ຫວຽດນາມ ສືບຕໍ່ມອບເງິນຊ່ວຍເຫລືອຜູ້ປະສົບໄພພິບັດ ຢູ່ແຂວງອັດຕະປື
ໃນວັນທີ 15-16 ສິງຫາ 2018, ທີ່ສະຖານທູດລາວ ປະຈຳ ສສ ຫວຽດນາມ, ທ່ານ ທອງສະຫວັນ ພົມວິຫານ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ. ຫວຽດນາມ ໄດ້ຮັບເງິນຊ່ວຍເຫລືອຈາກບໍລິສັດຫຸ້ນສ່ວນໄຟຟ້າຫວຽດນາມ-ລາວ ຈຳນວນ 31.150 ໂດລາສະຫະລັດ, ມອບໂດຍ ທ່ານ ຟຸ່ງມິງຈາ ຮອງອຳນວຍການບໍລິສັດຫຸ້ນສ່ວນໄຟຟ້າ ຫວຽດນາມ-ລາວ, ຈາກວິທະຍາຄານຕຳຫລວດປະຊາຊົນຫວຽດນາມ ຈຳນວນ 50 ລ້ານດົງ, ມອບໂດຍ, ທ່ານ ພັອ ສຈ.ປອ ຫງວຽນດັກຮວານ ຮອງອຳນວຍການວິທະຍາຄານຕຳຫລວດປະຊາຊົນຫວຽດນາມ, ສາມະຄົມມິດຕະພາບຫວຽດນາມ-ລາວ ແຂວງຖາຍຫງວຽນ ຈຳນວນ 50 ລ້ານດົງ, ມອບໂດຍ, ທ່ານ ຫງວຽນ ຢວ໊ານກິງ ປະທານສາມະຄົມມິດຕະພາບຫວຽດນາມ-ລາວ ແຂວງຖາຍຫງວຽນ ເພື່ອນຳໄປຊ່ວຍເຫລືອບັນເທົາທຸກຜູ້ປະສົບໄພພິບັດທາງທຳມະຊາດຍ້ອນຄູກັນອ່າງເກັບນ້ຳເຂື່ອນໄຟຟ້າເຊປຽນ-ເຊນ້ຳນ້ອຍແຕກ ໃນວັນທີ 23 ກໍລະກົດ 2018 ຜ່ານມາ, ເຮັດໃຫ້ມວນນ້ຳໄຫລຖ້ວມຊຸເຮືອນປະຊາຊົນ ຢູ່ເມືອງສະໜາມໄຊ, ແຂວງອັດຕະປືໄດ້ຮັບຄວາມເສຍຫາຍທາງດ້ານຊັບສິນ ແລະຊີວິດເປັນຈຳນວນຫລາຍ.
ໃນໂອກາດນີ້, ຜູ້ຕາງໜ້າແຕ່ລະພາກສ່ວນທີ່ມາມອບເງິນຊ່ວຍເຫລືອຕ່າງກໍ່ໄດ້ສະແດງຄວາມເຫັນໃຈຕໍ່ເຫດໄພພິບັດດັ່ງກ່າວ, ເຊິ່ງໄດ້ສ້າງຄວາມສູນເສຍຕໍ່ຊີວິດ ແລະຊັບສິນຂອງປະຊາຊົນເຂດເມືອງສະໜາມໄຊ, ແຂວງອັດຕະປືເປັນຈຳນວນຫລວງຫລາຍ, ພ້ອມທັງເຊື່ອໝັ້ນວ່າພາຍໃຕ້ການຊີ້ນຳ-ນຳພາຂອງລັດຖະບານລາວ ກໍຄື ຄວາມສາມັກຄີຂອງປວງຊົນລາວທັງຊາດ ແລະການຊ່ວຍເຫລືອຈາກນາໆຊາດຈະສາມາດຟື້ນຟູຊີວິດການເປັນຢູ່ຂອງປະຊາຊົນໃຫ້ກັບຄືນສູ່ສະພາບປົກກະຕິໂດຍໄວ.
    |
 |
|
ທ່ານ ທອງສະຫວັນ ພົມວິຫານ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ. ຫວຽດນາມ ໄດ້ຮັບເງິນຊ່ວຍເຫລືອຈາກຝ່າຍຫວຽດນາມ. ພາບ: kpl.gov.la. |
ພ້ອມນີ້, ທ່ານ ທອງສະຫວັນ ພົມວິຫານ ກໍໄດ້ສະແດງຄວາມຂອບໃຈຢ່າງຈິງໃຈຕໍ່ການຊ່ວຍເຫລືອດັ່ງກ່າວ, ເຊິ່ງສະແດງເຖິງນໍ້າຈິດນໍ້າໃຈ, ຄວາມເປັນຫ່ວງເປັນໄຍຂອງລັດຖະບານ ກໍຄື ປະຊາຊົນຫວຽດນາມທີ່ມີຕໍ່ປະຊາຊົນລາວທີ່ໄດ້ຮັບຜົນກະທົບຈາກໄພພິບັດຄັ້ງນີ້, ເປັນການປະກອບສ່ວນຊ່ວຍເຫລືອບັນເທົາທຸກໃຫ້ປະຊາຊົນທີ່ປະສົບໄພໃນຄັ້ງນີ້ປົວແປງຊີວິດການເປັນຢູ່ໃຫ້ດີຂຶ້ນໂດຍໄວ ແລະຈະນຳເອົາເງິນຊ່ວຍເຫລືອນີ້ໄປນຳໃຊ້ເຂົ້າໃນການແກ້ໄຂຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບ ໃຫ້ມີປະສິດທິຜົນສູງສຸດ.
ເນື້ອໃນ: ຂປລ