ໂຄສະນາເຜີຍແຜ່ບັນດາຜະລິດຕະພັນຂຽວ, ປອດສານພິດຂອງຫວຽດນາມ ຢູ່ນິວຊີແລນ
ກປ.ອອນໄລ - ໃນລະຫວ່າງວັນທີ 10 – 11 ພະຈິກ, ອົງການແລກປ່ຽນການຄ້າ, ສະຖານທູດຫວຽດນາມ ປະຈຳນິວຊີແລນ ໄດ້ສົມທົບກັບບໍລິສັດ Integrity Plus Limited ຈັດຕັ້ງຮ້ານວາງສະແດງຢູ່ງານຕະຫຼາດນັດ Go Green Expo 2018 ທີ່ນະຄອນຫຼວງ Wellington ຂອງປະເທດນິວຊີແລນ ເພື່ອແນໃສ່ໂຄສະນາເຜີຍແຜ່ບັນດາຜະລິດຕະພັນຂຽວ, ປອດສານພິດຂອງຫວຽດນາມ ເຖິງຜູ້ຊົມໃຊ້ນິວຊີແລນ.
ຮ້ານວາງສະແດງຫວຽດນາມ ທີ່ເຂົ້າຮ່ວມງານຕະຫຼາດນັດດ້ວຍ logo ເຂົ້າສານຫວຽດນາມ – VietNam Organic Rice ໄດ້ດຶງດູດຄວາມສົນໃຈຈາກຜູ້ມາຢ້ຽມຊົມເປັນຈຳນວນຫຼວງຫຼາຍ. ຜູ້ມາຢ້ຽມຊົມສ່ວນຫຼາຍແມ່ນຜູ້ຊົມໃຊ້ນິວຊີແລນ ລ້ວນແຕ່ຕີລາຄາສູງຄຸນນະພາບ ແລະລາຄາເໝາະສົມຂອງບັນດາຜະລິດຕະພັນເຂົ້າສານຂອງຫວຽດນາມ.
|
|
ບັນດາຜະລິດຕະພັນເຂົ້າສານຂອງຫວຽດນາມ ໄດ້ແນະນຳຢູ່ງານຕະຫຼາດນັດ. ພາບ: ສຳນັກຂ່າວສານຫວຽດນາມ. |
ບໍລິສັດ Integrity Plus Limited ແມ່ນບໍລິສັດແຈກຢາຍບັນດາຜະລິດຕະພັນນີ້ຢູ່ຕະຫຼາດນິວຊີແລນ. ງານຕະຫຼາດນັດແມ່ນໂອກາດເພື່ອສຳຫຼວດຄວາມຕ້ອງການຢູ່ຕະຫຼາດ. ຕາມນັ້ນແລ້ວ, ນັບແຕ່ຕົ້ນປີ 2019, ຜະລິດຕະພັນເຂົ້າສານມີເຄື່ອງໝາຍການຄ້າ OrgaGro ຂອງຫວຽດນາມ 7 ປະເພດ ຈະຖືກນຳເຂົ້າລະບົບຂາຍຍ່ອຍຂອງລະບົບຮ້ານຊັບພະສິນຄ້າສັງກັດກຸ່ມບໍລິສັດ Foodstuff ຂອງນິວຊີແລນ.
ງານຕະຫຼາດນັດ Go Green Expo 2018 ແມ່ນງານວາງສະແດງປະຈຳປີກ່ຽວກັບວິຖີຊີວິດຂຽວ ແລະຍືນຍົງ. ງານຕະຫຼາດນັດຄັ້ງນີ້ດຶງດູດນັບຮ້ອຍວິສາຫະກິດເຂົ້າຮ່ວມ ກໍ່ຄືຜູ້ຕາງໜ້າບັນດາບໍລິສັດແຈກຢາຍ, ບໍລິສັດນຳເຂົ້າມາຊອກຮູ້.
ໂດຍ: ທູຮັ່ງ