ການນຳຂັ້ນສູງພັກ-ລັດ ເຂົ້າວາງພວງມາລາ ແລະເຊັນປື້ມໄວ້ອາໄລຕໍ່ການຈາກໄປຂອງອະດີດເລຂາທິການໃຫຍ່ ໂດ໋ເມື່ອຍ
ໃນວັນທີ 6 ຕຸລາ 2018 ນີ້, ການນຳຂັ້ນສູງພັກ-ລັດ ນຳໂດຍສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ພ້ອມດ້ວຍຄະນະໄດ້ເຂົ້າວາງພວງມາລາ ແລະເຊັນປື້ມໄວ້ອາໄລເຖິງດວງວິນຍານສະຫາຍ ໂດ໋ເມື່ອຍ ອະດີດເລຂາທິການໃຫຍ່ຄະນະ ບໍລິຫານງານສູນກາງພັກກອມມູນິດຫວຽດນາມຢູ່ສະຖານເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ.
ພາຍຫຼັງວາງພວງມາລາແລ້ວ ສະຫາຍ ບຸນຍັງ ວໍລະຈິດ ໄດ້ເຂົ້າເຊັນປື້ມໄວ້ອາໄລ, ໂດຍມີເນື້ອໃນວ່າ: ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ສະພາແຫ່ງຊາດ, ລັດຖະບານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະສູນກາງແນວລາວສ້າງຊາດຮູ້ສຶກເສົ້າໂສກເສຍດາຍເປັນຢ່າງຍິ່ງເມື່ອໄດ້ຮັບຂ່າວການຈາກໄປໂດຍບໍ່ມີວັນກັບຄືນມາຂອງ ສະຫາຍ ໂດ໋ເມື່ອຍ, ອະດີດເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ. ການຈາກໄປຂອງ ສະຫາຍບໍ່ພຽງແຕ່ເປັນການສູນເສຍຜູ້ນຳທີ່ເຄົາລົບຮັກຂອງພັກ-ລັດ ແລະປະຊາຊົນຫວຽດນາມ ແຕ່ຍັງເປັນການສູນເສຍເພື່ອນມິດສະຫາຍທີ່ໃກ້ຊິດ ແລະສະໜິດສະໜົມທີ່ສຸດຂອງພັກ, ລັດ ແລະປະຊາຊົນລາວພວກຂ້າພະເຈົ້າອີກດ້ວຍ.
|
|
ທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ພ້ອມດ້ວຍຄະນະໄດ້ເຂົ້າວາງພວງມາລາ ແລະເຊັນປື້ມໄວ້ອາໄລ. ພາບ: ຂປລ. |
ສະຫາຍ ໂດ໋ເມື່ອຍ ໄດ້ເຖິງແກ່ມໍລະນະກຳໃນວັນທີ 1 ຕຸລາ 2018 ຜ່ານມານີ້, ລວມອາຍຸໄດ້ 101 ປີ. ສະຫາຍເປັນນັກປະຕິວັດທີ່ກ້າແກ່ນ, ເດັດດ່ຽວຜູ້ໜຶ່ງທີ່ມີຜົນງານ ແລະມີການປະກອບສ່ວນອັນໃຫຍ່ຫຼວງເຂົ້າໃນພາລະກິດຕໍ່ສູ້ເພື່ອຄວາມເປັນເອກະລາດແຫ່ງຊາດຂອງປະຊາຊົນຫວຽດນາມໃນເມື່ອກ່ອນກໍຄືພາລະກິດສ້າງສາພັດທະນາ ແລະປົກປັກຮັກສາປະເທດຊາດ ຂອງ ສສ ຫວຽດນາມ ຕະຫຼອດໄລຍະເວລາ 80 ກວ່າປີຜ່ານມາ. ພ້ອມດຽວກັນນັ້ນ, ສະຫາຍ ໂດ໋ເມື່ອຍ ກໍເປັນໜຶ່ງໃນການນຳ ລຸ້ນອາວຸໂສຂອງຫວຽດນາມທີ່ໄດ້ມີການປະກອບສ່ວນອັນໃຫຍ່ຫຼວງເຂົ້າໃນການເສີມຂະຫຍາຍ ແລະເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ ແລະຫວຽດນາມຕະຫຼອດມາ.
ໃນຊ່ວງເວລາໂສກເສົ້າອາໄລຢ່າງສຸດຊຶ້ງນີ້, ຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ, ລັດຖະບານແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ສູນກາງແນວລາວສ້າງຊາດ ແລະປະຊາຊົນລາວຂໍສະແດງຄວາມອາໄລອາວອນຢ່າງສຸດຊຶ້ງ ແລະແບ່ງເບົາຄວາມເສົ້າໂສກເສຍດາຍມາຍັງຄະນະບໍລິຫານງານສູນກາງພັກກອມມູນິດຫວຽດນາມ, ສະພາແຫ່ງຊາດ, ລັດຖະບານແຫ່ງ ສສ ຫວຽດນາມ, ສູນກາງແນວໂຮມປະເທດຊາດຫວຽດນາມ ແລະ ປະຊາຊົນຫວຽດນາມອ້າຍນ້ອງໂດຍສະເພາະຕໍ່ຄອບຄົວ, ຍາດຕິພີ່ນ້ອງຂອງສະຫາຍ ໂດ໋ເມື່ອຍ ມານະໂອກາດນີ້ດ້ວຍ.
ເນື້ອໃນ: ຂປລ