ຢູນີເທວ ເປັນເຈົ້າການແກ້ໄຂດ້ານເຕັກນິກ ແລະສົມທົບທຶນຊ່ວຍເຫຼືອຜູ້ປະສົບໄພນ້ຳຖ້ວມ
ເມື່ອເກີດເຫດການໄພນ້ຳຖ້ວມຢູ່ເມືອງສະໜາມໄຊ ແຂວງອັດຕະປື ຍ້ອນຄູກັ້ນນ້ຳເຂື່ອນແຕກລະບົບໂຄງລ່າງພື້ນຖານເຕັກນິກທັງໝົດຢູ່ເຂດດັ່ງກ່າວແມ່ນໄດ້ຮັບການແກ້ໄຂຂໍ້ຂັດຂ້ອງ ແລະປັບປຸງທັນທີເພື່ອຮັບປະກັນດ້ານການຕິດຕໍ່ສື່ສານໃຫ້ແກ່ພໍ່ແມ່ປະຊາຊົນ ແລະ ບັນດາການເຄື່ອນໄຫວວຽກງານກູ້ໄພໃນເຂດດັ່ງກ່າວ.
ນອກຈາກນັ້ນ ຢູນີເທວ ຍັງຊ່ວຍເຫຼືອປະຊາຊົນຢູ່ເຂດເມືອງສະໜາມໄຊ ໃຫ້ສາມາດນຳໃຊ້ໂທລະສັບພາຍໃນປະເທດແບບບໍ່ເສຍຄ່າ 10 ນາທີ/ມື້ ແລະມີດາຕ້າອິນເຕີເນັດ ສຳລັບມືຖື 300 ເມັກ/ມື້ ຈົນຮອດວັນທີ 31 ກໍລະກົດ 2018 ທີ່ສູນພັກອາໄສຂອງຜູ້ປະສົບໄພນ້ຳຖ້ວມ ຢູນີເທວ ກໍ່ໄດ້ຕັ້ງຈຸດໂທລະສັບແບບບໍ່ເສຍຄ່າໂທຫຼາຍຈຸດເພື່ອອຳນວຍຄວາມສະດວກໃຫ້ກັບທຸກຝ່າຍ. ນອກຈາກນັ້ນຍັງໄດ້ມອບໂທລະສັບ 50 ເຄື່ອງໂທບໍ່ເສຍຄ່າຕະຫຼອດຈົນໝົດເດືອນ ສິງຫາ 2018 ນີ້ໃຫ້ແກ່ທີມກູ້ໄພນຳໃຊ້ເຂົ້າໃນວຽກງານຕ່າງໆໃນການຊ່ວຍເຫຼືອປະຊາຊົນ.
|
|
ຜູ້ຕາງໜ້າບໍລິສັດໂທລະຄົມ Unitel ມອບເງິນສົດຈຳນວນ 300 ລ້ານກີບໃຫ້ແກ່ຜູ້ປະສົບໄພນ້ຳຖ້ວມຢູ່ເມືອງສະໜາມໄຊ ແຂວງອັດຕະປື. ພາບ: vientianemai.net |
ໃນວັນທີ 25 ກໍລະກົດ 2018 Unitel ແລະລັດວິສາຫະກິດລາວເອເຊຍໂທລະຄົມ ໄດ້ຮ່ວມກັນສົມທົບທຶນປະກອບສ່ວນຊ່ວຍເຫຼືອ ລວມມູນຄ່າທັງໝົດ 500 ລ້ານກີບໃນນັ້ນໄດ້ມອບເປັນເງິນສົດຈຳນວນ 300 ລ້ານກີບສ່ວນເງິນ 200 ລ້ານກີບ Unitel ໄດ້ຈັດຊື້ເປັນເຄື່ອງອຸປະໂພກ-ບໍລິໂພກ ເພື່ອມອບໃຫ້ປະຊາຊົນຜູ້ປະສົບໄພນ້ຳຖ້ວມ ພ້ອມດຽວກັນນັ້ນ ຢູນິເທວ ຍັງສ້າງລະຫັດສັ້ນເພື່ອໃຫ້ລູກຄ້າທີ່ນຳໃຊ້ເບີຂອງຢູນີເທວ ສາມາດສົ່ງຂໍ້ຄວາມເຂົ້າຮ່ວມບໍລິຈາກໃຫ້ຜູ້ປະສົບໄພນ້ຳຖ້ວມໄດ້ໂດຍຜ່ານເລກໝາຍ 333 ໂດຍມູນຄ່າທີ່ໄດ້ຮັບຈາກການສົ່ງຂໍ້ຄວາມປະຕິບັດມາແຕ່ວັນທີ 26 ກໍລະກົດ 2018 ແລະປິດຮັບໃນວັນທີ 05 ສິງຫາ 2018 ສາມາດສັງລວມເປັນຍອດສົມທົບທຶນທັງໝົດ 27.129.500 ກີບພ້ອມນັ້ນທາງຢູນີເທວໄດ້ມີການອັບເດດຍອດເງິນແຕ່ລະມື້ໂດຍການແຈ້ງຍອດຜ່ານການໂພດລົງເຟດບຸກຂອງ Unitel lao ພາຍຫຼັງປິດຮັບແລ້ວຍອດເງິນດັ່ງກ່າວກໍ່ຈະສືບຕໍ່ຈັດຕັ້ງປະຕິບັດມອບໃຫ້ຜູ້ປະສົບໄພຕາມຄວາມເໝາະສົມ.
ບັນດາການເຄື່ອນໄຫວດັ່ງກ່າວຂອງ ຢູນີເທວ ຕະຫຼອດໄລຍະທີ່ຜ່ານມາແມ່ນເພື່ອເປັນການແບ່ງປັນນ້ຳໃຈຊ່ວຍເຫຼືອ ແລະເປັນການແບ່ງເບົາພາລະບາງສ່ວນຕໍ່ປະຊາຊົນໃນບັນດາບ້ານທີ່ຖືກໄພນ້ຳຖ້ວມຢູ່ເຂດສະໜາມໄຊ ຢູນີເທວເອງກໍ່ຂໍເປັນກຳລັງໃຈໃຫ້ຜູ້ປະສົບໄພທຸກຄົນຜ່ານພົ້ນເຫດການນີ້ໄປໄດ້ດ້ວຍດີ.
ໂດຍ: ວຽງຈັນໃໝ່