ມອບ-ຮັບອາຄານຫ້ອງປະຊຸມໂຮງຮຽນມິດຕະພາບ ຄຳມ່ວນ-ກວາງບິ່ງ
ເມື່ອບໍ່ດົນມານີ້, ທ່ານ ເລມິງເງິນ ຮອງປະທານຄະນະກຳມະການສະພາປະຊາຊົນແຂວງ ກວາງບິ່ງ - ສສ ຫວຽດນາມ ໄດ້ເຂົ້າຮ່ວມໃນພິທີມອບ-ຮັບອາຄານຫ້ອງປະຊຸມຂອງໂຮງຮຽນມິດຕະພາບລາວ-ຫວຽດນາມ ຄຳມ່ວນ-ກວາງບິ່ງ ເຊິ່ງເປັນທຶນຊ່ວຍເຫລືອລ້າຈາກແຂວງກວາງບິງ ມອບໃຫ້ແກ່ແຂວງຄຳມ່ວນ.
ທ່ານ ບົວມິນ ຈ້ວງລາສີ ຕາງໜ້າບໍລິສັດ SV ກຣຸບ ໃນນາມຜູ້ຮັບເໝົາກໍ່ສ້າງໄດ້ໃຫ້ຮູ້ວ່າ: ອາຄານຫ້ອງປະຊຸມດັ່ງກ່າວໄດ້ເລີ່ມລົງກໍ່ສ້າງແຕ່ວັນທີ 1 ມັງກອນ 2018 ແລະໄດ້ສໍາເລັດໃນວັນທີ 27 ກໍລະກົດ 2018 ເຊິ່ງລັກສະນະຂອງອາຄານແມ່ນເປັນອາຄານຊັ້ນດຽວ, ກໍ່ສ້າງແບບເບຕົງເສີມເຫລັກ, ມີຂະໜາດ 30x11,40 ແມັດ ແລະມີການຕໍ່ເຕີມອາຄານ 12 ແມັດກະເລ ໄດ້ແບ່ງເປັນຫ້ອງເຮັດວຽກຂອງຄູ 3 ຫ້ອງ, ຫ້ອງນໍ້າ 4 ຫ້ອງ, ມີໂຕະ, ຕັ່ງ, ຕູ້ໃສ່ເອກະສານ 10 ຊຸດ ພ້ອມທັງເຄື່ອງປັບອາກາດ, ລະບົບໄຟຟ້າ, ນໍ້າປະປາ ແລະຕົ້ນໄມ້ປະດັບລວມມູນຄ່າທັງໝົດ 154.000 ໂດລາສະຫະລັດ.
ຂ່າວ: ຂປລ