leftcenterrightdel
ທ່ານ ຫງວຽນງອັກທ້ຽນ ລັດຖະມົນຕີກະຊວງວັດທະນະທໍາ, ກິລາ ແລະທ່ອງທ່ຽວ ກ່າວຄໍາເຫັນທີ່ພິທີໄຂ. ພາບ: ຢ້ຽວຖຸ໋ຍ.

ລາຍການດັ່ງກ່າວໂດຍກະຊວງວັດທະນະທໍາ, ກິລາ ແລະທ່ອງທ່ຽວ ຈັດຕັ້ງເນື່ອງໃນໂອກາດສະເຫຼີມສະຫຼອງ 58 ປີແຫ່ງວັນສ້າງຕັ້ງຂະແໜງທ່ອງທ່ຽວຫວຽດນາມ (9-7-1960/9-7-2018), ເພື່ອແນໃສ່ຄັດເລືອກ, ເຊີດຊູບັນດາອົງການຈັດຕັ້ງ, ວິສາຫະກິດ ແລະບຸກຄົນທີ່ມີການປະກອບສ່ວນຕັ້ງໜ້າໃຫ້ແກ່ພາລະກິດພັດທະນາການທ່ອງທ່ຽວຫວຽດນາມ ແລະຍົກສູງຄຸນນະພາບການບໍລິການ, ເປັນຫຼາຍຮູບຫຼາຍແບບຂອງຜະລິດຕະພັນທ່ອງທ່ຽວ; ສ້າງເຄື່ອງໝາຍການຄ້າທ່ອງທ່ຽວແຫ່ງຊາດຊຸກຍູ້ການພັດທະນາການທ່ອງທ່ຽວໃຫ້ກາຍເປັນຂະແໜງປາຍແຫຼມຂອງປະເທດເທື່ອລະກ້າວ.

leftcenterrightdel
ທ່ານຮອງນາຍົກລັດຖະມົນຕີ ຫວູດຶກດາມ ຖ່າຍຮູບເປັນທີ່ລະນຶກພ້ອມກັບບັນດາຜູ້ໄດ້ຮັບລາງວັນ. ພາບ: ຢ້ຽວຖຸ໋ຍ.

ກ່າວຄໍາເຫັນທີ່ພິທີ, ທ່ານ ຫງວຽນງອັກທ້ຽນ, ລັດຖະມົນຕີກະຊວງວັດທະນະທໍາ, ກິລາ ແລະທ່ອງທ່ຽວຫວຽດນາມ ເນັ້ນໜັກວ່າ, ຖານະບົດບາດຂອງຂະແໜງທ່ອງທ່ຽວຫວຽດນາມ ນັບມື້ນັບໄດ້ຮັບການຢັ້ງຢືນ. ປີ 2017, ຂະແໜງທ່ອງທ່ຽວຄາດຄະເນຕ້ອນຮັບແຂກທ່ອງທ່ຽວສາກົນຈໍານວນ 12,9 ລ້ານເທື່ອຄົນ, ຮັບໃຊ້ແຂກທ່ອງທ່ຽວພາຍໃນປະເທດ 73,2 ລ້ານເທື່ອຄົນ, ລວມຍອດລາຍຮັບຈາກແຂກທ່ອງທ່ຽວບັນລຸກວ່າ 510 ພັນຕື້ດົ່ງ, ປະກອບເກືອບ 8% GDP ຂອງທົ່ວປະເທດ. ຂະແໜງທ່ອງທ່ຽວຫວຽດນາມໄດ້ສາກົນຮັບຮອງຢືນອັນດັບທີ 6 ໃນ 10 ປະເທດທີ່ມີຂະແໜງທ່ອງທ່ຽວພັດທະນາໄວທີ່ສຸດໃນໂລກ ແລະຢືນອັນດັບທີ 1 ໃນພາກພື້ນອາຊີໃນປີ 2017.

ແປໂດຍ: ຮວ່າງເຈື່ອງ