ຍົກສູງບົດບາດສື່ສານກັບຕ່າງປະເທດ, ໂຄສະນາຮູບພາບຂອງຫວຽດນາມອອກສູ່ໂລກ
ກປ.ອອນໄລ - ເສີມຂະຫຍາຍບົດບາດຂອງບັນດາອົງການຜູ້ຕາງໜ້າການທູດ ແລະສື່ມວນຊົນ ເພື່ອໂຄສະນາຮູບພາບຂອງຫວຽດນາມອອກສູ່ໂລກ; ຄັດເລືອກຫົວຂໍ້, ຂໍ້ມູນຂ່າວສານເພື່ອໂຄສະນາເຜີຍແຜ່... ແມ່ນໜຶ່ງໃນບັນດາເນື້ອໃນທີ່ໄດ້ຮັບການປຶກສາຫາລືຫຼາຍທີ່ສຸດທີ່ການໂອ້ລົມສົນທະນາ ພາຍໃຕ້ຫົວຂໍ້ “ສື່ສານກັບຕ່າງປະເທດຮັບໃຊ້ວຽກງານເພີ່ມທະວີການໂຄສະນາຮູບພາບຂອງຫວຽດນາມອອກສູ່ໂລກໃນໄລຍະປັດຈຸບັນ” ໂດຍຄະນະຊີ້ນໍາວຽກງານສື່ສານກັບຕ່າງປະເທດສູນກາງ ຈັດຕັ້ງໃນວັນທີ 16 ພຶດສະພາ, ທີ່ຮ່າໂນ້ຍ.
ທີ່ການໂອ້ລົມສົນທະນາ, ທ່ານ ຟ້າມວັນລິງ, ຮອງຫົວໜ້າຄະນະໂຄສະນາສຶກສາສູນກາງ, ຮອງຫົວໜ້າຜູ້ປະຈໍາການຄະນະຊີ້ນໍາວຽກງານສື່ສານກັບຕ່າງປະເທດສູນກາງ ເນັ້ນໜັກວ່າ, ປັດຈຸບັນບັນດາປະເທດໃນໂລກລ້ວນແຕ່ສ້າງຍຸດທະສາດ ແລະຈັດຕັ້ງບັນດາບັ້ນໂຄສະນາຮູບພາບປະເທດຊາດ, ນໍາໃຊ້ພາຫະນະສື່ມວນຊົນ ຄືດັ່ງເຄື່ອງມືເພື່ອໂຄສະນາບັນດາຄຸນຄ່າດ້ານວັດທະນະທໍາ, ນະໂຍບາຍຂອງລັດ...
|
|
ທ່ານ ຟ້າມວັນລິງ ກ່າວຄໍາເຫັນທີ່ການໂອ້ລົມສົນທະນາ. ພາບ: ລິງແອວງ. |
ຢູ່ຫວຽດນາມ, ສື່ມວນຊົນໄດ້ປະກອບສ່ວນເຮັດໃຫ້ໂລກມີການປ່ຽນແປງທັດສະນະ, ການຕີລາຄາກ່ຽວກັບຫວຽດນາມ, ຈາກຮູບພາບປະເທດວິລະຊົນໃນສົງຄາມ, ປັດຈຸບັນໄດ້ຮັບຄວາມຮູ້ຈັກວ່າເປັນປະເທດຮັກຫອມສັນຕິພາບ, ດ້ວຍລະບອບການເມືອງໝັ້ນຄົງ, ນະໂຍບາຍພົວພັນຕ່າງປະເທດທີ່ເປີດອົກເປີດໃຈ ແລະພື້ນຖານເສດຖະກິດມີລະດັບການເຕີບໂຕສູງ. ແຕ່ວ່າ, ທ່ານ ຟ້າມວັນລິງ ຖືວ່າ, ເມື່ອທຽບກັບຄວາມຮຽກຮ້ອງຕ້ອງການ, ວຽກງານໂຄສະນາຮູບພາບປະເທດຊາດຜ່ານບັນດາພາຫະນະສື່ມວນຊົນຍັງຈໍາກັດຢູ່. ວຽກງານໂຄສະນາຮູບພາບຂອງປະເທດຊາດອອກສູ່ໂລກຄວນຮັບເອົາບົດຮຽນຈາກພາຍນອກ ແລະເສີມຂະຫຍາຍຄວາມສາມາດພາຍໃນເພື່ອໃຫ້ວຽກງານສື່ສານກັບຕ່າງປະເທດພັດທະນາທັງລວງກວ້າງ ແລະລວງເລິກ.
ແປໂດຍ: ກວຽດເຕິມ