ເວທີປາໄສ CLMVT Forum 2018 ໄຂຂຶ້ນຢ່າງເປັນທາງການ
ໃນວັນທີ 16 ສິງຫາ 2018 ທີ່ບາງກອກ, ປະເທດໄທ, ເວທີປາໄສ CLMVT Forum 2018 ໄດ້ໄຂຂຶ້ນຢ່າງເປັນທາງການພາຍໃຕ້ຫົວຂໍ້ CLMVT ກ້າວຂຶ້ນສູ່ເຕັກໂນໂລຢີ (CLMVT Taking-Off Through Technology) ເພື່ອເພີ່ມທະວີການຮ່ວມມືສົ່ງເສີມທາງດ້ານການຄ້າ ແລະການລົງທຶນດ້ວຍລະບົບດິຈິຕອນຢູ່ໃນປະເທດພາກພື້ນແມ່ນ້ຳຂອງ, ໂດຍມີ ກຳປູເຈຍ, ລາວ, ມຽນມາ, ຫວຽດນາມ ແລະໄທ (CLMVT).
ໃຫ້ກຽດເຂົ້າຮ່ວມໂດຍ, ທ່ານພົນເອກ ປະຍຸດ ຈັນໂອຊາ ນາຍົກລັດຖະມົນຕີ ລາຊະອານາຈັກໄທ, ທ່ານ ສົນທິລາ ສົນທິ ຈິລະວົງ ລັດຖະມົນຕີກະຊວງການຄ້າຂອງໄທ, ພ້ອມຕາງໜ້ານັກທຸລະກິດຈາກປະເທດ CLMVT ຫຼາຍກວ່າ 700 ທ່ານ.
    |
 |
|
ບັນດາຜູ້ແທນເຂົ້າຮ່ວມເວທີປາໄສ. ພາບ: kpl.gov.la. |
ຈຸດປະສົງຂອງເວທີປາໄສຄັ້ງນີ້, ແມ່ນເພື່ອເປັນເວທີປຶກສາຫາລືຂອງຜູ້ນຳລະດັບສູງຈາກພາກລັດ ແລະພາກເອກະຊົນລວມເຖິງນັກວິຊາການຈາກປະເທດ CLMVT ໃນການສົ່ງເສີມ ແລະພັດທະນາຄວາມສຳພັນທາງດ້ານເສດຖະກິດການຄ້າ ແລະການລົງທຶນເພື່ອກ້າວສູ່ຕະຫຼາດໂລກ ແລະຈະເລີນກ້າວໜ້າໄປພ້ອມກັນ ແລະທັງເປັນການເສີມສ້າງບົດບາດຂອງປະເທດ CLMVT ໃນການເປັນສູນກາງເສດຖະກິດຂອງອາຊຽນ.
ທ່ານພົນເອກ ປະຍຸດ ຈັນໂອຊາ ໄດ້ກ່າວວ່າ: ເວທີປາໄສ CLMVT 2018 ແມ່ນເພື່ອຂັບເຄື່ອນການເຊື່ອມໂຍງທີ່ບໍ່ມີຮອຍຕໍ່ໃນທຸກດ້ານລະຫວ່າງບັນດາປະເທດ CLMVT. ນອກຈາກນັ້ນ, ຍັງເປັນການເຊື່ອມໂຍງບັນດານັກທຸລະກິດທີ່ໂດດເດັ່ນ, ຜູ້ປະກອບການໜຸ່ມນ້ອຍ, ນັກກົດໝາຍ ແລະສະຖາບັນທີ່ມີຊື່ສຽງຈາກປະເທດ CLMV. ທ່ານກ່າວຕື່ມວ່າການໃຊ້ປະໂຫຍດຈາກຄວາມກ້າວໜ້າທາງເຕັກໂນໂລຢີ, ໂດຍສະເພາະດິຈິຕອນໃນການເຊື່ອມໂຍງສ້າງໂອກາດ ແລະມູນຄ່າມະຫາສານໃຫ້ກັບເສດຖະກິດຈົນກາຍເປັນເຄື່ອງມືສຳຄັນໃນການພັດທະນາເສດຖະກິດ CLMVT ທຸກລະດັບຢ່າງທົ່ວເຖິງ ແລະຍືນຍົງ.
ຂ່າວ: ສຸກທະວີ