ໃນຊຸມປີຜ່ານມາ, ດ້ວຍວິທີການເຮັດວຽກທີ່ດີ, ມີຫົວຄິດປະດິດສ້າງຫຼາຍຢ່າງ, ກອງບັນຊາການທະຫານແຂວງ ຊ໊ອກຈັງ ໄດ້ຜັນຂະຫຍາຍປະຕິບັດຂະບວນການ “ກອງທັບຮ່ວມແຮງຮ່ວມໃຈກໍ່ສ້າງຊົນນະບົດໃໝ່” ຢ່າງມີປະສິດທິຜົນ, ຜ່ານນັ້ນ, ປະກອບສ່ວນເຮັດໃຫ້ໂສມໜ້າບ້ານເມືອງມີການປ່ຽນແປງ, ຍົກສູງຊີວິດທາງດ້ານວັດຖຸ ແລະຈິດໃຈໃຫ້ພໍ່ແມ່ປະຊາຊົນຢູ່ທີ່ນີ້.

ສັນຍາລັກແຫ່ງນໍ້າໃຈທະຫານກັບປະຊາຊົນ

ໄປລຽບຕາມເສັ້ນທາງເມືອງ ເລກທີ 50 ທີ່ຫາກໍ່ເປີດນໍາໃຊ້ທີ່ເຊື່ອມຕໍ່ບັນດາບ້ານຂອງຕາແສງ ຢາຮວ່າ 2 ກັບທາງຫຼວງ ເລກ 1A, ທຸກຄົນລ້ວນແຕ່ຮູ້ສຶກໄດ້ການປ່ຽນແປງໃນເຂດບ້ານນາທີ່ເຕັມໄປດ້ວຍມູນເຊື້ອປະຕິວັດຂອງເມືອງ ໝີຊວຽນ.

ເພື່ອໄດ້ຮັບການຮັບຮອງວ່າເປັນຕາແສງຊົນນະບົດໃໝ່, ປະຊາຊົນຕາແສງ ຢາຮວ່າ ຍາມໃດກໍ່ເວົ້າເຖິງການປະກອບສ່ວນ, ຊ່ວຍເຫຼືອຂອງພະນັກງານ, ນັກຮົບກໍາລັງປະກອບອາວຸດແຂວງ ຊ໊ອກຈັງ, ໂດຍສະເພາະແມ່ນການກໍ່ສ້າງສໍາເລັດ ແລະເປີດນໍາໃຊ້ທາງເບຕົງເຊື່ອມຕໍ່ລະຫວ່າງບ້ານ, ຕາແສງ. ເມື່ອພົບປະກັບພວກຂ້າພະເຈົ້າ, ທ່ານ ເລວັນຮ່ຽນ, ອາຍຸ 86 ປີ ຢູ່ບ້ານ ແທງຮວ່າ (ຕາແສງ ຢາຮວ່າ) ແບ່ງປັນວ່າ: “ບ້ານເມືອງປ່ຽນແປງໃໝ່ກໍ່ຍ້ອນມີການຊ່ວຍເຫຼືອອັນໃຫຍ່ຫຼວງຂອງບັນດາອາວທະຫານໃນແຂວງ”, ບັນດາກິດຈະການກໍ່ສ້າງຮັບໃຊ້ຊົນນະບົດໃໝ່ສ່ວນຫຼາຍລ້ວນແຕ່ມີການປະກອບເຫື່ອແຮງຂອງທະຫານ. ພໍ່ແມ່ປະຊາຊົນຢູ່ທີ່ນີ້ໃຜກໍ່ດີໃຈຕໍ່ຊີວິດໃໝ່ເຊິ່ງໄດ້ຮັບການສ້າງຂຶ້ນຈາກການຮ່ວມແຮງຮ່ວມໃຈຂອງທະຫານລຸງໂຮ່. ບັນດາວຽກງານທີ່ທະຫານເຮັດນັ້ນໄດ້ສ້າງຂີດໝາຍຢູ່ບ້ານເມືອງພວກຂ້າພະເຈົ້າ ແລະປະກອບສ່ວນຮັດແໜ້ນສາຍພົວພັນສາມັກຄີລະຫວ່າງທະຫານ ແລະປະຊາຊົນ.

leftcenterrightdel
ກໍາລັງປະກອບອາວຸດແຂວງ ຊ໊ອກຈັງ ຊ່ວຍເຫຼືອປະຊາຊົນກໍ່ສ້າງທາງຢູ່ຕາແສງ ທາມດົນ, ເມືອງ ໝີຊວຽນ. ພາບ: ແທງນາມ.

ພ້ອມກັບການຊ່ວຍເຫຼືອບັນດາທ້ອງຖິ່ນກໍ່ສ້າງພື້ນຖານໂຄງລ່າງ, ກໍາລັງປະກອບອາວຸດແຂວງ ຊ໊ອກຈັງ ຍັງສົມທົບກັນຜັນຂະຫຍາຍປະຕິບັດ 67 ຮູບແບບພັດທະນາການຜະລິດ, ດໍາເນີນທຸລະກິດ, ສ້າງບາດກ້າວບຸກທະລຸໃນການພັດທະນາເສດຖະກິດຢູ່ທ້ອງຖິ່ນ.

ປະສິດທິຜົນຈາກບັນດາວິທີການເຮັດວຽກທີ່ດີ

ເພື່ອຮ່ວມແຮງຮ່ວມໃຈຊ່ວຍເຫຼືອປະຊາຊົນກໍ່ສ້າງຊົນນະບົດໃໝ່, ກອງບັນຊາການທະຫານແຂວງ ຊ໊ອກຈັງ ກໍານົດຕ້ອງມີຫຼາຍວິທີການເຮັດວຽກທີ່ດີ, ມີຫົວຄິດປະດິດສ້າງ, ສອດຄ່ອງກັບເງື່ອນໄຂສະພາບການຢ່າງລະອຽດ. ຕາມນັ້ນແລ້ວ, ກອງບັນຊາການທະຫານແຂວງ ໄດ້ສຸມໃສ່ກໍ່ສ້າງແກນສານໃນແຕ່ລະຂະບວນການ, ວຽກງານຊ່ວຍເຫຼືອປະຊາຊົນ. ທໍາອິດ, ກອງບັນຊາການທະຫານແຂວງ ຊີ້ນໍາອົງການທະຫານທຸກຂັ້ນສົມທົບກັບຄະນະພັກ, ອໍານາດການປົກຄອງທ້ອງຖິ່ນຄັດເລືອກ, ກໍ່ສ້າງຄອບຄົວຊົນນະບົດໃໝ່ດ້ວຍບັນດາມາດຖານລະອຽດ, ກ່ອນອື່ນໝົດແມ່ນສຸມໃສ່ຖັນແຖວພະນັກງານ, ສະມາຊິກພັກ; ກໍາລັງທະຫານລາດປ້ອງກັນຕົວ, ກໍາລັງສໍາຮອງໃນແຕ່ລະບໍລິເວນ. ແລກປ່ຽນບົດຮຽນໃນການປະຕິບັດຂະບວນການກໍ່ສ້າງຊົນນະບົດໃໝ່ຢູ່ຕາແສງ ທາມດົນ ແລະຕາແສງ ດ້າຍເຕິມ ຂອງເມືອງ ໝີຊວຽນ (ແຂວງ ຊ໊ອກຈັງ), ທ່ານພັນເອກ ເຢືອງວັນບຽນ, ຫົວໜ້າການເມືອງກອງພັນໃຫຍ່ 897, ໃຫ້ຮູ້ວ່າ: “ພາຍຫຼັງລົງນາມກັບບັນດາທ້ອງຖິ່ນ, ກົມກອງດໍາເນີນການສໍາຫຼວດແຕ່ລະມາດຖານ, ພ້ອມທັງກໍານົດເຮັດບ່ອນໃດໃຫ້ສໍາເລັດບ່ອນນັ້ນ. ບົນພື້ນຖານບັນດາມາດຖານທີ່ໄດ້ກໍານົດແລ້ວ, ກົມກອງສົມທົບກັບທ້ອງຖິ່ນຂົນຂວາຍບັນດາແຫຼ່ງອຸປະຖໍາ ແລະລົງທຶນໂດຍກົງປະຕິບັດແຕ່ລະກິດຈະກໍາຍ່ອຍ. ຍ້ອນແນວນັ້ນ, ຈຶ່ງບັນລຸປະສິດທິຜົນສູງທີ່ສຸດ”.

ຜົນປະກົດວ່າ, ຫຼາຍຕາແສງດໍາເນີນການເຄື່ອນໄຫວສົມທົບກັບກໍາລັງປະກອບອາວຸດໃນການກໍ່ສ້າງຊົນນະບົດໃໝ່ໄດ້ຮັບການຢັ້ງຢືນບັນລຸ 19/19 ມາດຖານກໍ່ສ້າງຊົນນະບົດໃໝ່ຈາກຂັ້ນເທິງ. ນໍາໜ້າໃນຂະບວນການກໍາລັງປະກອບອາວຸດຮ່ວມແຮງຮ່ວມໃຈກໍ່ສ້າງຊົນນະບົດໃໝ່ແມ່ນກອງບັນຊາການທະຫານບັນດາເມືອງຄື: ໝີຊວຽນ, ກູລາວຢຸງ, ເຈົາແທ່ງ, ເຈິ່ນເດ, ເກ໋ແຊກ ແລະລອງຟູ໋. ທ່ານພັນເອກພິເສດ ຮວິ່ງແທງຮຸ່ງ, ຮອງຫົວໜ້າການເມືອງກອງບັນຊາການທະຫານແຂວງແບ່ງປັນວ່າ: “ໃນໄລຍະຈະມາຖິງ, ກອງບັນຊາການທະຫານແຂວງ ສືບຕໍ່ຊີ້ນໍາບັນດາອົງການກົມກອງສົມທົບກັນຢ່າງແໜ້ນແຟ້ນກັບຄະນະພັກ, ອໍານາດການປົກຄອງ, ອົງການຈັດຕັ້ງມະຫາຊົນ ແລະປະຊາຊົນທ້ອງຖິ່ນຍູ້ແຮງຄວາມຄືບໜ້າໃນການກໍ່ສ້າງຊົນນະບົດໃໝ່, ສ້າງກໍາລັງໜູນຊຸກຍູ້ການພັດທະນາເສດຖະກິດ-ສັງຄົມ, ຮັບປະກັນການປ້ອງກັນຊາດ, ປ້ອງກັນຄວາມສະຫງົບຢ່າງໝັ້ນຄົງ, ຍົກສູງຊີວິດດ້ານວັດຖຸ ແລະຈິດໃຈໃຫ້ແກ່ປະຊາຊົນ”.

 

ແປໂດຍ: ຮວ່າງເຈື່ອງ