ຕອນເຊົ້າວັນທີ 26 ທັນວາ, ຢູ່ຮ່າໂນ້ຍ, ກະຊວງຕຳຫຼວດຫວຽດນາມ ໄດ້ຈັດຕັ້ງກອງປະຊຸມແລກປ່ຽນກ່ຽວກັບວຽກງານສະກັດກັ້ນ ແລະຕ້ານຢາເສບຕິດຄັ້ງທີ 12 ລະຫວ່າງກົມຕຳຫຼວດສືບສວນອາດຊະຍາກຳກ່ຽວກັບຢາເສບຕິດ, ກະຊວງຕຳຫຼວດ; ກົມສະກັດກັ້ນ, ຕ້ານຢາເສບຕິດ ແລະອາດຊະຍາກຳ, ກອງບັນຊາການທະຫານຊາຍແດນ ກັບກົມສະກັດກັ້ນ ແລະຕ້ານຢາເສບຕິດ, ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບລາວ.

leftcenterrightdel
ກອງປະຊຸມແລກປ່ຽນກ່ຽວກັບວຽກງານສະກັດກັ້ນ ແລະຕ້ານຢາເສບຕິດລະຫວ່າງ ຫວຽດນາມ ແລະລາວ. ພາບ: ຫວຽດເກື່ອງ.

ເພື່ອແນໃສ່ຕໍ່ສູ້ກັບອາດຊະຍາກຳຢາເສບຕິດຢ່າງມີປະສິດທິຜົນ, ບັນດາກົມກອງຂອງສອງປະເທດຫວຽດນາມ ແລະລາວ ໄດ້ຜັນຂະຫຍາຍບັນດາແຜນການຕໍ່ສູ້ກັບອາດຊະຍາກຳປະເພດນີ້ຢູ່ແຕ່ລະປະເທດ. ຜ່ານນັ້ນ, ກຳລັງສະກັດກັ້ນ ແລະຕ້ານຢາເສບຕິດລະຫວ່າງ 3 ກົມກອງ, ກໍາລັງສະກັດກັ້ນ ແລະຕ້ານຢາເສບຕິດຂອງ 10 ແຂວງຊາຍແດນຫວຽດນາມ - ລາວ ໄດ້ຈັດຕັ້ງການລາດຕະເວນສອງຝ່າຍລຽບຕາມເສັ້ນຊາຍແດນໄດ້ 255 ຄັ້ງ, ທຳລາຍຄະດີຄ້າຂາຍ, ຂົນສົ່ງຢາເສບຕິດໄດ້ກວ່າ 4.000 ກໍລະນີ.

ທ່ານພັນເອກພິເສດ ຫງວຽນດິກນາມ, ຮອງຫົວໜ້າກົມຕຳຫຼວດສືບສວນອາດຊະຍາກຳກ່ຽວກັບຢາເສບຕິດ, ກະຊວງຕຳຫຼວດຫວຽດນາມ ໃຫ້ຮູ້ວ່າ: “ໃນໄລຍະຈະມາເຖິງທັງສາມກຳລັງຂອງສອງປະເທດຈະສືບຕໍ່ມານະພະຍາຍາມ ແລະສົມທົບກັນຢ່າງແໜ້ນແຟ້ນໃນວຽກງານສະກັດກັ້ນ ແລະຕ້ານອາດຊະຍາກຳຢາເສບຕິດ. ພິເສດແມ່ນບັນດາຈຸດຮ້ອນເຮັ່ງຂອງເສັ້ນຊາຍແດນຈຸດສຸມແມ່ນແຂວງເຊີນລາ ຕິດກັບແຂວງຫົວພັນ, ແຂວງຮ່າຕິ໊ງ ຕິດກັບແຂວງບໍລິຄຳໄຊ ແລະເຂດເມືອງເຕືອງເຢືອງ, ເມືອງເກ໊ຟອງ ຂອງແຂວງເງະອານ ຕິດກັບແຂວງຊຽງຂວາງ ເພື່ອຕໍ່ສູ້ທຳລາຍການຄ້າຂາຍ, ຂົນສົ່ງຢາເສບຕິດລະຫວ່າງສອງປະເທດຢ່າງມີປະສິດທິຜົນ.

ໂດຍ: ວຽງຄຳ