້າພະເຈົ້າຕ້ອງແຂ່ງກັບເວລາ, ອອກເຫື່ອແຮງຜັນຂະຫຍາຍໂດຍໄວ, ພະຍາຍາມປຸກສ້າງເຮືອນໃຫ້ແລ້ວ 116 ຫຼັງ ເພື່ອໃຫ້ພໍ່ແມ່ປະຊາຊົນໄດ້ຕ້ອນຮັບລະດູບານໃໝ່.
    |
 |
|
ພະນັກງານ, ນັກຮົບກອງບັນຊາການທະຫານແຂວງ ກວາງນາມ ປະຊາຊົນບ້ານ 2, ຕາແສງ ຈ່າເວີນ, ເມືອງ ນາມຈ່າມີ, ແຂວງ ກວາງນາມ ຍົກຍ້າຍເຮືອນ. ພາບ: ຟານຕ໋ຽນຢູງ. |
ເພື່ອແກ້ໄຂໄດ້ວຽກງານທີ່ມາກມາຍກ່າຍກອງນັ້ນ, ທະຫານບັນດາກົມກອງຂອງທະຫານເຂດ 5 ບໍ່ໄດ້ຫຼັບນອນມາເປັນເວລາຫຼາຍຄືນ. ນັກຮົບຫຼາຍຄົນກໍ່ເປັນໄຂ້, ຂຸມຕາຂຽວຊໍ້າແຕ່ວ່າຍັງໜຶ່ງມື້ໜຶ່ງຄືນປະຕິບັດໜ້າທີ່.
ທ່ານພັນເອກ ຮວີ່ງກວາງທິ້ງ, ຫົວໜ້າກອງຮ້ອຍ 2, ກອງພັນ 17, ກອງພົນ 315, ໄດ້ອົດຄວາມເຈັບກະເພາະ, ໃກ້ຊິດຕິດແທດສະຖານທີ່ເກີດເຫດຢູ່ເຂດຕັ້ງຖິ່ນຖານຄົງທີ່ຄືນໃໝ່, ສະຫາຍພັນເອກ ຈິ້ງກຽມເຍີນ, ກອງພັນເສນາຮັກ 24, ກອງພົນ 315, ໄດ້ແບ່ງປັນວ່າ: ຕອນກາງເວັນ, ພວກຂ້າພະເຈົ້າພ້ອມກັບເພື່ອນຮ່ວມກົມກອງຊ່ວຍເຫຼືອພໍ່ແມ່ປະຊາຊົນປຸກສ້າງເຮືອນໃໝ່, ຕອນຄໍ່າກໍ່ໄປກວດພະຍາດໃຫ້ປະຊາຊົນຢູ່ຕາມແຕ່ລະຫຼັງຄາເຮືອນ. ເຖິງວ່າດິນຟ້າອາກາດບໍ່ສະດວກແຕ່ພວກຂ້າພະເຈົ້າຍາມໃດກໍ່ຍົກສູງຄວາມຕັດສິນໃຈ, ເສີມຂະຫຍາຍນໍ້າໃຈເປັນເຈົ້າການ, ເຮັດຢ່າງຮີບດ່ວນ, ມີປະສິດທິຜົນ, ພະຍາຍາມປະຕິບັດສໍາເລັດກ່ອນປີໃໝ່ປະຈໍາຊາດ.
ຂອບໃຈຢ່າງສຸດຊື້ງຕໍ່ນ້ຳໃຈຂອງພະນັກງານ, ນັກຮົບທະຫານເຂດ 5, ທ່ານ ໂຮ່ວັນວ່າງ (ອາຍຸ 70 ປີ) ເບິ່ງເຮືອນທີ່ກໍາລັງປຸກສ້າງເປັນຮູບເປັນຮ່າງຢູ່ພື້ນດິນໃໝ່. ທ່ານເວົ້າດ້ວຍຄວາມສະເທືອນໃຈວ່າ, ປະຊາຊົນ ກາຢອງ ຂອບໃຈທະຫານລຸງໂຮ່ຫຼາຍໆ. ຫວ່າງບໍ່ດົນມານີ້, ບັນດາເຮືອນປະຊາຊົນຍັງເກິ່ງເດິ່ງຢູ່ໜ້າຜາບ້ານເກົ່າ, ແຕ່ວ່າດຽວນີ້ໄດ້ນໍາມາຕັ້ງຢູ່ເຂດຕັ້ງຖິ່ນຖານຄືນໃໝ່. ປີນີ້, ພໍ່ແມ່ປະຊາຊົນຕ້ອນຮັບລະດູບານໃໝ່, ຕ້ອນຮັບບຸນເຕັດຢ່າງເບີກບານມ່ວນຊື່ນຫາກບໍ່ແມ່ນມີຄວາມເປັນຫ່ວງຍ້ອນພູເຊາະເຈື່ອນ, ເຮືອນພັງລົງອີກແລ້ວ...
ແປໂດຍ: ເກື່ອງດັ້ງ